ప్రభువు ఆనందం — 5. అప్రభావిత ఆనందం

5. అప్రభావిత ఆనందం

ఐదవదిగా, ప్రభువు ఆనందము ఒక విశేషమైన ఆనందము, ఒకడు తనకు కలిగినదంతయు కోల్పోయినప్పుడు కూడ దానిని అనుభవించవచ్చును. “ఏలయనగా అంజూరపు చెట్టు చిగురింపకపోయినను ద్రాక్షచెట్లు ఫలింపకపోయినను ఒలీవచెట్టు పంట దక్కకపోయినను చేలు ఆహారము నియ్యకపోయినను గొఱ్ఱెలమంద దొడ్డిలోనుండి కొట్టుకొనిపోయినను గోశాలలలో పశువులు లేకపోయినను నేను యెహోవాయందు ఆనందించెదను, నా రక్షణకర్తయగు దేవునియందు హర్షించెదను” (Hab. 3:17-18). మీరు మీ గడియారమునో, పెన్నునో, ఉద్యోగమునో, స్థానమునో, ఆస్తినో కోల్పోయినప్పటికిని ఈ ఆనందము మిమ్మల్ని విడిచిపోదు. 1935వ సంవత్సరములో, క్వెట్టా భూకంపములో 58,000 మంది 18 సెకనులలో మరణించుటను నేను స్వయముగా చూచితిని. అక్కడ నివసించిన కొద్దిమంది విశ్వాసులు తమకున్నదంతయు కోల్పోయినప్పటికిని అద్భుతరీతిగా మరణమునుండి తప్పించుకొనిరి. ఆ సమయమున నేను రెండు వారములు అక్కడ రక్షణ కార్యము చేసితిని. బ్రతికినవారు దినమంతయు ఏడ్చుచుండిరి. కానీ ఆ విశ్వాసులు తమకున్నదంతయు కోల్పోయినప్పటికిని పాటలు పాడుచు, బైబిలు అధ్యయన సమావేశములను ఆనందించుచుండిరి. తాము కోల్పోయినదాని గురించి వారు ఏ మాత్రము చింతపడలేదు. వారి ఆనందము వాస్తవమైనది, ఐశ్వర్యముపైననో, ఆస్తిపైననో, స్థానముపైననో, ఉద్యోగముపైననో ఆధారపడలేదు. ఈ ఆనందము లేనివారు ప్రతి చిన్న నష్టమునకును మిక్కిలి దుఃఖితులగుదురు, ఎందుకంటే వారి ఆనందము లోకసంబంధమైన దానిపైననే ఆధారపడియుండును.