గొప్ప వాగ్దానాలు

అధ్యాయం XIII గొప్ప వాగ్దానాలు

చివరి అధ్యాయంలో, గొప్ప రక్షణ యొక్క మరో కోణాన్ని మనం చూస్తాము. ఐదవ వచనంలో, మనకొరకు ఒక వాగ్దానం ఉంది: “నిన్ను ఏమాత్రమును విడువను, నిన్ను ఎన్నడును ఎడబాయను.” మనం సంతృప్తిగల జీవితం జీవించి, అత్యాశపడనప్పుడు ఈ వాగ్దానం మన జీవితాలలో నెరవేరుతుంది. మనం మన హృదయాలను ప్రతి రకమైన లోభమునుండి విముక్తంగా ఉంచుకోవాలి. అప్పుడు ఆరవ వచనం ప్రకారం, మనం ఇలా ధైర్యంగా చెప్పగలుగుతాము, “ప్రభువు నాకు సహాయకుడు, నేను భయపడను, నరుడు నాకేమి చేయగలడు.”

13వ వచనంలో, “కావున వాని నింద భరించుచు, పాళెము వెలుపలికి ఆయనయొద్దకు వెళ్ళుదము” అని అపొస్తలుడు మనలను హెచ్చరిస్తున్నాడు. వేరుపాటు జీవితం జీవించడం ద్వారా ప్రభువు కొరకు నిందను భరించుటకు మనం సిద్ధంగా ఉండాలి. లోకసంబంధమైన స్నేహితులచేత, లోకసంబంధమైన సంపర్కములచేత మనం అపవిత్రపరచబడకూడదు. అప్పుడు మనకు ఆ పరలోక పట్టణం యొక్క ఒక దర్శనం ఇవ్వబడుతుంది.

మనలను ఆయన సంపూర్ణ చిత్తాన్ని జరిగించమని నేర్పించి, పరిపూర్ణతలోకి తీసుకురావడానికి ప్రభువు పూర్తి ఏర్పాటు చేశాడు. 20, 21 వచనములలో దేవుని సంపూర్ణ చిత్తాన్ని కనుగొనుటకు గల ఏడు రుజువులను మనం చూస్తాము. ఈ వచనములను మనం ఏడు భాగములుగా విభజించవచ్చు: (1) సమాధానకర్తయగు దేవుడు (2) మృతులలో నుండి తిరిగి తీసుకువచ్చిన (3) మన ప్రభువైన యేసును (4) ఆ గొఱ్ఱెలకు గొప్ప కాపరియైన (5) నిత్యమైన నిబంధన రక్తము ద్వారా (6) ఆయన చిత్తాన్ని జరిగించుటకు ప్రతి సత్కార్యములో మిమ్మును సిద్ధపరచుగాక (7) యేసుక్రీస్తు ద్వారా, ఆయనకే యుగయుగములు మహిమ కలుగును గాక. మన జీవితముల కొరకు దేవుని సంపూర్ణ చిత్తాన్ని కనుగొని జరిగించడం ద్వారా, మనం పిలువబడిన పరిపూర్ణతను మనం పొందగలము. ఈ అంశముల గురించి కొంచెం చూద్దాము: (1) మన దేవుడు సమాధానకర్తయగు దేవుడు. దేవుడు ఏ విషయాన్ని గురించి మాట్లాడినా అక్కడ ఎడతెగని, గుణించబడుతున్న, నిత్యమైన, పరలోక సమాధానం ఉంటుంది Isa. 32: 17). ప్రభువైన యేసుక్రీస్తు తన పునరుత్థానము తరువాత తన శిష్యులకు కనబడినప్పుడు, ఆయన మొదటి మాటలు “మీకు సమాధానము కలుగునుగాక” అనేవి. యోహాను 20:19,21లో ఆయన అదే మాటలను రెండుసార్లు చెప్పాడు. Mark 4:39 ఆయన అదే మాటలతో గాలిని, సముద్రాన్ని గద్దించాడు, “ఊరకుండుము, జలము కదలకుండుము.” ప్రభువు మాట్లాడినప్పుడు, సమాధానం ఉంటుంది; ప్రతి తుఫాను శాంతింపజేయబడుతుంది.

2. “మృతులలో నుండి తిరిగి తీసుకువచ్చిన” అనే మాటలు పునరుత్థాన శక్తిని సూచిస్తాయి. మన స్వంత బలంతో మనం దేవుని చిత్తాన్ని జరిగించలేము. అపొస్తలులు తమ పరిచర్యలో పునరుత్థాన శక్తిని అనుభవించారు (Acts 2:24; 3:26; 4:10,33; 5:30). వారు ప్రభువైన యేసు పునరుత్థానమును చాలా ధైర్యంగా ప్రకటించగలిగారు. మనం దేవుని సంపూర్ణ చిత్తంలో ఉన్నప్పుడు, ఆయనకు విధేయత చూపుటకు మనం ఆయన పునరుత్థాన శక్తిని పొందుతాము.

3. ఆయన చిత్తాన్ని జరిగించడం ద్వారా మనం మన ప్రభువైన యేసు యొక్క ప్రభుత్వం క్రిందకు తీసుకురాబడతాము. మనం నిరంతరం ఆయన ప్రభుత్వం, రాజత్వం క్రింద ఉంచబడి, ఆయన చిత్తాన్ని జరిగించుటకు సిద్ధంగా ఉంటాము. మన ప్రభువుగా, రాజుగా ఆయనచేత మనం ఏలబడతాము, నియంత్రింపబడతాము.

4. ప్రభువైన యేసుక్రీస్తు గొఱ్ఱెలకు గొప్ప కాపరి. మన గొప్ప కాపరిగా, ఆయన చిత్తాన్ని ధృవీకరించుటకు ఆయన మనలను అనేక లేఖన భాగములవైపు నడిపిస్తాడు (Psa. 23:12). మంచి కాపరి మనం ఆత్మీయంగా ఆశీర్వదింపబడగల స్థలములకు మనలను నడిపిస్తాడు. మనం దేవుని చిత్తంలో ఉన్నప్పుడు, మనం ఆత్మీయంగా సంతృప్తి చెందుతాము. ఆయన మనలను పచ్చిక బయళ్ళకు, నిమ్మళమైన జలములకు నడిపిస్తాడు, ఆయనే స్వయంగా మన సంతృప్తి అవుతాడు.

5. మనలను శుద్ధంగా ఉంచి, అతిపరిశుద్ధస్థలములోనికి ధైర్యాన్ని ఇచ్చుటకు ప్రభువు యొక్క నిత్యమైన నిబంధన రక్తమును మనం క్లెయిమ్ చేసుకోగలము.

6. మనం ప్రభువు చిత్తంలో ఉన్నప్పుడు, ప్రతి సత్కార్యం చేయుటలో మనం పరిపూర్ణులముగా చేయబడతాము. దేవుని చిత్తంలో ఉన్నామనుటకు ఆరవ రుజువు, ప్రతి చిన్న విషయంలో కూడా ఆయన చిత్తాన్ని జరిగించాలనే కోరిక మనకు కలుగుతుంది. ప్రతి అడుగులోనూ ప్రభువుచేత ఏలబడాలని మనం కోరుకుంటాము “నరుని నడతలు యెహోవాచేత స్థిరపరచబడును” (కీర్త. 37:23). మన అడుగులన్నీ ప్రభువుచేత నియంత్రింపబడి, ఏలబడతాయి. “నీ స్వాంతంత్రియుమీద ఆనుకొనక నీ పూర్ణహృదయముతో యెహోవాయందు నమ్మకముంచుము” (Prov. 3:3). మన అన్ని మార్గములలో ఆయనచేత ఏలబడాలని కోరుకుంటాము, తద్వారా ఆయన చిత్తాన్ని జరిగించుటకు ప్రతి సత్కార్యంలో పరిపూర్ణులముగా అవుతాము.

7. చివరిగా, దేవుని చిత్తాన్ని జరిగించడం ద్వారా ఆయన నామం గొప్పగా ఘనపరచబడాలి. మనం ఆయన చిత్తాన్ని జరిగించునప్పుడు, మన ప్రభువుకు మహిమను తీసుకురావాలనే కోరిక మనకు ఉండాలి. ప్రభువు చిత్తాన్ని తెలుసుకొనుటకు మనకు ఇవ్వబడిన ఏడు రుజువులు ఇవే.

“మీ మీద అధికారము గలవారికి విధేయులై, లోబడియుండుడి; వారు లెక్క ఒప్పజెప్పవలసినవారివలె మీ ఆత్మల విషయమై జాగ్రత్తగా ఉన్నారు; వారు దుఃఖముతో గాక సంతోషముతో ఆ లెక్క ఒప్పజెప్పునట్లు చేయుడి; లేనియెడల మీకు నష్టకరమగును” (Heb. 13:17). మనకు బోధించి, మనలను నడిపించువారికి లోబడియుండు ప్రత్యేకత మనకు ఉంది. మన భద్రత, రక్షణ కొరకు, మనలను కాయువారికి, నడిపించువారికి, బోధించువారికి మనం లోబడాలని దేవుడు నియమించాడు. దీనికి లోబడుట, విధేయత అవసరం. దేవుని సేవకులకు విధేయత చూపడం ద్వారా మనం శత్రువు దాడులనుండి రక్షింపబడతాము.

మన రక్షణ యొక్క గొప్పతనమును చూచుటకు ప్రభువు మన కళ్ళను తెరచి, దాని ప్రయోజనములన్నింటినీ ప్రతిదినం అనుభవించుటకు మనలను శక్తివంతులను చేసి, పరిపూర్ణత వైపు మనలను నడిపించుగాక.