వినడమే విధేయత

వినడమే విధేయత

దేవుని ప్రజలందరును దేవుని స్వరమును వినగలరు. దేవుడు మాట్లాడును, ప్రభువైన యేసుక్రీస్తును అనుభవపూర్వకముగా ఎరిగినవారు తమ సమస్యలకొరకును, తమ అవసరతలకు తగినట్లుగాను ప్రతిదినము ఆయన స్వరమును వినగలిగియుండవలెను. ఆయన ప్రేమగల దేవుడు, మనము ఆయనను మన వ్యక్తిగత రక్షకునిగా అంగీకరించియుంటే, మనము ఆయన స్వరమును వినగలము, John 10:27ప్రకారము. కాని మనము ఆయన స్వరమును మన ఆత్మలో మాత్రమే వినగలము, శరీరములో కాదు. మనుష్యులు తమ సాధారణ వినికిడితో దేవుని స్వరమును వినుటకు ప్రయత్నింతురు, కాని అట్లు చేయుటవలన ప్రయోజనము లేదు, అయినను నా భౌతిక చెవులతో నేను దేవుని స్వరమును విన్న కొన్ని సందర్భములు ఉన్నవి. అయినను, మనము ప్రతిదినము, రోజులో అనేకసార్లు మన ఆత్మలో ఆయన స్వరమును వినగలము.

మనకు ఆత్మయు, ప్రాణమును, శరీరమును కలవు (Gen. 2:7). దేవుడు మనుష్యుని సృజించినప్పుడు, ఆయన తన స్వంత ఆత్మను అతనిలో ఊదెను. ఎముకలు, రక్తము, కండరములు శరీరమును కలుగజేయును; బుద్ధి, భావోద్వేగము, సంకల్పశక్తి ప్రాణమును కలుగజేయును; మనస్సాక్షి, అంతర్ప్రజ్ఞ, ఆరాధన ఆత్మయొక్క సామర్థ్యములు. ఇవి మనుష్యుని మూడు ప్రధాన భాగములు: శరీరము, ప్రాణము, ఆత్మ. పాపమువలన మన శరీరమునందేగాక మన ఆత్మయందు కూడా మరణము ప్రవేశించును. మన దేవునికి విరుద్ధముగా మనము చేయు ప్రతి తలంపును, మాటను, క్రియను, మన మనస్సాక్షిని చంపివేయుటద్వారా చేయుదుము. నేను అబద్ధమాడగోరుకుంటే, నా మనస్సాక్షి నన్ను గుచ్చును, కావున అబద్ధమాడుటకు నేను నా మనస్సాక్షిని చంపవలెను. తెలియకయే మన తలంపులద్వారా, మాటలద్వారా, క్రియలద్వారా మన ఆత్మలలోనికి మరణమును తీసికొనివత్తుము. ఈ విధముగా పాపులముగా మనకు మృతమైన ఆత్మయు, చీకటిమయమైన ప్రాణమును, అపవిత్రమైన శరీరమును కలవు. దేవుని స్వరమును వినుటకు మనము అసమర్థులము దేవుని స్వరమును వినుటకుగాని, ఆయన సన్నిధిని అనుభవించుటకుగాని, మన మృతమైన ఆత్మ కారణముగా ఆయనను తాకుటకుగాని అసమర్థులము.

ఏలీ అను దేవుని మనుష్యుడొకడు ఉండెను. పాపము కారణముగా అతడు ఆత్మీయముగా మృతుడాయెను. దేవుడు రాత్రియందు బాలుడైన సమూయేలుతో మాట్లాడెను. సమూయేలు దేవుని స్వరమును వినెను, కాని వృద్ధుడైన యాజకుడు ఏలీ తన ఆత్మీయ చెవుడు కారణముగా ఆయనను వినలేకపోయెను. అటులనే మనకందరకును మృతమైన ఆత్మయు, కమిలిన మనస్సాక్షియు కలవు. దేవుని ఎట్లు ఆరాధించవలెనో మనకు తెలియదు, ఆయనను మనము ఎరుగము. దేవుని గాని ఆయన కదలికలను గాని మనము తెలిసికొనజాలము. మనకు చీకటిమయమైన ప్రాణము కూడా కలదు, అందుచేత మనము మన బుద్ధిని దుర్వినియోగము చేసి, మన జ్ఞానమునందు గర్విష్ఠులముగా, అహంకారులముగా, ఉబ్బిపోయినవారముగా అగుదుము. మన భావోద్వేగములను గూర్చి గొప్పలు చెప్పుకొని, మన సంకల్పములయందు మొండిగా అగుదుము, అప్పుడు మన శరీరము అపవిత్రమగును. మీ ముఖము అందముగా ఉన్ననూ, దానిపై ద్వేషముయొక్క, దురాశయొక్క, వేషధారణయొక్క గురుతులను ఇతరులు చూడగలరు.

యేసుక్రీస్తు జీవమును మనము మరల మనలోనికి పొందుకొన్నప్పుడు, మనము త్రివిధమైన మార్పును పొందుదుము. దేవుని ప్రేమను ఆత్మలోనికి మాత్రమే కుమ్మరింపవచ్చును. దానిని నా ఎముకలలోగాని, రక్తములోగాని, కండరములలోగాని పెట్టలేము. దేవుడు ఆత్మ, ఆ పవిత్రజీవము నా ఆత్మలోనికి రాకముందు దేవుడు నన్ను సంపూర్ణముగా శుద్ధిచేసి, పవిత్రపరచవలెను. మన శుద్ధికొరకు మనము విశ్వాసముద్వారా ఆయన అమూల్యరక్తమును హక్కుగా పొందుదుము, ఏలయనగా ఆయన రక్తమునందు మాత్రమే నిత్యజీవముండును. మన రక్తమునందు భౌతిక జీవముండును. మన హృదయము కొట్టుకొనుచున్నంతకాలము మాత్రమే మనము జీవించగలము.

పక్షవాతమునందు, హృదయము కొట్టుకొనుచుండినను, శరీరములోని ఆ భాగమునందు కదలిక ఉండదు. కొందరు యుద్ధగాయస్థులు తమ శరీరముయొక్క అనేక భాగములను ఒకేసారి కోల్పోయియు జీవించుచున్నారు. దేవుడు చాలాకాలము క్రితమే Lev. 17:11లో, ‘శరీరముయొక్క జీవము రక్తమునందున్నది’ అని ప్రకటించెను. ప్రభువైన యేసుక్రీస్తు పాపము చేయలేదు, ఆయన పరిశుద్ధాత్మవలన గర్భములో ధరింపబడినందున సంపూర్ణముగా పరిశుద్ధుడైయుండెను, మరియు ఆయన తన శత్రువులను, “నాయందు పాపమున్నదని మీలో ఎవడు రుజువుపరచును?” అని సవాలు చేయగలిగెను (John 8:46). ఎవడును ఆ సవాలును స్వీకరించుటకు తెగింపలేదు. అందుకనే ఆయన రక్తము మనకొరకు నిత్యజీవమును సంపాదించెను, మరియు అది కుళ్ళుపట్టుటను కూడా చూడలేదు (Ps. 16:10).

). ఒక వ్యక్తి మరణించినప్పుడు, ఆ క్షణమే అతని శరీరము శిథిలమగుటకు ప్రారంభమగును, కావున మనుష్యులు శరీరమును మంచి స్థితిలో ఉంచుటకు మంచును లేదా సుగంధద్రవ్యములను వాడుదురు. కాని మన ప్రభువుయొక్క శరీరము కుళ్ళుపట్టుటను చూడలేదు, మరియు అదే శరీరములో ఆయన తిరిగి లేచెను. “నా శరీరమును తినువాడును, నా రక్తమును త్రాగువాడును నిత్యజీవము కలిగియుండును.” ఆ సత్యమును మనము విశ్వాసముద్వారా పొందుకొందుము, ఏలయనగా ఆయన రక్తముద్వారా మనము శుద్ధిచేయబడి, ఆయన నిత్యజీవముతో నింపబడుదుము, అప్పుడు మాత్రమే మనము దేవుని సన్నిధిని అనుభవింపగలము.

ఈ విధముగా మనము మృతమైన ఆత్మనుండి, చీకటిమయమైన ప్రాణమునుండి, అపవిత్రమైన శరీరమునుండి, జీవముపొందిన ఆత్మకును, వెలుగుపొందిన ప్రాణమునకును, శుద్ధిచేయబడిన శరీరమునకును త్రివిధమైన మార్పును పొందుదుము. మనుష్యుని ఆత్మలోని మార్పును మనము చూడజాలకపోయిననూ, అతడు ఈ నూతనజీవమును పొందుకొన్నప్పుడు దానిని అతని ముఖమునందు మనము చూడగలము.

ఒక వ్యక్తి నలుపు రంగుతోను, అందవిహీనుడుగాను, మందపాటి పెదవులతోను ఉండవచ్చును, కాని దేవుని జీవము అతనిలోనికి వచ్చినప్పుడు అతని ముఖము మనోహరముగాను ఆకర్షణీయముగాను అగును. ఈ నూతనజీవమును పొందుకొన్నవారియందు ఆకర్షణయు అందమును ఉండును, భౌతికమైన లేదా కృత్రిమమైన సాధనములద్వారాగాని విద్యద్వారాగాని రాని ఒక మనోహరత్వము. లోకసంబంధులు ఖరీదైన వస్త్రములను, ఆభరణములను ధరించి తమను తాము అలంకరించుకొనుటకు లోకసంబంధమైన మార్గములను అవలంబింపగలరు. తాము అందముగా కనబడుచున్నామని వారు తలంతురు, కాని పొరుగువారిని వారిని గూర్చి ఏమనుకొందురని అడిగినయెడల, వారు బహిరంగముగా జవాబియ్యకపోవచ్చును, కాని వారిని వ్యర్థులుగా, గర్విష్ఠులుగా, అందవిహీనులుగా, వేషధారులుగా తలంతురని మనము గ్రహింపగలము. ఇది నిజము కాదా? కాని దేవుడు వేరొక వర్ణమును, అందమును ఇచ్చును, మరియు ఆ మహిమకొరకు మనకు లోకసంబంధమైన సంపదలు అక్కరలేదు.

దేవుని ఆత్మ మనలో నివసించునప్పుడు, ఈ నూతనజీవమునందు శరీరము, ప్రాణము, ఆత్మ అనువాటియందు అనుపాతరీతిగా జరుగుచున్న కార్యమును మనము కనుగొందుము. అప్పుడు మనము ఆయన స్వరమును ప్రతిదినము వినగలము, అది, “ఇది మార్గము, దీనిలో నడువుము, నా కుమారుడా, జాగ్రత్తగా ఉండుము, జాగ్రత్త వహింపుము. నా బిడ్డా, నాయొద్దకు రమ్ము, నేను నీకు ఏదో చూపనిమ్ము: నీకు ఏదో బోధింపనిమ్ము” అని చెప్పును. కొన్నిసార్లు మనము గాఢనిద్రలో ఉన్నప్పుడు, ఏదో స్వరము మనలను పిలిచినట్లు అకస్మాత్తుగా మెలకువ వచ్చును. ఇది నా అనుభవములో అనేకసార్లు జరిగినది. నేను గాఢనిద్రలో ఉండగా, ఎవరో నా పేరు పెట్టి స్పష్టముగా నన్ను పిలుచుటను నేను వినియుంటిని. మెలకువ వచ్చినప్పుడు అక్కడ ఎవరును లేకుండుటను నేను చూచితిని. మొదట అది కలయో లేక నా ఊహయోయని నేను తలంచితిని. నేను మరల నిద్రించినప్పుడు, మరల ఆ స్వరమును విని మెలకువ వచ్చితిని. కొన్నిసార్లు ఇది మూడు మారులు జరిగెడిది, తరువాత, “నా బిడ్డా, లేచిరా, నేను నీతో మాట్లాడగోరుచున్నాను” అని ఒక స్వరము వచ్చెడిది. మనకొరకును మన పొరుగువారికొరకును మన అవసరతకు తగినట్లు ప్రతిదినము దేవుని వాక్యమును పొందుకొనుట ఎంతటి భాగ్యము, ఎంతటి గౌరవము!

ప్రభువైన యేసు నా జీవితములోనికి రాకముందు నేను నాస్తికుడనైయుంటిని. “దేవుడు లేడు!” అని నేను చెప్పుచుంటిని. దేవునియందు నమ్మకముంచినవారిని నేను ఎగతాళి చేయుచుంటిని. 1929వ సంవత్సరము డిసెంబరు 16వ తేదీన, “నా కుమారుడా, నీ పాపములు నీకు క్షమింపబడియున్నవి” అని దేవుని స్వరమును నేను ఒకనాడు స్పష్టముగా వింటిని. ఆ విధముగా దేవునితో నా నడక ప్రారంభమాయెను. దేవుని జీవము నాలోనికి వచ్చెను, అది జరిగినప్పుడు నేను ఆత్మ, ప్రాణము, శరీరముల త్రివిధమైన మార్పును పొందితిని. నాకు జీవముపొందిన ఆత్మయు, వెలుగుపొందిన ప్రాణమును, శుద్ధిచేయబడిన శరీరమును ఇయ్యబడెను. దాని తరువాత వెంటనే 1930వ సంవత్సరము జనవరి మాసమున ఆదికాండము చదవనారంభించితిని. అదే అధ్యాయమునందు మరల మరల ఈ మాటలను కనుగొంటిని: ‘దేవుడు చెప్పెను,’ ‘దేవుడు చెప్పెను.’ ఈ మాటలు 500 మారులు పునరావృతమగుటను నేను కనుగొంటిని, ఈ భాగమే నాకు ఆశీర్వాదమాయెను: ‘దేవుడు మాటలాడును, దేవుడు మాటలాడును.’ కావున నేను, “ఓ దేవా, నాతో మాటలాడుము, నీ స్వరమును నేను వినగోరుచున్నాను. వేరొక అనుభవముకొరకు నాకు ఏ ఆకాంక్షయు లేదు. నీవు నాతో మాటలాడి, నీ మార్గమును ప్రతిదినము నాకు చూపవలెననునదియే నా ఆత్మ ఆరాటము” అని చెప్పితిని. నేను శిశువువలె నమ్మితిని. దేవుడు తప్పక మాటలాడవలెననెడి ఈ పాఠమును నేర్చుకొనుటకు కొంత సమయము పట్టిననూ, ఆయన నిజమైనప్పుడు ఆయన మాటలాడుననునది వాస్తవముగానే ఉండును. ప్రతిదినము ఆయన స్వరమును నేను వినసాగిన దినము ఒకటి వచ్చెను.

అందుకనే మీరు కూడా ఆయన స్వరమును విని, ఆయన బోధింపగోరు పాఠములను నేర్చుకొనవలెనని నేను కోరుకుంటున్నాను.

ఇప్పుడు మనము ఆయన స్వరమును వినుటకు రెండవ మార్గమును చూతుము. మొదట, క్రీస్తు బాప్తిస్మము పొందిన సమయమున ఆకాశము ఎట్లు తెరవబడెనో మనము చూచితిమి. దేవుని స్వరమును విన్నప్పుడు సౌలు పౌలుగా మారెను (Acts 9:3). అతడు దైవికకాంతిని చూచెను — సూర్యకాంతిని కాదు. అది అకస్మాత్తుగా అతని చుట్టును మిక్కిలి ప్రకాశవంతముగా ప్రకాశింపనారంభించెను. అతడు ఆ కాంతిని చూచినప్పుడు కిందపడెను. సౌలు చూచిన అటువంటి కాంతిని మీరు చూడకపోవచ్చును. కాని అదే కాంతి కనబడకనే మనమందరిలోనికి ప్రవేశింపగలదు.

ఇప్పుడు వారు ఎక్స్‌రే ఫోటో తీసినప్పుడు మీరు ఆ కిరణములను చూడజాలరు. సాధారణ ఫోటోలకు, సూర్యకాంతిగాని మరేదైనా కాంతిగాని ఉండవలెను. కాని ఆసుపత్రిలో మీ ఫోటో తీసినప్పుడు, వారు మిమ్మును చీకటిగదిలోనికి తీసికొనిపోదురు. కాంతి వచ్చునని మీరు తలంతురు కాని మీకు కేవలము ఒక చప్పుడు మాత్రమే వినబడును. మీరు ఇంటికి వెళ్ళి మీ ఫోటో చూపబడును. ఏమి జరిగినది? చీకటిలో వారు మీ లోపలిభాగమును ఎట్లు చూడగలిగిరో మీకు ఆశ్చర్యము కలుగును, మరుసటిదినము వైద్యుడు, “మిస్టర్ ఎం, ఈ ఫోటోలో మీ ఊపిరితిత్తులను చూడుడి” అని చెప్పునప్పుడు; ఏలయనగా బాహ్యముగా దీనిని మీరు చూడజాలరు. దైవికకాంతి కూడా అదే విధముగా మనలోనికి వచ్చును.

ప్రభువైన యేసుక్రీస్తుకు అనేక పేర్లు ఇయ్యబడియున్నవి John 8:12లో. ఆయన లోకమునకు వెలుగు, మన అంతరంగస్థితిని చూపుటకు దైవికవెలుగు ఆయనయే. బాహ్యముగా చూడలేనిదానిని దైవికవెలుగుద్వారా చూడగలము. అత్యంత అనుభవజ్ఞులైన వైద్యులు కూడా మిమ్మును చూచుటద్వారా మీ అంతరంగస్థితిని చూడజాలరు. వారు ఎక్స్‌రే ఫోటో తీసినప్పుడు మాత్రమే దానిని కనుగొనగలరు.

అదేవిధముగా దైవికవెలుగు మనలోనికి వచ్చును, మరియు అనేక సంవత్సరములు దాచబడియున్న పాపములు ఇప్పుడు వెలుగులోనికి వచ్చును. నాకు అట్లే జరిగెను, అయినను ఈ సాధారణ కండ్లతో నేను ఆ వెలుగును చూడలేదు. ఆ చిన్న భాగమును చదువుటద్వారానే అది జరిగెను John 3:3 లోని, ‘నిశ్చయముగా నిశ్చయముగా నేను నీతో చెప్పుచున్నాను’ అను మాటను చదువుటద్వారానే నా కండ్లు తెరవబడెను. బైబిలును గూర్చి నేను, “ఈ పుస్తకము నాది కాదు గాని యూరోపియనులకును అమెరికనులకును చెందినది” అని చెప్పుచుంటిని. కాని ఈ మాటలు, ‘నేను నీతో చెప్పుచున్నాను, నేను నీతో చెప్పుచున్నాను’ అని నా చెవులలో మారుమోగుచునే ఉండెను. నేను, “ప్రభూ, అట్లయిన నేను పాపిని. నేను నీపై దూషణమాటలు పలికితిని. 1919వ సంవత్సరమున నేను బైబిలును చించివేసితిని” అని జవాబిచ్చితిని. అప్పుడు నేను మోకరించితిని, నేను పూర్తిగా మరచిపోయిన నా గత జీవితములోని అనేక సంగతులను చూచితిని.

ఇదే సంగతి సౌలుకు కూడా జరిగెను. మొదట అతడు ఆ కాంతిని చూచెను, తరువాత మోకరించెను. తరువాత, “సౌలా, సౌలా, నీవు నన్నెందుకు హింసించుచున్నావు?” అను మాటలను వినెను. తాను ఏదో నూతనమైనదానిని చూచితిననుకొనెను. తాను దేవునికి సేవచేయుచున్నాననియు, పాపమునుండి విడుదల పొందియుంటిననియు అతడు తలంచెను. తనకు దేవునియెడల గొప్ప ఆసక్తియున్నదని కూడా అతడు తలంచెను. కాని ఇప్పుడు తాను దేవునికి శత్రువుననెడి సంగతిని అతడు కనుగొనెను. తెలియకయే అతడు దేవుని సంబంధమైనవాటికి హాని కలుగజేయుచుండెను. అతడు నిస్సందేహముగా యథార్థవంతుడైన, దేవునియందు భయభక్తులుగల మనుష్యుడైయుండి, దేవుని వాక్యమును సంపూర్ణముగా ఎరిగియుండెను, కాని దైవికవెలుగును అతడు ఎన్నడును చూడలేదు. తాను బుద్ధిపూర్వకముగా దేవుని వెంబడించుటకు ప్రయత్నించుచుండెను, కాని తన అంతరంగస్థితిని అతడు చూడలేదు. ఇప్పుడు ఆ వెలుగంతయు తనయొద్దకు వచ్చుటను చూచి, Rom. 7:18లోవలె మొఱ్ఱపెట్టెను. “కోరుట నాయందున్నది గాని దానిని జరిగించుటకు మార్గము నాకు కనబడదు.” కాని ప్రభువైన యేసుక్రీస్తు కొన్ని మాటలలో, “తెలియకయే నీవు నా కార్యమునకు హాని కలుగజేయుచుంటివి” అని చెప్పెను. దేవుని కార్యమునకును మనకును మనమెంత హాని కలుగజేయుచున్నామో, మనలోనికి వచ్చు వెలుగు మాత్రమే మనకు చూపగలదు. దేవుని వెలుగు మాత్రమే మన నిజస్థితిని మనకు చూపగలదు.

ఎక్స్‌రే మన శరీరముయొక్క నిజస్థితిని మనకు చూపగలిగినట్లే, రక్తముయొక్క నిజస్థితిని చూపుటకు సూక్ష్మదర్శిని కూడా ఉపయోగింపబడును.

దగ్గు మందులతో నయముకాని కొన్ని దగ్గులు ఉన్నవి. చికిత్సచేగాని దగ్గుమందుచేగాని దగ్గు నయముకానప్పుడు పాతకాలపు వైద్యులు ఆ వ్యక్తికి దయ్యముపట్టెనని తలంచెడివారు. వైద్యులు సూక్ష్మదర్శినిద్వారా రక్తమును పరీక్షింపనారంభించినప్పుడు, తెల్లరక్తకణములు అధికముగా ఉండుటవలననే దగ్గు కలుగుచున్నదని వారు కనుగొనిరి, సరైన చికిత్స ఇయ్యబడినప్పుడు దగ్గు తగ్గిపోయెను. రోగులు, “ఎంత అద్భుతమైన వైద్యుడో! పీపాల కొలది మందు నేను త్రాగితిని కాని అది నన్నెన్నడును బాగుచేయలేదు. కాని ఈ నేర్పరియైన వైద్యుడు కేవలము రెండు ఇంజెక్షనులిచ్చి నన్ను బాగుచేసెను” అని చెప్పియుండవచ్చును. అయినను, వాస్తవానికి సూక్ష్మదర్శినియొక్క ఆవిష్కరణమే ఆ విజయమును తీసికొనివచ్చెను.

దేవుని వెలుగు మీలోనికి సంపూర్ణముగా రానిండు, దానిని అడ్డగింపకుడి. మొదట అది మిక్కిలి తగ్గించు అనుభవముగా ఉండును. సౌలు తన జ్ఞానమును, నేర్పును గూర్చి మిక్కిలి గర్విష్ఠుడైయుండెను, కాని దేవుని వెలుగు అతనిని ముఖముపై నేలగూల్చెను. ఆ వ్యక్తి తనకు ఎదురుపడు ఏ విశ్వాసినైనను చెరసాలలో పెట్టుటకు యాజకులనుండి పొందిన అధికారముతో రెండు చేతులలో అనేక కాగితములను మోసికొనిపోవుచుండెను. అతని మెదడు ఆలోచనలతో నిండియుండెను, అతని చేతులు వారెంటులతో నిండియుండెను. దమస్కులోని విశ్వాసులను పట్టుకొనుటకు అతడు పరుగెత్తుచుండెను, కాని అతని ఆలోచనలును కాగితములును రెండును ఎగిరిపోయెను. అతడు అక్కడ ధూళిలో పడియుండెను, ప్రభువు అతనితో, “నీవు నీ కాలమును, ధనమును, శక్తిని వ్యర్థపరచుచున్నావు. నీవు మునికొనలకు ఎదురు తన్నుచున్నావు. నీవే గాయపడుదువు. సౌలా, నా కార్యమును నీవు ఆపగలవని తలంతువా? నీవు నీకు నీవే ఎంతటి హానిని కలుగజేయుచున్నావో నీకు తెలియదు” అని చెప్పుచుండెను.

మనము ఎంత యథార్థవంతులమైననూ, మనయొక్క సొంత జీవితమును జీవించుచున్నంతకాలము, మనము ప్రతిదినము మునికొనలకు ఎదురు తన్నుచు, మనకు మనమే హాని కలుగజేసికొనుచు, ఆత్మీయముగా మరింత చెవిటివారముగాను, గ్రుడ్డివారముగాను అగుచున్నాము. తన ఆత్మీయ గ్రుడ్డితనమును దేవుని యెదుట ఒప్పుకొనుటకు సౌలు మూడు దినములు గ్రుడ్డివాడాయెను. “ప్రభూ, నీవెవడవు?” అని అడుగుటకు బదులు, ఇప్పుడు మీ మనస్సునందు మీరు అడుగుచున్న ఇతర ప్రశ్నలను అతడు అడిగియుండవచ్చును. ప్రభువు, “నీవు హింసించుచున్న యేసును నేనే” అని జవాబిచ్చెను. యేసు అను నామమునకు, తన ప్రజలను వారి పాపములనుండి రక్షించువాడని అర్థము! ప్రభువు అతనితో, “నీవు నా ప్రజలను ద్వేషించి హింసించునప్పుడు నీవు నాకే చేయుచున్నావు, కాని నేనే రక్షకుడను. నీవు నా నామమును ద్వేషించి దూషించుచున్ననూ, సౌలా, నేను నిన్ను ప్రేమించుచున్నాను. నీకొరకైనను నేను నా రక్తమును కార్చి నా ప్రాణమునిచ్చితిని” అని చెప్పెను.

ప్రభువు మీతో కూడా ఇదే సంగతిని చెప్పుచున్నాడు. మీరు ఆయన నామములనన్నిటిని ఎరిగియుండి, ఆయనను గౌరవించియుండవచ్చును, కాని ప్రశ్న ఏమనగా: ఆయన మీ పాపములను క్షమించెనా? మీ పాపస్వభావమునుండి మిమ్మును ఆయన విడిపించెనా? ఆయన మీలో నివసించుటకు వచ్చెనా? ఉదాహరణకు, ఒక మిక్కిలి నేర్పరియైన, అద్భుతమైన వైద్యుడొకడు కలడు, ప్రజలు దూరప్రాంతములనుండి గుంపులు గుంపులుగా అతనియొద్దకు వత్తురు. ఇతరులతో నేను దీనిని చెప్పినప్పుడు, వారు నన్ను, “అయితే ఆయన నిన్ను బాగుచేసెనా? నీవెన్నడైనను ఆయనయొద్దకు వెళ్ళితివా?” అని ప్రశ్నించవచ్చును. నేను, “లేదు, కాని నా భార్య అట్లు చెప్పును!” అని జవాబిచ్చినయెడల వారు, “మరి నీ సంగతేమి?” అని అడుగుదురు. ప్రభువైన యేసుక్రీస్తు, “నేనే యేసును, నేనే రక్షకుడను. మీ పాపముల కొరకు నేను మరణించితిని” అని చెప్పుచున్నాడు. ఆయన మీ రక్షకుడాయెనని మీరు చెప్పినయెడల, మీ పాపముల కొరకు మరణించినందుకు మీరు ఆయనకు కృతజ్ఞతలు చెల్లించితిరా? మీ పాపములు తొలగిపోయెనన్న నిశ్చయత మీకు కలదా? మీ పాపస్వభావమునుండి ఆయన మిమ్మును విడిపించెనా? ఆయన మీలోనికి వచ్చెనా?

సౌలు ఆ స్వరమునకు, “ప్రభూ, నేనేమి చేయవలెనని కోరుచున్నావు?” అని జవాబిచ్చెను. తాను ఏమి చేయవలెనో అక్కడ చెప్పబడుననుచు దమస్కునకు వెళ్ళుమని ప్రభువు అతనిని కోరెను. అతడు సుప్రసిద్ధుడైయుండిననూ, ముందుగా అతడు దేవునికి విధేయత చూపి, దేవుడు చెప్పినది సరిగ్గా చేయవలసియుండెను. ప్రభువు స్వయముగా అనేక సంగతులను అతనితో చెప్పలేదు (Acts 9:6). ఒక తెలియని వ్యక్తి అతనియొద్దకు పంపబడెను; అతని పేరు అననీయ. అతడు అపొస్తలుడు కాదు, సాధారణ వ్యక్తి మాత్రమే. అతనిని గూర్చి మనకు ఎక్కువగా తెలియదు. ధనవంతులైనవారును, ఉన్నత పదవులలో ఉన్నవారును సుప్రసిద్ధులైన వ్యక్తులు తమతో మాట్లాడవలెననుకొందురు, సాధారణ వ్యక్తులు కాదు. “ఆత్మీయ విషయములను గూర్చి నాతో మాట్లాడుటకు నాకొక బిరుదుగల వ్యక్తి కావలెను” అని వారు తలంతురు. దేవుడు, “మిమ్మును మీరు తగ్గించుకొనుడి” అని చెప్పుచున్నాడు. ప్రభువు కోరుకున్నయెడల, రక్షణమార్గమునంతటిని ఆయన స్వయముగా పౌలుకు వివరించియుండగలడు, కాని ఆయన అట్లు చేయలేదు. ఆయన వివరించుటకు అననీయను పంపెను. అది అతనికి దేవుని స్వరమైయుండెను, సౌలు తన్నుతాను తగ్గించుకొని అననీయ చెప్పినదానినంతటిని నమ్మెను. “ఇప్పుడు నాకు ఈ అద్భుతమైన మార్గము తెలిసినది,” అని అతడు తలంచెను, “నా పాపములు తొలగిపోయినవి. నా కొరకు మరణించినవానినే నేను హింసించుచుంటిని.” తరువాత అననీయద్వారా అతడు బాప్తిస్మము పొందెను. ఆ సమయమునుండి అతడు దేవుని స్వరమును అనేకమారులు వినెను.

తన జీవితమునంతటిలోను, పరిచర్యనంతటిలోను, దేవుని స్వరమును వినుటద్వారా సౌలు ఆయన చిత్తమును జరిగించుచుండెను (అపొ. కార్య. 16). గలతీయ, ముసియ ప్రాంతములలో ప్రభువు బలముగా కార్యము చేయనారంభించెను, పౌలు బితూనియకు వెళ్ళగోరినప్పుడు, ఆత్మ అతనిని అనుమతింపలేదు. అప్పుడు అతడు, “ప్రభూ, మేము గలతీయలో ఉండవచ్చునా?” అని అడిగెను. అప్పుడు ప్రభువు, “వద్దు” అని చెప్పెను. అట్లే ముసియ కూడా. తరువాత దేవుని స్వరము వచ్చెను: “మాసిదోనియకు వచ్చి సహాయము చేయుము”. అది వేరొక ఖండములో ఉన్నను, అతడు విధేయత చూపెను. ఈ విధముగానే ప్రభువైన యేసుక్రీస్తు సువార్త యూరోపులోనికి ప్రవేశించెను. సౌలును అతనితో ఉన్నవారును విని విధేయత చూపిరి, కష్టము వచ్చినప్పుడు Acts 18:9లో, ఆయన నామముకొరకు శ్రమనొందుట ఎంతటి భాగ్యమో!

మీరు ఏదైనా కష్టమునుగాని ఆపదనుగాని ఎదుర్కొనవలసివచ్చినప్పుడు, లేదా కార్యాలయములోను పొరుగువారిలోను శత్రువులు కలిగియున్నప్పుడు, ఉదయకాలముననుగాని మధ్యాహ్నముననుగాని ఆ స్వరము వచ్చును: “భయపడకుము. నేను నీతోకూడ ఉన్నాను.” ఈ మాటలు మిమ్మును బలపరచి, ప్రోత్సహించి, మీకు విజయమునిచ్చును. గత ముప్పది ఏడు సంవత్సరములుగా, “నేను నీతోకూడ ఉన్నాను” అను ఈ మాటలను నేనెన్నిమారులు వినియుంటినో! ఇది ప్రతిదిన అనుభవముగా ఉండగలదు, మీరు నిరుత్సాహపడి, దుఃఖాక్రాంతులై, “నా ప్రాణమును తీసివేయుము” అని చెప్పవలసిన అవసరము లేదు.

అపొ. కార్య. 27లో, ఓడ గొప్ప ప్రమాదములో ఉండెను, ఓడలోని 276 మందికి తాము బ్రతికియుందుమన్న ఆశయే లేకుండెను. భయంకరమైన తుఫానువలన వారు భయపడిరి. ఓడను తేలికపరచుటకు వారు ఓడ సామానులను పారవేసిరి, నావికులు కూడా పారిపోవుటకు ప్రయత్నించిరి, కాని పౌలు వారిని ఆపెను. ఆ రాత్రి దేవుడు పౌలుతో, “పౌలూ, భయపడకుము. నీవు కైసరు యెదుట నిలువవలెను, ఇదిగో, నీతోకూడ ప్రయాణించువారందరిని దేవుడు నీకనుగ్రహించియున్నాడు” అని చెప్పియుండెను. దేవుని ఈ స్వరము విశ్వాసమును కలుగజేసెను. బాహ్యముగా వారు రక్షింపబడుట అసాధ్యమైయుండెను, ఎంతమాత్రము ఆశ మిగిలియుండలేదు, కాని అతడును ఆ 276 మందియు క్షేమముగా ఉందురని దేవుడు అతనికి హామీ ఇచ్చియుండెను. పౌలు బాగుగా భోజనము చేసి బాగుగా నిద్రించెను. అతడు భయపడక, ఇప్పుడు ఇతరులను కూడా భోజనము చేయుమని ప్రోత్సహించెను.

చిన్న కష్టము కూడా నిద్రను తీసివేయును, అట్టి సమయమున ఏ నిద్రమాత్రయు నిద్రనీయజాలదు. కాని అట్టి సమయమునందు, అట్టి పరిస్థితులయందు, దేవుని స్వరము వచ్చును, “భయపడకుము, నేను నీతోకూడ ఉన్నాను.” ఇది దేవుని స్వరమేగాని మనుష్యుని స్వరము కాదని మనకు నిశ్చయత కలుగజేయునది దేవుని సన్నిధియొక్క ఎరుకయే. మొదట, దేవుని స్తుతించుటద్వారాను, ఆయన వాక్యమును చదువుటద్వారాను దేవుని సన్నిధి గ్రహింపబడును, తరువాత మనము ఆయన స్వరమును వింటుము. నా విశ్వాసము పెరుగుచున్నట్లు నేను గ్రహించినయెడల, అది మనుష్యుని స్వరముకాదని నాకు తెలియును, తరువాత అనుభవముద్వారా మనము ఆ స్వరమును మరింత సులభముగా గుర్తింపగలుగుదుము.

కొన్నిసార్లు భర్త దూరప్రాంతమునకు వెళ్ళి, తన భార్యకు తెలియజేయకుండగనే తిరిగివచ్చినప్పుడు, ఆవరణలో అతని దగ్గు వినుటమాత్రముచేతనే భార్య అతని రాకను గుర్తించి, “అదిగో నా భర్త వచ్చెను” అని చెప్పుచున్నది. “ఆయనెక్కడ?” అని ఎవరైనను ఆమెను అడుగవచ్చును. ఆమె, “ఆయనెక్కడ ఉన్నారో సరిగ్గా నాకు తెలియదు, కాని ఆయన స్వరమును నేను వినగలను” అని జవాబిచ్చును. అయితే, ఒక భార్యకు తన భర్తతో మంచి సంబంధములు లేకుంటే, అతడు వరండాలో ఉన్ననూ ఆమెను అతనెక్కడ ఉన్నాడని ఎవరైనను అడిగినయెడల, ఆమె, “నాకు తెలియదు” అని చెప్పును!

మీరు దేవుని స్వరమును వినగోరిన యెడల, ప్రభువైన యేసుక్రీస్తు మీ హృదయములోనికి వచ్చి పరిపాలింపనిండు. ఆయన దైవికవెలుగును పొందుకొని, మీ పాపమును ఒప్పుకొనుటకు భయపడకుడి. ఆయన మీ పాపముల కొరకు మరణించెనని జ్ఞాపకముంచుకొనుడి. ఆయనను మీ ప్రేమగల రక్షకునిగా అంగీకరించి, తరువాత ఆయనను మీ స్నేహితునిగా ప్రతిదినము మాట్లాడుడి, ఏలయనగా మీరు ఎక్కడైనను ఏ విషయమునైనను ఆయనతో మాట్లాడగలరు, ఆయన తప్పక మీతో మాట్లాడును. ఇది మాత్రమే జ్ఞాపకముంచుకొనుడి: ఆయన స్వరమును మీరు విన్నప్పుడు వెంటనే విధేయత చూపుడి.

అధ్యాయం 3