ఎనిమిదవ దర్శనం

ప్రభువైన యేసుక్రీస్తు ఎనిమిదవసారి తోమాకు దర్శనమిచ్చెను. ఇది ఆయన పునరుత్థానము తరువాత ఎనిమిది దినములకు జరిగెను. ప్రభువు మొదటిసారి శిష్యులకు దర్శనమిచ్చినప్పుడు (John 20: 24). తోమా వారితోకూడ లేకుండెను. వారు అతనిని చూడగానే, "మేము ప్రభువును చూచితిమి" అని అతనితో చెప్పిరి (25వ వచనం). తోమా అవిశ్వాసముతో, "నేను ఆయన చేతులలో మేకుల గురుతును చూచి, ఆ మేకుల గురుతులో నా వ్రేలుంచి, నా చెయ్యి ఆయన ప్రక్కలో పెట్టనియెడల నమ్మనేనమ్మను" అని బదులుపలికెను. కావున, తోమా నిమిత్తము ప్రభువు మరల దర్శనమిచ్చి, అతడు ఇతరులతోకూడ ఉన్నప్పుడు అతనితో, "నీ వ్రేలిని ఇటు చాపి నా చేతులను చూడుము; నీ చెయ్యి చాపి నా ప్రక్కలో పెట్టుము; అవిశ్వాసివి కాక విశ్వాసివై యుండుము" అని చెప్పెను. తోమా, "నా ప్రభువా, నా దేవా" అని బదులుపలికెను. యేసు అతనితో, "తోమా, నీవు నన్ను చూచినందున నమ్మితివి; చూడకయే నమ్మినవారు ధన్యులు" అని చెప్పెను. ఈ విధముగా, ఆయన వాక్యమును సాధారణమైన శిశుసదృశ విశ్వాసముతో నమ్మి, మన ప్రాణసంబంధమైన తృప్తికొరకు మన సొంత భావములపైనగాని, సూచనలపైనగాని, కలలపైనగాని ఆధారపడనప్పుడే ఆయన పునరుత్థాన శక్తిని మనము అనుభవించగలమని మనము చూచుచున్నాము. అనేకమంది విశ్వాసులు ఆధ్యాత్మిక వృద్ధి కొరకును, దేవుని శక్తిని పొందుకొనుట కొరకును సూచనలపై ఆధారపడుదురు, ఫలితముగా వారు ఆధ్యాత్మికముగా బీడుగానే ఉండిపోవుదురు. ఆయన వాక్యమును చదువుచు, ప్రతివిషయమునందు ఏ ప్రశ్నయు వేయకుండా ఆయనకు విధేయులమగుచు, ఆయన వాగ్దానములను సాధారణ విశ్వాసముతో పట్టుకొనునప్పుడే ఆయన శక్తిని అనుభవించు భాగ్యము మనకు కలుగును.