ఆయన మాట వినుడి

ఆయన మాట వినుడి

నేను మీరు గమనించాలని కోరుకుంటున్న చిన్న భాగం Matt. 3:17: పరలోకము నుండి వచ్చిన స్వరం, ఇలా చెప్పింది: ఇతడు నా ప్రియకుమారుడు, ఇతనియందు నేను ఆనందించుచున్నాను.” ఆ రోజు ఆ స్వరాన్ని విన్నవారికి అది నిజంగా అపూర్వమైన, అద్భుతమైన అనుభవమై ఉండాలి.

బాప్తిస్మమిచ్చు యోహాను ప్రభువైన యేసుక్రీస్తు కొరకు మార్గము సిద్ధపరచుటకు లోకములోనికి వచ్చెను. అతడు అరణ్యములో పశ్చాత్తాపమును గూర్చి ప్రకటించుటకు ప్రారంభించెను, కాని ఆ సందేశము ప్రజలు అంగీకరించుటకు తేలికైనది కాదు. ప్రజలు దూరప్రాంతముల నుండి అతని మాట వినుటకు వచ్చిరి, మరియు అతడు ప్రకటించినది వారిని సంతోషపరచు సందేశము కాదు గాని, జీవముగల దేవుని అధికారముతో కూడిన సందేశము. అతడు ఏ భేదభావము చూపక, “పశ్చాత్తాపపడుడి, పరలోకరాజ్యము సమీపించియున్నది” అని చెప్పెను.

ఆ సందేశము విన్నవారు తమ పాపములకు పశ్చాత్తాపపడి, వాటిని ఒప్పుకొని బాప్తిస్మము పొందిరి. అటువంటి గొప్ప ప్రవక్త చేత బాప్తిస్మము పొందుటవలన తమకు ఏదో విధమైన ఆశీర్వాదము కలుగునని కొందరు తలంచియుండవచ్చును. బాప్తిస్మము పొందుటకు వచ్చినవారిలో జాతి నాయకులు కూడా కొందరుండిరి, వారిని చూచి యోహాను, “సర్పసంతానమా, రాబోవు ఉగ్రతను తప్పించుకొనవలెనని మీకు బోధించినవాడెవడు? పశ్చాత్తాపమునకు తగిన ఫలములు ఫలింపుడి” అని బిగ్గరగా చెప్పెను. అతడు ప్రజలందరికీ ఆ సందేశము ఇచ్చెను, కాని కొందరు మాత్రమే స్పందించి అతని చేత బాప్తిస్మము పొందిరి.

ఒక దినమున ప్రభువైన యేసుక్రీస్తు స్వయముగా బాప్తిస్మము పొందుటకు వచ్చెను. యోహాను సువార్తలో లేఖనము చెప్పుచున్నదేమనగా, ఆ రోజు వరకు, ప్రభువైన యేసు నిజముగా ఎవరైయుండెనో బాప్తిస్మమిచ్చు యోహానుకే స్వయముగా తెలియదు (John 1:31). మన ప్రభువైన యేసుక్రీస్తు జనసమూహము మధ్యకు మిక్కిలి నిశ్శబ్దముగా వచ్చి, తనకు బాప్తిస్మము ఇయ్యవలెనని బాప్తిస్మమిచ్చు యోహానును కోరెను. యోహాను తన బంధువుడైనందున యేసును గూర్చి సహజముగా కొంత తెలిసియుండెను, కాని ఆయనే మెస్సీయ అని అతనికి తెలియదు. ఆకాశము తెరవబడుటయు, పరిశుద్ధాత్మ పావురమువలె యేసుక్రీస్తుపై దిగివచ్చుటయు యోహాను చూచినప్పుడు, ఆయన ఎవరైయున్నారో అతనికి నిశ్చయముగా తెలిసెను. మరుసటి దినమున అతడు, “ఇదిగో, లోకపాపమును మోసికొనిపోవు దేవుని గొఱ్ఱెపిల్ల” అని ప్రకటించెను.

దేవుని స్వరము పలికినప్పుడే యోహానుకు యేసు ఎవరైయున్నారో తెలిసినదని ఇది మనకు తెలియజేయుచున్నది. మీరు కూడా దేవుని స్వరమును వినకపోతే, దేవుడు ఎవరైయున్నారో మీకు ఎన్నటికిని తెలియదు. మీరు అనేక సభలకు హాజరైయుండవచ్చును, బైబిలును గూర్చి బహుగా తెలిసియుండవచ్చును, అనేక త్యాగములు చేసియుండవచ్చును, కాని దేవుని స్వరమును వినకపోతే, ఈ సంగతులన్నియు ఆత్మీయముగా మీకు ఏ విలువ లేనివే.

ప్రభువు అద్భుతములు చేయుటతో తన పరిచర్యను ప్రారంభింపలేదు. ఆ రోజు వరకు ఆయన ఒక్క అద్భుతమైనను చేసియుండలేదు, ఒక్క ప్రసంగమైనను చేసియుండలేదు. దేవుని స్వరము ఆయన గుర్తింపును ప్రకటించిన తరువాతనే యోహాను గ్రహించి, యేసు ఎవరైయున్నారో ప్రకటించెను.

మీరు దేవుని కృపను అనుభవించాలని, ఆయన శక్తిని సంపూర్ణముగా గ్రహించాలని, ప్రతిదినము దేవుని మనస్సును తెలిసికొనాలని కోరుకుంటే, ఆయన మెల్లని సన్నని స్వరమును ప్రతిదినము, రోజులో అనేకసార్లు వినుటయందలి రహస్యమును నేర్చుకొనుడి. దేవుడు మాట్లాడుచున్నాడు, ఆ జీవముగల, శక్తిమంతుడైన దేవుడు; మనము ఆయన స్వరమును విని, ఆయనకు చెవియొగ్గవలెనని ఆయన కోరుచున్నాడు. మనమందరము ఈ రహస్యమును నేర్చుకొందుము గాక. “ఇది మార్గము, దీనిలో నడువుడి” అని దేవుని స్వరము మనతో ప్రతిదినము పలుకుటను మనము వినవలెను (isa. 30:21). ఈ మాటలు ఎంత సరళమైనవి. మీరు కుడికి గాని ఎడమకు గాని తప్పు మార్గములోనికి తిరుగబోవునప్పుడు, ఆ మెల్లని సన్నని స్వరము వచ్చి, ‘ఈ దారిన వెళ్ళవద్దు, ఆ దారిన వెళ్ళవద్దు, అక్కడ ప్రమాదమున్నది’ అని చెప్పును. ఈ విధముగా మనమందరము ప్రతిదినము నడిపింపబడగలము రాత్రి మార్గములో కూడా.

మనమందరము ఈ లోకములో ఉన్నంతకాలము శోధనను ఎదుర్కొనవలసియుండును. మీరు ఎవరైనను, ఎక్కడైనను, ఏమి చేయుచున్నను ఇది తప్పదు. మనుష్యులముగా మనము అనేక శోధనలను, కష్టపరిస్థితులను, ఒకటో మరొకటో బాధలను ఎదుర్కొనవలసియుండును. కాని దేవుని స్వరమును స్పష్టముగా వినగలిగినప్పుడు మనము ఈ పరిస్థితులను జయవంతముగా ఎదుర్కొనగలము.

ఆత్మీయ జీవితము ప్రారంభమైనప్పటినుండియే ఆయన స్వరమును వినుటను మనము ఎట్లు నేర్చుకొనవలెనో దేవుడు తన వాక్యములో మనకు చూపుచున్నాడు. నిర్గమ 19:19; 20:1, 2 అధ్యయనము చేయుడి. Ezek. 1:24లో, ‘సర్వశక్తిమంతుని స్వరము’ను గూర్చి చదువుచున్నాము; Ezek. 10:25 లో, “సర్వశక్తిమంతుడైన దేవుడు పలుకునప్పటి స్వరము’ను గూర్చి; I Kings 19:12లో, “ఆ మెల్లని సన్నని స్వరము’ను గూర్చి చదువుచున్నాము.

1 రాజులు 18లోని కథను మీరు జ్ఞాపకము చేసికొనవచ్చును, దేవుని పరాక్రమశాలియైన ఏలీయా ప్రార్థన చేసినప్పుడు ఆకాశము తెరవబడి అగ్ని దిగివచ్చిన సంగతి (1 Kings 18:38).

19వ అధ్యాయము ఆరంభమున, ఆ దుష్టరాణి ఏలీయాను చంపెదనని బెదిరించెను, కాబట్టి దేవుడు యెజెబెలును తప్పక శిక్షించుననుకొని ఏలీయా అనుకొనియుండవచ్చును. అతడు వెళ్ళి బదరీవృక్షము క్రింద కూర్చుండెను, ఆమెను శిక్షింపనందుకు దేవునిపై అతనికి కోపము వచ్చెను. మనము కూడా కొన్నిసార్లు ఇట్లే ప్రవర్తించుచుందుము. ఈ విధముగా మనము దేవుని తప్పుగా అర్థము చేసికొని ఆయనను సందేహింపనారంభింతుము. కాని దేవుని మార్గములు మన మార్గములు కావు; అవి మన మార్గముల కంటె ఉన్నతమైనవి. ఆయన మన పద్ధతిలో పనిచేయడు. యెజెబెలును శిక్షింపనందుకు దేవుడు తన కర్తవ్యమును నిర్వర్తింపలేదని ఏలీయా తలంచియుండవచ్చును, కావున అతడు ప్రభువుతో, “ప్రభువా, ఇక నేటినుండి నేను నీ ప్రవక్తగా ఉండను” అని చెప్పెను. ఇప్పుడు, మీరు ప్రభుత్వ ఉద్యోగములో ఉంటే రాజీనామా చేయుటకు మూడు నెలల నోటీసు ఇయ్యవలెను, కాని ఏలీయా ఒక్క దినపు నోటీసు మాత్రమే ఇచ్చెను! “నేటినుండి నా నుండి నీ ప్రవక్తపదవిని తీసివేయుము,” అని అతడు అర్థములో చెప్పెను, “నేటినుండి నీ నామమున నేను మాట్లాడను. నీవు నిద్రించుచున్నావు, నీ పని నీవు చేయుటలేదు!”

చాలాసార్లు మనము కూడా అట్లే తలంతుము. మనము దేవునికి ఆజ్ఞలిచ్చుటకు కోరుకుంతుము. కాని దేవుడు నిద్రించుటలేదు! ఆయన ఏలీయాను పర్వతశిఖరమునకు తీసికొనిపోయి, అక్కడ అద్భుతమైన రీతిలో అతనితో వ్యవహరించెను. మొదట మిక్కిలి బలమైన గాలి వీచెను; కాని దేవుడు ఆ గాలియందు లేడు. తరువాత పర్వతమును కదిలించిన భూకంపము వచ్చెను, కాని దేవుడు ఆ భూకంపమందు లేడని లేఖనము చెప్పుచున్నది. తరువాత అగ్ని వచ్చెను, కాని దేవుడు ఆ అగ్నియందు లేడు. దాని తరువాత మెల్లని సన్నని స్వరము వచ్చెను, దేవుడు ఏలీయాతో మాట్లాడి, యెజెబెలును ఎక్కడ, ఎప్పుడు, ఏ విధముగా తీర్పు తీర్చునో స్పష్టముగా తెలియజేసెను. అదే సమయమున రాబోవు సంగతులను గూర్చి అనేక ఇతర విషయములను కూడా ఆయనకు బయలుపరచెను.

బైబిలులోని ఈ అనేక ప్రస్తావనల ద్వారా దేవుడు మాట్లాడుచున్నాడని మనము చూచుచున్నాము. దేవుడు మాట్లాడును, మీరు దేవునియందు విశ్వాసముంచినయెడల, ఆయన మాట్లాడునప్పుడు మీరు తప్పక వినవలెను. ఆయన నైరూప్యమైన ఏదో వస్తువు కాదు. ఆయన ఒక వ్యక్తి. మనము ఆయనను ఎరుగగలము, వినగలము, ఆయనచే నడిపింపబడగలము, మరియు ఇతరులను తెలిసికొనుకంటె ఎక్కువగా సన్నిహితముగా ఆయనను తెలిసికొనగలము. మీరు స్నేహితులతో అనేక సంవత్సరములు జీవించియుండి కూడా వారిని పూర్తిగా తెలిసికొనియుండకపోవచ్చును. మీరు మీ భార్యతోను పిల్లలతోను అనేక సంవత్సరములు జీవించియుండి కూడా అన్ని సంగతులు వారితో చెప్పుటకు తెగింపరు. మనము ఇతరులతో పంచుకొనలేని కొన్ని ఆలోచనలుండును; కాని దేవునితో మనము స్వేచ్ఛగా మాట్లాడి, ప్రతి ఆలోచనను ఆయనకు చెప్పగలము. మనము ఎప్పుడైనను, ఎక్కడైనను ఆయనయొద్దకు వెళ్ళి ఆయన స్వరమును వినగలము.

పూర్వము, ప్రవక్తలు లేదా ప్రధానయాజకులు మాత్రమే దేవుని స్వరమును వినగలిగియుండిరి. దేవుడు చెప్పదలచినది ఇతరులు వినగోరినయెడల, వారు మొదట ప్రవక్తయొద్దకు గాని ప్రధానయాజకునియొద్దకు గాని వెళ్ళవలసియుండెను. దావీదు కష్టములో ఉన్నప్పుడెల్ల, దేవుని స్వరమును వినుటకు తనకు సహాయపడుమని ప్రధానయాజకుడైన సాదోకును పిలిపింపవలసివచ్చెడిది. దేవుని స్వరమును వినుటకు మనుష్యులకు సహాయపడుటకు యేసుక్రీస్తు లోకములోనికి వచ్చెను, మరి ఈ కారణము చేతనే, ఆయన పరిచర్య ఆరంభమున, పరిశుద్ధాత్మ ఆయనపైకి వచ్చెను మరియు దేవుడు పరలోకము నుండి పలికెను.

తన బాప్తిస్మములో మన ప్రభువు తాను ఎట్లు మరణించి, పాతిపెట్టబడి, తిరిగి లేవవలెనో ప్రవచించుచుండెను. ఈ సంగతిని ఆయన తన పరిచర్య ఆరంభమునందే ఈ సంకేతాత్మక రీతిలో ప్రకటించెను. Mark 8:31, 9:31లో, ఆయన దీనిని ఇంకను స్పష్టముగాను, నిర్దిష్టముగాను చెప్పుచున్నాడు, మరియు తన సిలువవేయబడుటకు ముందే తన మరణమును ప్రవచించెను. బాప్తిస్మములో, తాను పాపులకొరకు తన ప్రాణమునియ్యవలెననియు, మరణమును జయింపవలెననియు ఆయన సంకేతాత్మకముగా చెప్పెను. అప్పుడు ఆకాశములు తెరవబడెను, దేవుని స్వరము వినబడెను. ప్రభువైన యేసును అనుభవపూర్వకముగా ఎరిగినవారు ప్రతిదినము ఆకాశము తెరవబడుటను చూతురు: వారు ప్రతిదినము దేవుని కృపను, కనికరమును, ప్రేమను, శక్తిని పొందుదురు; మరియు వారిని నడిపించుటకు, సహాయపడుటకు, బోధించుటకు పరిశుద్ధాత్మ వరము వారికున్నది, ఏలయనగా రహస్యములను, ఆత్మీయసత్యములను సాధారణ జ్ఞానముచేత గ్రహింపజాలము.

మీరు కూడా మీ అవసరతకు తగినట్లు ప్రతిదినము దేవుని స్వరమును వినగలరు, మరియు ఆ అంతరంగ స్వరము ద్వారా దేవుడు మీ నుండి ఏమి కోరుచున్నాడో, మీరు ఏమి చేయవలెనని ఆయన కోరుచున్నాడో సరిగ్గా తెలిసికొనగలరు.

తరువాతి ప్రశ్న ఏమనగా, మనలో ఎవరైనను ప్రతిదినము దేవుని స్వరమును ఎట్లు స్పష్టముగాను నిశ్చయముగాను వినగలరు? జవాబు అదే అధ్యాయమునందున్నది, Matt. 3:2 ‘పశ్చాత్తాపపడుడి!’ ఇదియే బాప్తిస్మమిచ్చు యోహాను ధైర్యముగాను అధికారముతోను మొదట ప్రకటించిన సందేశము. తన బాప్తిస్మము పొందిన దినమున ప్రభువైన యేసుక్రీస్తు కూడా అదే సందేశమునిచ్చెను (Matt. 4: 17). గ్రీకు భాషలో ‘పశ్చాత్తాపము’ అను పదమునకు ‘పూర్తిగా వెనుదిరుగుట’ అని అర్థము. మొదట నేను ఎదురుగా చూతును; తరువాత నేను వెనుదిరిగి మరొక దిక్కుకు ముఖము పెట్టుదును. దీనినే పశ్చాత్తాపము అందురు.

పాపులముగా మనము దేవునికి వీపు చూపుచు అపవాదికి ముఖము చూపుచున్నాము, ఏలయనగా దేవునికి విధేయత చూపుటకంటె సాతానుకు విధేయత చూపుటలో మనకు మిక్కిలి ఆనందము కలుగుచున్నది. దేవుని వాక్యమును విని, పాపఫలితమును తెలిసికొని, మనము పశ్చాత్తాపపడి అపవాదికి వీపు చూపి దేవునికి ముఖము చూపుదుము. కాని అనేక సందర్భములలో అది సగము పశ్చాత్తాపము మాత్రమే, లేదా మూడింట రెండువంతుల పశ్చాత్తాపము మాత్రమే! మనుష్యులు ఇద్దరు యజమానులను కోరుకుంటారు! వారు కష్టములో ఉన్నప్పుడు దేవుని కోరుకుందురు, లేనియెడల అపవాదికి సేవచేయగోరుదురు. పశ్చాత్తాపము సంపూర్ణముగాను పరిపూర్ణముగాను ఉంటేనే గాని అది పశ్చాత్తాపమే కాదు. దీనికొరకు మనకు దేవుని కృపయు సహాయమును అవసరము

1t పశ్చాత్తాపపడి అపవాదికి వీపు చూపగలము.

అదే అధ్యాయములో (13, 14 వచనములలో) యోహాను, యేసు తనయొద్దకు వచ్చుటను చూచి ఆశ్చర్యపడిన సంగతి మనకు తెలుపబడియున్నది. మిమ్మును మీరు తగ్గించుకొననిదే దేవుని రాజ్యార్థమును మీరు గ్రహింపజాలరు. యేసు బాప్తిస్మమిచ్చు యోహానుకంటె ఎంతో ఎక్కువ శక్తియు అధికారమును కలిగియున్ననూ, మీ కొరకు, నా కొరకు తన్నుతాను తగ్గించుకొని, బాప్తిస్మము పొందుటకు యోహానుయొద్దకు వెళ్ళెను. యోహాను, “నీచేత నేను బాప్తిస్మము పొందవలసియుండగా నీవు నాయొద్దకు వచ్చుచున్నావా?” అని అనెను. దైవానుగ్రహమునకు రహస్యము వినయమేనని ప్రభువు సంకేతరూపముగా చెప్పుచుండెను. మనము ఎంత ఎక్కువగా తగ్గించుకొందుమో అంత ఎక్కువగా హెచ్చింపబడుదుము (మత్త. 23:12). మనము వినయముతోను సాత్వికముతోను పాపములకు పశ్చాత్తాపపడుటయే గాక, హృదయపూర్వకముగా, “ప్రభువా, నేను నా పొరుగువాని కంటె మెరుగైనవాడను కాను. నేను భూమిపై ఉన్నత పదవిని అలంకరించియున్ననూ, నీ దృష్టికి నేను పాపిని; గొప్ప పాపిని. నాయందు అవినీతిని అపవిత్రతను తప్ప మరేమియు కానరాదు” అని ఒప్పుకొనవలెను.

ఇది పూర్తిగా నిజము. మన విద్యనంతటిని, సంస్కారమునంతటిని కలిగియున్ననూ, మన తలంపులచేతను, క్రియలచేతను మనము అపవిత్రపరచబడుచున్నాము. మనుష్యుని హృదయము మిక్కిలి మోసకరమైనదని దేవుని వాక్యము మిక్కిలి స్పష్టముగా చెప్పుచున్నది. మనము ఎంత సంస్కారవంతులమైనను, మన అంతరంగ స్వభావమును మార్చుకొనజాలము. మనము వృద్ధులమగుకొలది మిక్కిలి దుష్టులుగా, గర్విష్ఠులుగా, అహంకారులుగా, మోసకరులుగా అగుచున్నాము. మన స్వాతంత్ర్యము వినయమునందున్నది. అప్పుడు మాత్రమే క్రీస్తుద్వారా మన పాపస్వభావమునుండి మనము సంపూర్ణముగా విడుదల పొందగలము.

మన ప్రభువు తన బాప్తిస్మము ద్వారా మూడు సంగతులను ప్రవచించెను. రోమా. 6లో, బాప్తిస్మము మరణమును, సమాధిని, పునరుత్థానమును గూర్చి చెప్పుచున్నది; ఇది బాప్తిస్మములో బాహ్యముగా వ్యక్తపరచబడు త్రివిధమైన అంతరంగ మార్పు. అనేక సందర్భములలో ఇది కేవలము ఒక ఆచారము లేదా క్రతువు మాత్రమే. అందుకనే క్రైస్తవులని పిలువబడువారిలో అనేకమందిలో ఇంత నిష్ఫలత్వముండుటకు కారణము. బాప్తిస్మము ఒక సాక్ష్యమే గాని క్రతువు కాదు. దీనిని మనము నేర్చుకొననిదే మిక్కిలి దీనమైన క్రైస్తవ జీవితమును జీవింతుము. మన పాపములు పాతిపెట్టబడి మరచిపోబడనిదే, మనకు నిజమైన సమాధానము కలుగదు. లేనియెడల, మనము చేసిన పాపముల జ్ఞాపకము మనలను వెంటాడుచునే ఉండును.

మీరు పాపము చేసిన సమయమున, బహుశ మీరు, “ఇక నేనెన్నడును ఇట్లు చేయను” అని చెప్పియుండవచ్చును. తినుటచేతను త్రాగుటచేతను మీ పాపములను మరచిపోవుటకు మీరు ప్రయత్నించియుండవచ్చును, మరియు మనము ఈ లోకమునకు మరల మరల రామని, కావున తిని త్రాగి ఆనందించుదమని, పాపమునకు ప్రాముఖ్యత లేదని ఇతరులు చెప్పియుండవచ్చును. అయితే, మీరు దుఃఖాక్రాంతులగు ఒక దినము వచ్చుచున్నది. మీ పాపముయొక్క ప్రతి జ్ఞాపకము మిమ్మును బాధించును. మీరు నవ్వుటకు ప్రయత్నించవచ్చును కాని అది మీకు సహాయపడదు. మీరు నిత్యము విశ్రాంతిలేకయు, దుఃఖముతోను ఉందురు. ‘ఈ లోకములో ఏమి ఉన్నది?’ అని మీరు చెప్పుదురు. మనము మన పాపములనుండి పవిత్రపరచబడవలెను, అందుకనే మన ప్రభువు మరణించి పాతిపెట్టబడెను. నేడు మీరు పాపముయొక్క ప్రతి జ్ఞాపకమునుండి విడుదల పొందగలరు. మన శిక్షావిధిని తొలగించుటకు ఆయన మరణించెను, మన పాపస్వభావమునకు మనము చనిపోవుటకు ఆయన మరణించెను.

క్యాన్సరును దాని చుట్టూ ఉన్న కణజాలములతోను కండరములతోను సహా తీసివేయవలసియున్నట్లే, మన కోరికలకును ఆలోచనలకును చనిపోవుటకు విశ్వాసముద్వారా మనము మరణశక్తిని మనలోనికి తీసికొనవలెను. అట్లు చెప్పుటవలన మనము చనిపోము. ఉదయమున నేను, ‘నేను దానిని చేయను; నేను దానిని చేయను’ అని చెప్పుదును. కాని మెదడు పనిచేయనారంభించును: అది, ‘ఫరవాలేదు: ఫరవాలేదు!’ అని చెప్పును. మనము ముందుకుసాగి మరల పడిపోదుము. మన స్వశక్తితో మనము విజయమును పొందజాలము. మనము మరణశక్తిని మనలోనికి పొందుకొన్నట్లే, ఆయన పునరుత్థానశక్తి అను క్రొత్త జీవమును కూడా మనలోనికి పొందుకొందుము, అది నిత్యత్వసంబంధమైన సంగతులకు ఆకలిదప్పికలను మనకు కలుగజేయును. కాలక్రమమున దేవుని స్వరమును వినుటకు మనకు చెవులియ్యబడును. ప్రభువైన యేసుక్రీస్తు తాను శ్రమపడి మరణించి తిరిగి లేవవలెనని స్పష్టమైన మాటలలో తన శిష్యులకు చెప్పినప్పుడు వారు మిక్కిలి దుఃఖించిరి (Matt. 6:21, 22; 17:5), మరియు ఆయనకు అంతటి శక్తియుండగా ఆయన ఎందుకంత శ్రమనొందవలెనని ఆశ్చర్యపడసాగిరి. వాస్తవానికి పేతురు ఆయనను గద్దించెను. “వద్దు ప్రభూ, నీవు ఈ విధముగా శ్రమనొందుటకు మేము ఒప్పుకొనము” అని చెప్పెను.

ఆరు దినముల తరువాత ప్రభువైన యేసుక్రీస్తు వారిని ఒక ఎత్తైన కొండపైకి తీసికొనిపోయి, వారి యెదుట రూపాంతరము పొందెను. అప్పుడు పరలోకము నుండి ఒక స్వరము వచ్చి, “ఇతడు నా ప్రియకుమారుడు, ఇతనియందు నేను ఆనందించుచున్నాను” అని చెప్పెను. దైవిక జీవము మనలోనికి రావలెనంటే, మన పాతస్వభావమునకు మనము చనిపోవలెనని దేవుడు దీనిద్వారా మనకు తెలియజేయుచున్నాడు. ఆయన సహాయము లేకుండా మనము మనకు మనమే ఎన్నటికిని చనిపోజాలము. ప్రభువు మరణించినప్పుడు, మనము మనకు మనము చనిపోవుటకు సహాయపడుటకే ఆయన మరణించెను. మనము ఆయనకు ఎంత ఎక్కువగా విధేయత చూపుదుమో, అంత ఎక్కువగా దైవికకాంతి మన ముఖములపై కనబడుననుటయే దీనికి రుజువు. ఈ విధమైన కాంతి సబ్బుద్వారాగాని పౌడరుద్వారాగాని రాదు. మనము దేవునికి విధేయత చూపుకొలది ఎక్కువయెక్కువగా ప్రకాశించు దేవుని మహిమయొక్క ప్రతిబింబమే అది.

మనము ఆయన మెల్లని సన్నని స్వరమును వినవలెనంటే, మన పాపముల కొరకు, మన శిక్షావిధిని తొలగించుటకు మనకు బదులుగా ఎవరో ఒకరు చనిపోవలెనని దేవుడు చెప్పుచున్నాడు. మనము పవిత్రజీవితమును జీవించుటకు దేవుని న్యాయము దైవికధర్మశాస్త్రమును నెరవేర్పవలెను. ప్రభువైన యేసుక్రీస్తు మనలోనికి నూతనజీవమును, తన పునరుత్థానశక్తిని కుమ్మరించుటకు తిరిగి లేచెను. ఆ జీవముద్వారా మాత్రమే మనము ఆ మెల్లని సన్నని స్వరమును వినగలము. అది నిజముగా మెల్లని సన్నని స్వరమే. అది మానవస్వరము కాదు, మనము ఆయనను వెంబడించుచుండగా అనుభవముద్వారా మాత్రమే మనము దానిని గుర్తింపగలము.

నేను ఆ మెల్లని సన్నని స్వరమును ప్రతిదినము వినుచున్నానని దేవుని మహిమకొరకు సాక్ష్యమిచ్చుచున్నాను. గత ముప్పది ఏడు సంవత్సరములుగా నేను దానిని వినుచున్నాను. నేను ఎప్పుడైనను, ఎక్కడైనను నా ప్రభువుయొద్దకు వెళ్ళి ఆయనను వేడుకొనగలను. ఆయన ప్రేమతో, “ఇది మార్గము, దీనిలో నడువుము” అని పలుకును. శక్తిని పొందుటకు ఈ సరళమైన దైవికమార్గమును అనుసరించుడి, అప్పుడు మీ ప్రశ్నలన్నియు ప్రతిదినము జవాబియ్యబడును. మోకరించి, మీ ప్రశ్నలన్నిటిని కాగితముపై వ్రాసి, “ప్రభూ, ఇవిగో ప్రశ్నలు, దయచేసి వీటికి జవాబిమ్ము. నేటి మార్గమును నాకు చూపి నన్ను నడిపింపుము. ఈ వ్యక్తికిగాని ఆ వ్యక్తికిగాని అవసరమైన సందేశమిమ్ము. నీ మహిమకొరకు జీవించుటకు నాకు సహాయపడుము. ఈ క్రింది సంగతులయందు నీ చిత్తమును నాకు చూపి నాతో మాట్లాడుము” అని చెప్పుడి. దీనిని రోజురోజు ప్రయత్నించుడి.

ఈ సరళమైన మార్గమును అనుసరించుటకు మీరు మొదట హృదయపూర్వకముగా పశ్చాత్తాపపడవలెను. ఏ దాపరికమును లేకుండ ప్రతి పాపమును ఒప్పుకొనవలెను.

హృదయపూర్వకముగా విశ్వసించి, సరళమైన విశ్వాసముతో ఇట్లు చెప్పుడి: “ప్రభువైన యేసుక్రీస్తు నా పాపముల కొరకు నాకు బదులుగా మరణించి, నా శిక్షావిధిని తొలగించెను.” మీకొరకు మరణించినందుకు ఆయనకు కృతజ్ఞతలు చెల్లించుడి. ఆయనతో, “ప్రభూ, నేను త్రాగుడు అలవాటుకు, సినిమాలకు వెళ్ళుటకు మొదలైనవాటికి చనిపోగోరుచున్నాను. కోపము, చింత మొదలైన ఇతర దుర్గుణములకు, బలహీనతలకు నేను చనిపోగోరుచున్నాను. ప్రభూ, నా పాపములను నీ సమాధిలో పాతిపెట్టుము. ప్రతి శోధనకును, పరీక్షకును నీ పునరుత్థానశక్తిని నాలోనికి కుమ్మరించుము. నాతో మాట్లాడుము. నా భార్యకుగాని, భర్తకుగాని, స్నేహితునికిగాని, పొరుగువానికిగాని సందేశమిమ్ము. నీ వాక్యమునుండి నీ మరుగైన రహస్యములను, నేటికొరకును భవిష్యత్తుకొరకును నీ ప్రణాళికను నాకు చూపుము” అని చెప్పుడి. అప్పుడు దేవుని స్వరము ప్రతిదినము మీ చెవులలోనికి వచ్చుటను మీరు కనుగొందురు.

అధ్యాయం 2