రాబోవు సంఘటనలు, ప్రస్తుత కర్తవ్యములు (కొనసాగింపు)

రాబోవు సంఘటనలు, ప్రస్తుత కర్తవ్యములు (కొనసాగింపు)

నాలుగు గాలులను పట్టుకొనియున్న నలుగురు దూతలు, సూర్యుని వంటి ముఖముగల బలిష్ఠుడైన దూత, సముద్రముపై అతని కుడిపాదము, భూమిపై అతని ఎడమపాదము, సూర్యుని వస్త్రముగా ధరించి చంద్రుని పాదముల క్రింద కలిగియున్న స్త్రీ, ఏడు తలలును పది కొమ్ములును గల గొప్ప ఎఱ్ఱని ఘటసర్పము, సముద్రములోనుండి పైకి వచ్చిన మృగము, గొప్ప భూకంపము, బబులోను నాశనము, గొప్ప దేవుని విందునకు ఆకాశపక్షులను పిలుచుట, సాతాను బంధింపబడుట, గొప్ప తెల్లని సింహాసనము, అంత్య తీర్పు, పరలోకమునుండి క్రొత్త యెరూషలేము దిగివచ్చుట, ఆ మహిమగల పట్టణ వర్ణన — ఇట్టివాటిని చదివి వీటికి ప్రభావితుడు కాకుండా ఎవడు ఉండగలడు? వీటిని పఠించి, "ఇది దేవుని వ్రేలితో వ్రాయబడినది!" అను నిర్ణయమునకు రాకుండా ఎవడు ఉండగలడు?

ప్రకటన గ్రంథము యొక్క సాధారణ స్వభావము ఇట్టిదే. దీనిని చదువుట "ధన్యకరము" అని మీకు స్పష్టముగా చెప్పబడిన గ్రంథము ఇదే. ఈ గ్రంథము రచింపబడిన సంకేత శైలిని గూర్చి రెండు సాధారణ సూచనలు మాత్రమే చేసి ముందుకు సాగెదను.

1. మొదటి సూచన ఏమనగా, సంకేత భాషా ప్రయోగము ప్రకటన గ్రంథమునకు మాత్రమే పూర్తిగా ప్రత్యేకమైనదని మీరు తలంచకూడదు. లేఖనములోని ఇతర భాగములలో కూడా దీనిని మీరు కనుగొందురు. అర్థము మరుగుగా కనబడు ప్రకటన గ్రంథములోని చిహ్నములు, రూపకములు పలుమారులు పాత నిబంధనలో పరిశుద్ధాత్మచే ఉపయోగింపబడినవే. ఉదాహరణకు, నాలుగవ అధ్యాయములో నాలుగు జీవులను గూర్చి చదివెదరు. యెహెజ్కేలులో కూడా నాలుగింటిని గూర్చి చదివెదరు (1:5). మొదటి నాలుగు ముద్రల దర్శనములో గుఱ్ఱములను గూర్చి చదివెదరు. జెకర్యా దర్శనములో కూడా గుఱ్ఱములను గూర్చి చదివెదరు (6:2,3). ఏడవ అధ్యాయములో ముద్రింపబడిన సమూహమును గూర్చి చదివెదరు. యెహెజ్కేలు దర్శనములో కూడా ముద్రింపబడి గురుతు వేయబడిన ప్రజలను గూర్చి చదివెదరు (9వ అధ్యాయము). ఐదవ బూర క్రింద మిడతల తెగులును గూర్చి చదివెదరు. యోవేలు ప్రవచనములో కూడా మిడతలను గూర్చి చదివెదరు (2వ అధ్యాయము). పదియవ అధ్యాయములో యోహాను చిన్న గ్రంథమును తినుటను గూర్చి చదివెదరు. యెహెజ్కేలు కూడా తన దర్శనములో గ్రంథపుచుట్టను తినుటను గూర్చి చదివెదరు (3వ అధ్యాయము). ఇద్దరు సాక్షుల దర్శనములో ఒలీవ చెట్లను, దీపస్తంభములను గూర్చి చదివెదరు. జెకర్యా ప్రవచనములో అవే చిహ్నములను గూర్చి చదివెదరు (4వ అధ్యాయము). పదమూడవ అధ్యాయములో ఏడు తలలును పది కొమ్ములును గల మృగమును గూర్చి చదివెదరు. దానియేలు గ్రంథములో ఇట్టి మృగమును గూర్చి చదివెదరు (7వ అధ్యాయము). ఇరువది ఒకటవ అధ్యాయములో అద్భుతమైన పరలోక పట్టణమును గూర్చి చదివెదరు. యెహెజ్కేలు గ్రంథము చివరిలో భిన్నమైనదైనను దీనికంటె ఏమాత్రమూ తక్కువ మర్మముగలది కాని పట్టణ వర్ణన మీకు కనబడును (40వ అధ్యాయము మొదలైనవి).

ఈ విషయములు గమనింపదగినవి. ప్రకటన గ్రంథములోని చిహ్నములు పూర్తిగా క్రొత్తవి, వింతవి అన్నట్లు వాటిని చూచి మనము తడబడకూడదని ఇవి మనకు చూపుచున్నవి. దేవుని మనస్సును మనుష్యునికి తెలియజేయుటలో పాత నిబంధనలో కూడా ఇవి వాడబడినవని, అచ్చట చాలా తక్కువగా వాడబడినవని మనము జ్ఞాపకముంచుకొనవలెను. ప్రకటన గ్రంథము యొక్క విశేషము సంకేతములను, చిహ్నములను వాడుటలో లేదు — వాటి విస్తారమైన సమృద్ధిలోనే ఉన్నది.

నా రెండవ సూచన ఏమనగా, సంకేత రచనా శైలి తూర్పు దేశముల వారికి కనబడునదానికంటె మనకు ఎల్లప్పుడును ఎక్కువ వింతగా కనబడును. పరిశుద్ధ భూమి చుట్టునున్న దేశములలో రూపకములు, ఉపమానములు, దృష్టాంతములు, సామ్యములు మనలో కంటె అనంతముగా ఎక్కువగా తెలిసినవి. ఉదాహరణకు, ఐగుప్తులోను తూర్పున ఇతరచోట్లను విస్తారముగా ఉన్న చిత్రలిపి శాసనములు సంకేత రచనలే తప్ప మరేమియు కావు. మొదటి చూపులో ఈ చిత్రలిపులు వికృతముగా, అర్థరహితముగా, చీకటిగా, మరుగుగా కనబడునని ఎవరికి తెలియదు? వాటిని అభ్యసించువాడు వేయవలసిన మొదటి అడుగు, వాటి రూపమును బాగా పరిచయము చేసికొనుటయే. క్రమముగా వాటి అర్థమునకు తాళపుచెవిని తెలిసికొనగలనని అతడు ఆశింపవచ్చును. చివరకు ఆ తాళపుచెవి దొరికినపుడు, ఇదే చిత్రలిపులు ఆసక్తికరమైన విషయముతో నిండియున్నవని తెలియును.

ప్రకటన గ్రంథము విషయములో కూడా దాదాపు ఇంతే. ఇది పరిశుద్ధమైన చిత్రలిపుల గ్రంథము. దీని శైలి మన వాస్తవికవాదియైన ఉత్తర దేశపు మనస్సుకు ఏమాత్రమూ అలవాటు లేనిది. కావున దీని దర్శనములు మనకు రెట్టింపు వింతగా కనబడును — మన భావములను తెలియజేయు విధానముగా ఇట్టి పద్ధతి మనకు పరిచితము కానందున వింతగా కనబడును — ఇంకను ఎక్కువ వింతగా కనబడుటకు కారణము, అనేక

↑ పైకి వెళ్ళండి