సిలువ – సంపూర్ణమైన కార్యం

"ఇవి ఉపమానరీతిగా చెప్పబడినవి; ఇవి రెండు నిబంధనలు; ఒకటి సీనాయి కొండనుండి పుట్టి దాస్యమునకు పిల్లలను కనునది; అది హాగరు.

ఏలయనగా ఈ హాగరు అరేబియా దేశములోని సీనాయి కొండయే; అది యిప్పటి యెరూషలేమునకు సరిపడియున్నది; ఏలయనగా అది తన పిల్లలతో దాస్యములోనున్నది. అయితే పైనున్న యెరూషలేము స్వతంత్రమైనది, అది మనకందరికి తల్లి.

ఏలయనగా, "ఓ వ్యంధ్యురాలా, ప్రసవించనిదానా, సంతోషించుము; ప్రసవవేదననొందని దానా, ఆర్భటించి కేకలువేయుము; పెనిమిటిగలదానికంటె ఒంటిగా నుండుదానికి ఎక్కువ మంది పిల్లలు కలుగుదురు" అని వ్రాయబడియున్నది. సహోదరులారా, మీరైతే ఇస్సాకువలె వాగ్దానసంబంధమైన పిల్లలై యున్నారు. అయితే శరీరానుసారముగా పుట్టినవాడు ఆత్మానుసారముగా పుట్టినవానిని ఆ కాలమునందు హింసించినట్టు ఇప్పుడును జరుగుచున్నది. అయినను లేఖనము ఏమి చెప్పుచున్నది? "దాసిని ఆమె కుమారుని వెళ్ళగొట్టుము; ఏలయనగా దాసి కుమారుడు స్వతంత్రురాలి కుమారునితోకూడ వారసుడు కానేరడు." కాబట్టి సహోదరులారా, మనము దాసి పిల్లలము కాము గాని స్వతంత్రురాలి పిల్లలము. గలతీయులకు 4:24-31.

సీనాయి కొండ మీద ఇవ్వబడిన ధర్మశాస్త్రం దాస్యాన్ని, బానిసత్వాన్ని తెచ్చింది, మనుష్యులు అపరాధులయ్యారు; కానీ ఇప్పుడు మనం కొత్త నిబంధన కిందికి వచ్చాము. ఇష్మాయేలు అబ్రాహాము కుమారుడైనప్పటికీ, అతడు, అతని తల్లి హాగరు ఇద్దరూ వెళ్ళగొట్టబడ్డారు, దేవుడు అబ్రాహాముకు ఇచ్చిన వాగ్దానంలో ఇద్దరికీ భాగం లేకుండా పోయింది. అదే విధంగా, సున్నతి, సబ్బాతు లేదా మనుష్యుని ప్రయత్నం ద్వారా న్యాయవంతులు, నీతిమంతులు అవ్వాలని ప్రయత్నించే దాస్యంలో ఉన్న వారందరూ వెళ్ళగొట్టబడతారు.

రోమన్ కాథలిక్కులు ప్రభువైన యేసుక్రీస్తు సంపూర్ణమైన కార్యాన్ని విశ్వసించడానికి బదులుగా, ఆదివారం ఉదయాలు లేదా వారంలో యాజకులు జరిపించే మాస్‌లలో పాల్గొనడం ద్వారా నీతిమంతులు కావాలని కోరుకుంటారు. రోమన్ కాథలిక్కుల్లాగే ఈ సెవెన్త్ డే అడ్వెంటిస్టులు కూడా వెళ్ళగొట్టబడతారు, దేవుని వారసత్వంలో వారికి ఏ మాత్రం భాగం ఉండదు, ఎందుకంటే వారు దాస్యం కిందికి రావడానికి ఇష్టపడతారు. దేవుడు వారికి రక్షణ ఇచ్చాడు, మన ప్రభువైన యేసుక్రీస్తు సిలువ మీద "సమాప్తమైనది" అని చెప్పినప్పుడు రక్షణ కార్యాన్ని పూర్తి చేశాడు. కానీ సెవెన్త్ డే అడ్వెంటిస్టులు రక్షణకు మరేదో జోడించడానికి ప్రయత్నిస్తూ, "లేదు ప్రభూ, అది సమాప్తం కాలేదు, మేము సెవెన్త్ డే అడ్వెంటిస్టులం ప్రభూ! రక్షణకు సబ్బాతును జోడించాలి" అని అంటున్నారు.

మీరు ఒక అందమైన భవనాన్ని కట్టి పూర్తి చేశారని అనుకోండి, ఎవరో అది పూర్తికాలేదని అంటారు. అప్పుడు అతడు ఒక మట్టికుండ ముక్కను తీసుకుని, దానిపై బొగ్గు తారు పూసి, ఏవో వికారమైన బొమ్మలు గీసి, భవనాన్ని పూర్తి చేయడానికి దానిపై ముద్రవేస్తే: మీకెలా అనిపిస్తుంది? ఈ సెవెన్త్ డే అడ్వెంటిస్టులు రక్షణ కార్యానికి జోడించడానికి ప్రయత్నించే విధానం అదే. పాపమెరుగని మన ప్రభువైన యేసుక్రీస్తు మన కోసం పాపంగా చేయబడ్డాడు. ఆయన మన పాపాలకు పూర్తి శిక్షను చెల్లించాడు, శాపాన్ని భరించి, మన కోసం సిలువపై చనిపోయినప్పుడు మనకోసం శాపంగా మారాడు. అందుకే మనం అంతా సమాప్తమైందని చెబుతాము, ఇప్పుడు మనం దానిని విశ్వసించి విశ్వాసం ద్వారా స్వీకరించాలి.