అత్యంత గౌరవనీయునికి

మహారాణి గారి అత్యంత గౌరవనీయులైన రాజమంత్రిసభలో ఒకరైన సర్ రాబర్టు సిసిల్ నైట్ గారికి,

సభాసదులైనవారికి.

గౌరవనీయులారా, పండితులైన గ్రంథకర్తలు, దైవవిషయములను గూర్చి వ్రాయువారైనను లౌకిక విషయములను గూర్చి వ్రాయువారైనను, తమ రచనలను సామాన్య ప్రజలు చదివి వినునట్లు వారి ప్రయోజనము కొరకు వారి స్వభాషలోనైనను, లేదా విద్వాంసులైనవారి కొరకు హెబ్రీ, గ్రీకు, లాటిన్ భాషలలోనైనను ప్రచురించుట చాలవరకు మెచ్చదగిన క్రమబద్ధమైన పద్ధతి; అట్లే తమ ఆ శ్రమను, ప్రయాసను ఆదరించుటకై వాటిని ఎవరైన ఘనులకును గౌరవనీయులకును అంకితము చేయుట కూడ వారి అలవాటు. వారి ఆ పద్ధతియే ఇప్పుడు నన్ను కూడ ధైర్యపరచి, మాస్టర్ జాన్ కాల్విన్ గారి ఈ ప్రసంగములను నేను ఫ్రెంచి భాష నుండి ఇంగ్లీషులోనికి, ఆ భాష నెరుగని నా స్వదేశీయుల ప్రయోజనార్థము అనువదించిన ఈ నా శ్రమను మీ గౌరవనీయమైన ఔదార్యముపై ఆధారపడి మీకు అంకితము చేయుటకు పురికొల్పినది. అయ్యా, నా అల్పమైన కృతజ్ఞతకు ఒక గుర్తుగా దీనిని అంగీకరింపవలెనని మిక్కిలి వినయముతో వేడుకొనుచున్నాను; ఇది నా శ్రమ నిమిత్తము కాదు, అది మొరటైనదియు విలువలేనిదియే; కాని విషయము యొక్క యోగ్యతను బట్టియు, నా గ్రంథకర్త దానిని గంభీరముగను భక్తిపూర్వకముగను నిర్వహించిన తీరును బట్టియే. ప్రభువుల ప్రభువు మీలో గౌరవప్రదమైన సకల దైవభక్తి గుణములను వృద్ధిపరచును గాక (మీ గౌరవనీయుడును మహా జ్ఞానవంతుడునైన తండ్రిగారు ఎంతో కాలమునుండి ఈ రాజ్యములో ఎట్టి శ్రేష్ఠమైన అధికారిగా ఉండిరో, ఉన్నారో, మీరును అట్లే ఉండునట్లు), ఈ జీవితములో ఆయన దివ్య చిత్తప్రకారము క్షేమమును, ఈ కాలగమనము ముగిసిన తరువాత నిత్యానందమును, సౌభాగ్యమును అనుగ్రహించును గాక.

మీ గౌరవమునకు ఆజ్ఞాబద్ధుడైన, థామస్ స్టాకర్.