ఈ పుస్తకములో వెతకండి
“దుష్ట సహవాసుని చెడు సూచన లేక ఆలోచన, లేత ఓకు ఆకులోని కీటకపు కుట్టువలె ఉన్నది, ఆకు పరిపక్వమైనప్పుడు అది గాల్-కాయగా పండును.” పాము తన స్వంత విషముచే హాని పొందదు గాని ఇతర నిరపరాధ జీవులు దానిచే ప్రభావితమగును; అట్లే, ఇప్పటికే తనలో పాప విషము గల దుష్టమనస్సుగలవాడు, దుష్టుని విషపు ప్రభావముచే మంచిమనస్సుగలవాడంతగా హాని పొందడు.
జావా యొక్క ఉపాస్ వృక్షము, అమెరికా యొక్క విషపు ఐవీ ఒక విధమైన హానికరమైన రసము లేక నూనెను ఉత్పత్తి చేయును, అది గాలిపై తిరుగుచు దాని వ్యాప్తిలోనికి వచ్చువారందరికి ప్రమాదకరమైన క్షయ వ్యాధిని తెచ్చును. అట్లే, గుర్తింపబడని ఏదో విధముగా, దుష్టుల జీవితముల విషపు చెడు ప్రభావము అన్ని వైపులకు వ్యాపించి, అనేకులకు ఆత్మీయ వ్యాధిని మరణమును తెచ్చును.
బలమైన కర్రలను తిను తొలుచు పురుగులు, రాళ్లను తొలుచు సముద్రపు పురుగులు అత్యంత మృదువైన సున్నితమైనవని గమనింపబడినది. అయినను కాలక్రమమున అవి గట్టి కర్రను రాళ్లను పూర్తిగా నాశనము చేయును. కాబట్టి మనము మెలకువగా ఉండి, దేవుని సహాయముతో అల్పముగా కనబడు ఆ దుష్ట ఆలోచనలను అలవాట్లను నాశనము చేయకుండినయెడల, అవి తొలుచు పురుగువలె మన ఆత్మీయ జీవితము యొక్క టెంక తప్ప మరేమియు మిగులనియ్యవు.
పాములు తేలులవంటి విషపు సరీసృపములు కీటకములు కొట్టి గాయపరచి, పిమ్మట తమ విష గ్రంథుల నుండి గాయములలోనికి విషము ఎక్కించి మరణము లేక వేదన కలుగజేయును; అయితే ప్రమాదకరమని ఎంచబడని ఈగలు కీటకములు నిజముగా అంతకంటె తక్కువ మరణకరము కావు, ఏలయనగా వ్యాధి క్రిములను మోసుకొని అన్నిచోట్లకు వ్యాపింపజేసి కోట్ల మంది మరణమును తెచ్చును. అట్లే, నిజముగా అంతే చెడ్డవారైన అనేకులను ప్రమాదకర నేరస్థులుగా మనము ఎంచము, ఏలయనగా ఇతరులకు తెలియకుండ తమ అదుపులేని నాలుకలను వాడి మరణకరమైన బోధల మాలిన్యమును ప్రభావములను చుట్టుప్రక్కల వ్యాపింపజేయుదురు.
పండని పండులోనికి తొలిచి అందు గుడ్లు పెట్టు ఒక కీటకము ఉన్నది, పండు ఎదుగుచుండగా బయటి రంధ్రము మూసుకొనును. తరువాత గుడ్లు పొదగబడి చిన్న పురుగులు పండును తిన మొదలుపెట్టును. బయట ఏ సూచన లేదు. పండు పక్వమైనట్లు ఆకర్షణీయముగా కనబడును గాని లోపల అది బోలుగాను నిష్ప్రయోజనముగాను ఉన్నది. అట్లే, బాల్యములోను యౌవనములోను మనము పొందు దుష్ట భావములు అలవాట్లు క్రమముగా పెరుగుచు, మన అంతరంగ ఆత్మలలో పనిచేసి మన నైతిక స్వభావమును చెడగొట్టును. కాబట్టి మన స్వభావములను చెడగొట్టు పాపమునకు విరోధముగా మొదటి దినముల నుండియే మెలకువగా ఉండవలెను.
మెక్సికోలో “గెంతు చిక్కుడు” అని పిలువబడు ఒక విధమైన చిక్కుడు ఉన్నది, సూర్యుని వేడి దానిపై పడినప్పుడు అది రాయి లేక పొద నీడను చేరువరకు తిరుగుచు మెలిపెట్టుకొన మొదలుపెట్టును. ఈ వింత వాస్తవమునకు వివరణ ఇది — ఒక కీటకము చిక్కుడులోనికి తొలిచి, దానిని తినుటవలన పెరిగి కాయ బోలుగా అయ్యెను. సూర్యుని వేడి దానిపై పడినప్పుడు అది తప్పించుకొన జూచి, నీడను చేరువరకు చిక్కుడు కాయను మరల మరల త్రిప్పును, అక్కడ నీడ చల్లదనముచే దాని పోరాటము ప్రశాంతమగును. అట్లే, దుష్ట ఆలోచనలు కోరికలు మనుష్య హృదయములలోనికి ప్రవేశించును, నీతిసూర్యుడు పాప జీవితముపై తన వెలుగు ప్రసరింపజేసినప్పుడు పాపి కలవరపడి ఆయన కిరణములు ప్రకాశింపని చీకటిలోనికి తప్పించుకొన జూచును, అట్లు బయటి చీకటిలో జీవించి దేవుని వెలుగును వేడిని కోల్పోవును.
దేవుడు మనుష్యుని తన స్వంత పోలికలో చేసెను గనుక, ఈ ఒక్క నిబంధనను అతడు నెరవేర్చినయెడల అతనిని హాని చేయగలది ఏదియు లేదు — అనగా తన స్వేచ్ఛా చిత్త వినియోగములో పాపములో తాను చిక్కుకొనకుండుట. మనము పాపము చేసినను దేవునికి ఏ విధమైన హాని చేయము గాని, మనలను మనము హాని చేసికొందుము, మనకు సంబంధించినవారిని హాని చేయుదుము. సమస్త రూపములలోని పాపము నుండి మనము రక్షింపబడి ఆయన సహవాసమును అనుభవించవలెనని ప్రేమగల దేవుడు కోరును గాని, పాపము దేవునితో ఈ పరిశుద్ధ సహవాసము నుండి మనలను వెలివేయును. మరియు వ్యక్తుల మధ్య అంత సన్నిహిత సంబంధము ఉన్నది గనుక మన హాని ఇతరుల హానియగును, ఇతరుని హాని మనదగును. ఇతరులను హాని చేయకుండ చెడు చేయుట ఎన్నడును సాధ్యము కాలేదు, ఎన్నడును సాధ్యము కాదు. మనము చేయు మంచిచెడ్డలచే మన తోటి మనుష్యులు ఏదో కొలతలో ప్రభావితమగుదురు. కాబట్టి మారుమనస్సు యొక్క అర్థము ఇది — భవిష్యత్తులో మనకును ఇతరులకును హానికరమైన ఆ క్రియల నుండి మనము విరమించి, దేవుని సహాయముతోను కృపతోను, జక్కయి చేసినట్లు ఇదివరకు చేసినదానికి పరిహారము చేయుట (లూకా 19:8–10).