ఈ పుస్తకములో వెతకండి
దేవుని సన్నిధి సాధనకు మనము బాగుగా అలవాటు పడినయెడల, సమస్త శరీర వ్యాధులు దానివలన మిక్కిలి తగ్గును. మన ఆత్మలను శుద్ధపరచుటకును ఆయనతో నిలుచునట్లు మనలను బలవంతపెట్టుటకును కొంచెము శ్రమపడనిచ్చుటకు దేవుడు తరచుగా సమ్మతించును.
ధైర్యము తెచ్చుకొనుడి: మీ నొప్పులను నిరంతరము ఆయనకు అర్పించుడి: వాటిని సహించుటకు శక్తి కొరకు ఆయనను ప్రార్థించుడి. సమస్తమునకు మించి, దేవునితో తరచుగా సంభాషించు అలవాటు పొందుడి, కుదిరినంత తక్కువగా ఆయనను మరువుడి. మీ బలహీనతలలో ఆయనను ఆరాధించుడి, అప్పుడప్పుడు మిమ్మును ఆయనకు అర్పించుకొనుడి, మీ శ్రమల తీవ్రతలో సాత్వికముగాను ప్రేమతోను (శిశువు తన తండ్రిని వేడుకొనునట్లు) ఆయన పరిశుద్ధ చిత్తమునకు మిమ్మును అనుగుణులను చేయుమని వేడుకొనుడి. నా దీనమైన ప్రార్థనలతో మీకు సహాయపడుటకు ప్రయత్నించెదను.
దేవుడు మనలను తనయొద్దకు ఆకర్షించుటకు అనేక మార్గములు కలిగి యున్నాడు. కొన్నిసార్లు మన నుండి తనను దాచుకొనును, అయితే అవసర కాలములో మనలను విడువని విశ్వాసము మాత్రమే మన ఆధారమును మన నమ్మకమునకు పునాదియు అగువలెను; ఆ నమ్మకము సమస్తము దేవునియందే ఉండవలెను.
దేవుడు నన్ను ఎట్లు నిర్ణయించునో నాకు తెలియదు. నేను ఎల్లప్పుడు ధన్యుడను. లోకమంతయు శ్రమపడుచున్నది; అతి కఠినమైన శిక్షకు అర్హుడనైన నేను అంత నిరంతరమైన అంత గొప్ప ఆనందములు అనుభవించుచున్నాను గనుక వాటిని అదుపులో ఉంచుకొనలేను.
మీ శ్రమలలో కొంత భాగము దేవునియొద్ద అడుగగోరుదును, అయితే నా బలహీనతను ఎరుగుదును; అది అంత గొప్పది గనుక ఆయన ఒక్క క్షణము నన్ను నాకే విడిచినయెడల జీవించువారిలో అతి దీనుడనగుదును. అయినను ఆయన నన్ను ఒంటరిగా ఎట్లు విడువగలడో నాకు తెలియదు, ఎందుకనగా మనము ముందు ఆయనను విడువనంతవరకు ఆయన మనలను విడువడని ఇంద్రియము ఇచ్చు నిశ్చయతంత బలమైన నిశ్చయతను విశ్వాసము నాకు ఇచ్చును. ఆయనను విడుచుటకు భయపడుదము. ఎల్లప్పుడు ఆయనతో ఉందము. ఆయన సన్నిధిలో జీవించి చనిపోదము. నేను మీకొరకు ప్రార్థించునట్లు మీరు నాకొరకు ప్రార్థించుడు.
మీవాడను, మొదలగు.