పరిచయం

మనిషి జన్మతః పాపి. రాజైన దావీదు ఇలా అంటున్నాడు, “ఇదిగో, నేను దోషములో పుట్టితిని, పాపములోనే నా తల్లి నన్ను గర్భము ధరించెను” (Psalm 51: 5). ఇది ప్రతి మనిషికీ వర్తిస్తుంది. అందుకే మనిషి తలంపులు, మాటలు, క్రియలు ఎల్లప్పుడూ పాపభరితంగా ఉంటాయి. “మనుష్యుల చెడుతనము భూమిమీద గొప్పదనియు, వారి హృదయము యొక్క తలంపులలోని ఊహ అంతయు నిత్యము కేవలము చెడ్డదనియు యెహోవా చూచెను” (Genesis 6:5). దేవుడు పరిశుద్ధుడు, నీతిమంతుడు గనుక, ఆయన నీతి ఇలా కోరుతుంది, “పాపము చేయు ప్రాణము చనిపోవును” (Ezekiel 18:4). ఇది శరీర మరణం కాదు, కానీ ఇది రెండవ మరణం, అనగా ప్రేమగల సృష్టికర్త నుండి నిత్య వేర్పాటు, నరకాగ్నిలో బాధ. కానీ దేవుడు ప్రేమగల తండ్రిగా మానవజాతి రెండవ మరణానికి పోవాలని కోరుకోలేదు. వారిని రెండవ మరణం నుండి రక్షించాలని ఆయన కోరుకున్నాడు. ఆయన ప్రభువైన యేసుక్రీస్తు రూపంలో ఈ భూమికి దిగివచ్చి, గత, వర్తమాన, భవిష్యత్తు మానవజాతి యావత్తు పాపాలకు రావలసిన శిక్షను తనపై వేసుకున్నాడు. ఆయన ఈ భూమిపై నిష్కళంకమైన జీవితం జీవించి, ప్రజల పాపాలకు విమోచన క్రయధనంగా కల్వరి సిలువపై తన ప్రాణాన్ని అర్పించాడు. ఆయన మరణించి సమాధి చేయబడ్డాడు. మూడవ దినమున ఆయన సమాధి నుండి తిరిగి లేచి, మరణాన్ని జయించాడు. తన వద్దకు వినయంతో వచ్చి తమ పాపాలను ఒప్పుకొనువారి పాపాలను క్షమించడానికి, పాప భయంకర పరిణామాల నుండి, అనగా జీవముగల దేవుని నుండి నిత్య వేర్పాటు నుండి వారిని రక్షించడానికి ఆయన ఇప్పుడు సజీవుడై ఉన్నాడు. “ఏలయనగా మనము శత్రువులమై యుండగా ఆయన కుమారుని మరణము ద్వారా దేవునితో సమాధానపరచబడిన యెడల, సమాధానపరచబడినవారమై మరి నిశ్చయముగా ఆయన జీవించుటచేత రక్షింపబడుదుము’ (Romans 5:10). ప్రభువైన యేసుక్రీస్తు తనయందు విశ్వసించువారందరికీ అనుగ్రహించే రక్షణ కేవలం రెండవ మరణం నుండి విడుదల మాత్రమే కాదు, దానితోపాటు ఇంకా చాలా ఎక్కువ. ఎందుకంటే దేవుడు ఇచ్చేటప్పుడు సమృద్ధిగా ఇస్తాడు. హెబ్రీయులకు వ్రాసిన పత్రికను అధ్యయనం చేయడం ద్వారా మనం ఈ గొప్ప రక్షణ గురించి కొన్ని సంగతులను తెలుసుకోగలము.

అధ్యాయం I