ఏడవ దర్శనం

ఏడవది, ప్రభువు యాకోబుకు దర్శనమిచ్చెను. "తరువాత ఆయన యాకోబుకు కనబడెను" (1Cor. 15: 7). యాకోబు ప్రధాన అపొస్తలులలో ఒకడు, ఏదైనా సందేహము వచ్చినప్పుడు మిగిలినవారు అపొస్తలుల కార్యములలో మనము చదువునట్లు అతనిని సంప్రదించిరి. దూతచేత పేతురు చెరసాల నుండి విడిపింపబడినప్పుడు, అతడు మార్కు యింటి తలుపు కొట్టుచునేయుండెను, తలుపు తెరచినప్పుడు విశ్వాసులు అతనిని చూచి ఆశ్చర్యపడిరి. "అతడు చేతితో సైగచేసి, ఊరకుండుడని వారితో చెప్పి, ప్రభువు తనను చెరసాల నుండి ఏలాగు వెలుపలికి తీసికొనివచ్చెనో వారికి తెలియజేసెను. మరియు, ఈ సంగతులను యాకోబుకును సహోదరులకును తెలియజెప్పుడని చెప్పి, అతడు వెళ్లిపోయెను" (Acts 12: 17). యాకోబును గూర్చి మనము ఇంకను ఇలా చదువుతాము Acts 15: 13లో, "వారు ఊరకుండిన తరువాత యాకోబు, సహోదరులారా, నా మాట వినుడని చెప్పి, ఇట్లనెను." దేవుని వాక్యములోని ఈ రెండు ప్రస్తావనల వలన, సలహాయు, తుది తీర్పును అవసరమైన ఏ విషయమైనను యాకోబుకు నివేదింపబడెడిదని స్పష్టమగుచున్నది. ఈ కారణము చేతనే, భవిష్యత్తులో అతడు మోయవలసిన ఈ గొప్ప ఆధ్యాత్మిక బాధ్యతకు అతనిని సిద్ధపరచుటకు ప్రభువు అతనికి దర్శనమిచ్చెను. దేవుని మందిరమునందు అధిక బాధ్యతను మోయవలసిన వారికి ప్రభువు అదనపు బలమును, కృపను అనుగ్రహించుచున్నాడు. కాని అనేకమంది విశ్వాసులు కేవలము ఏదో పొందుకొనుటకే సమావేశములకు వెళ్ళుదురు, దేవుని మందిరమును కట్టుటలో తాము ఏ భాగము తీసికొనగలరో కనుగొనుటకంటే, సందేశము గూర్చియు, గానము గూర్చియు వారు మరింత శ్రద్ధ కలిగియుందురు. సువార్త వ్యాప్తియందును, ఆయన సంఘమును కట్టుటయందును ఆయన మహిమకొరకు ఇతరులకు సేవచేయుటకును, భారమైన బాధ్యతలను స్వీకరించుటకును మనము ఎంత సిద్ధముగానుందుమో, అంతగా పునరుత్థాన శక్తియొక్క ఈ కోణమును మనము సంపూర్ణముగా అనుభవించగలము. అందుకనే పౌలు ఇలా చెప్పుచున్నాడు, "ఆయనను తెలిసికొనుటయు, ఆయన పునరుత్థానశక్తిని తెలిసికొనుటయు నా భాగ్యమని యెంచి, నేను సమస్తమును నష్టముగా ఎంచుచున్నాను" (Phil. 3: 8,10). మరియు, "నన్ను బలపరచు క్రీస్తు ద్వారా నేను సమస్తమును చేయగలను" (ఫిలిప్పీయులు 4:13).