ఆరవ దర్శనం

ఆరవ దర్శనం (1 Cor. 15: 6)

ఆరవ దర్శనము ఐదువందలమంది సహోదరులకు కలిగెనని 1 Cor. 15: 6 చొప్పున తెలియుచున్నది. ఆయన పునరుత్థానము యొక్క వార్త వ్యాపించుచుండగా, విశ్వాసులు తాము దాగుకొనియున్న వివిధ స్థలముల నుండి కూడుకొనుట ఆరంభించిరి. ఒకేచోట కూడుకొనినవారి సంఖ్య ఆ లెక్కకు చేరెను. ఈ దర్శనము ద్వారా, మనుష్యులు కల్పించిన సమస్త భేదములను జయించి ఒకే కుటుంబముగా కూడుకొనునప్పుడు ఆయన పునరుత్థాన శక్తిని మనమెలా అనుభవించగలమో మనము చూచుచున్నాము. ప్రభువైన యేసుక్రీస్తు గెత్సెమనే తోటకు వెళ్ళకముందు ఇలా ప్రార్థించెను, "తండ్రీ, నీవు నాయందును నేను నీయందును ఉన్నలాగున వారందరును ఏకమైయుండవలెననియు, నీవు నన్ను పంపితివని లోకము నమ్మునట్లు, వారును మనయందు ఏకమైయుండవలెననియు వేడుకొనుచున్నాను" (John 17: 21). ఈ అధ్యాయమునందు ప్రభువైన యేసుక్రీస్తు యొక్క అత్యంత ప్రేరణాత్మకమైన ప్రార్థన వ్రాయబడియున్నది. విశ్వాసులమైన మనమధ్య నాలుగువిధములైన ఏకత్వము కొరకు ఆయన ప్రార్థించుచున్నాడు. మొదటిది, సంబంధమునందు ఏకత్వము; రెండవది, ప్రేమయందు ఏకత్వము; మూడవది, పరిపూర్ణతయందు ఏకత్వము; నాలుగవది, మహిమయందు ఏకత్వము. సకల జాతి, మత, సాంఘిక భేదములను మరచిపోయి మనము ఒకే కుటుంబముగా ఎంతగా కలిసిజీవించుదుమో అంతగా మన ప్రభువుకు మరింత సన్నిహితముగా చేరుకొనుదుము. అదేసమయమున, ప్రభువుకును ఒకరికొకరికిని మనకుగల సాన్నిహిత్యము, బలమైన విశ్వాసముతో ఆయన శక్తిని వినియోగించుకొనుటకు మనకు సహాయపడును. ఈ దినములలో విశ్వాసులు అల్పవిషయములపై విభజింపబడుటను మనము చూచుచున్నాము. ఇది అనేకులకు గొప్ప ఆధ్యాత్మిక నష్టమును కలుగజేసి, కొందరిలో దీర్ఘకాలిక శిశుస్థితికి దారితీయుచున్నది. విశ్వాసులు ప్రభువైన యేసుక్రీస్తు యొక్క శిరస్సత్వము క్రింద, ఒకరియెడల ఒకరు సహనముతోను, నిజమైన ప్రేమతో ఒకరికొకరు సేవచేయుచు, ఒకే కుటుంబముగా ఎక్కడ కూడుకొందురో అక్కడ ఎక్కువ ఆధ్యాత్మిక వృద్ధియు, దేవుని వాక్యము యొక్క లోతైన అవగాహనయు, ఆయన నిత్యమైన సన్నిధిని అనుభవించు సామర్థ్యమును మనము చూచుచున్నాము. తొలి క్రైస్తవులు ఒకే కుటుంబముగా కూడుకొనిన ప్రతిచోటను, ప్రభువు లోతుగాను స్వేచ్ఛగాను కార్యసాధన చేసెనని దేవుని వాక్యము ద్వారా మనము చూచుచున్నాము. గత 34 సంవత్సరములుగా, ముఖ్యముగా భారతదేశములోని వివిధ ప్రాంతములలో జరిగిన పరిశుద్ధ మహాసభల సమయమున, ఇదియే ఎల్లప్పుడును మా అనుభవముగా ఉండియున్నది. ఈ సహవాస సమయములలో ఎటువంటి పక్షపాతము లేకుండా అందరిని సమానముగా ఆహ్వానించి సేవించు భాగ్యము మాకు కలిగియున్నది.