ఉప్పు రుచిపరచడం — 1: విరిగి నలిగిన హృదయం

3 ఉప్పు రుచిపరచడం— 1: విరిగి నలిగిన హృదయం

ఎన్నుకోబడిన కొద్దిమంది ఉప్పుగా మారతారు 'మీరు లోకమునకు ఉప్పైయున్నారు' అనే ఈ చిన్న లేఖనభాగం వైపు నేను మీ దృష్టిని మళ్ళిస్తూ వచ్చాను (Matthew 5: 13). ప్రభువైన యేసు తన కొద్దిమంది శిష్యులతో గలిలయలో తిరుగుతూ ఉండేవాడు. దేశంలోని వివిధ ప్రాంతాలనుండి జనసమూహాలు ఆయనను వెంబడించాయి; దెకపొలి, గలిలయ, యొర్దాను, యెరూషలేము, యూదయ, యొర్దాను అవతలినుండి కూడా వచ్చారు. వారు ఆయనయొక్క అద్భుతాలను గురించి విన్నారు; అందుకే వారు ఆయనచేత స్వస్థపరచబడటానికి అన్ని ప్రాంతాలనుండి వచ్చారు. కానీ మన ప్రభువుకు ఒక గొప్ప లక్ష్యం ఉంది, అదేమిటంటే భూమిపై చేయవలసిన పనికోసం కొద్దిమంది శిష్యులను పిలవడం. జనసమూహం తనను వెంబడిస్తుండటం చూసినప్పుడు, ఆయన ఒక కొండ ఎక్కారని మనకు తెలియజేయబడింది. గలిలయకు దూరంలో లేని ఆ కొండపై, ఆయన ప్రసిద్ధమైన, అద్భుతమైన కొండమీది ప్రసంగాన్ని ప్రకటించారు. ఆ ప్రసంగం మత్తయి 5, 6, 7 అధ్యాయాలలో ఉంది. ఆ సమయంలో ఆయన ఈ ప్రకటన చేశారు, 'మీరు లోకమునకు ఉప్పైయున్నారు'. లోకమంతటికీ ఉప్పును, వెలుగును సమకూర్చడానికి ఆయన పాపులను వెదకి రక్షించడానికి వచ్చారు. ప్రభువు చేసినదంతా ఈ ఆలోచనతోనే చేశారు: మానవజాతికి శాశ్వతమైన ఆనందాన్ని తీసుకురాగల ఉప్పును, శాశ్వతజీవాన్ని ఇవ్వగల వెలుగును సమకూర్చడం.

మనం ఆయన చేతిలోనికి రావడం ద్వారా ఎలా ఆయనయొక్క ఉప్పుగా మారగలమో దేవుని వాక్యంనుండి మనం చూస్తాము. ఉప్పు సముద్రతీరంలో ఎలా తయారవుతుందో మీలో కొందరు చూసి ఉండవచ్చు. ఉప్పుతో నిండిన సముద్రపు నీరు ఆవిరైపోయి ఉప్పు మిగిలిపోతుంది. ఈ ఉప్పు ఉపయోగించే ముందు శుద్ధి చేయవలసిఉంటుంది. దేవుడు మంచి, స్వచ్ఛమైన ఉప్పును కోరుకుంటున్నారు. మనలో ప్రతి ఒక్కరూ ఆ మంచి, స్వచ్ఛమైన ఉప్పుగా మారగలరు. మనం చాలా చిన్న సంఖ్యలో ఉన్నప్పటికీ, మనం ఎక్కడున్నా దేశమంతటికీ ఆనందాన్ని తీసుకురావడానికి సరిపోతాము. వేలమందికి ఆహారం అందించడానికి మనకు అనేక బస్తాల బియ్యం అవసరమైనా, అంత ఎక్కువ ఉప్పు మనకు అవసరం లేదు. మంచి ఆహారం చేయడానికి మనకు ఎక్కువ ఉప్పు అవసరం లేదు. కొద్దిపాటి ఉప్పు అనేకమందికి అవసరమైన ఆహారానికి రుచినివ్వగలదు. విశ్వాసులు కేవలం కొద్దిమంది, బహుశా ఇద్దరు, ముగ్గురు, నలుగురు లేదా ఐదుగురు మాత్రమే ఉన్న నగరాలు, పట్టణాలు, గ్రామాలు ఉన్నాయి. అయినా ఆ కొద్దిమంది విశ్వాసులు ఆ స్థలంలోని ప్రజలందరికీ ఆనందాన్ని, సంతోషాన్ని, వెలుగును తీసుకురావడానికి సరిపోతారు. అందుకే ప్రభువు విశ్వాసులను కొండపై ఉన్న పట్టణంతో పోల్చారు. కొండపై ఉన్న పట్టణం అనేక మైళ్ళదూరంనుండి కనిపిస్తుంది. ప్రభువైన యేసుక్రీస్తులో జీవం, వెలుగు ఉన్నాయని ప్రజలకు చెప్పడానికి ఒక్క విశ్వాసి కూడా సరిపోతారు.

జనసమూహాలు ప్రభువైన యేసుక్రీస్తును వెంబడించినప్పటికీ, వారిలో కొద్దిమంది మాత్రమే ఆయనయొక్క శిష్యులయ్యారు. అయినా ఆ కొద్దిమంది లోకాన్ని తలక్రిందులు చేశారు. వారు కేవలం సాధారణ మనుష్యులే, కానీ వారు ప్రభువైన యేసుక్రీస్తుయొక్క శిష్యులు కాబట్టి, వారు ఉప్పుగా మారారు. వారి ద్వారానే, దేవుని ప్రేమ లోకంలోని ప్రతి జాతికి తెలియజేయబడిందని మీరు కనుగొంటారు.

నిజమైన ఉప్పు—దైవప్రేమ ఉత్తర భారతదేశంలోని కొన్ని ప్రాంతాలలో, ఒక సందర్శకుడు వచ్చినప్పుడు, వారు మొదట అతనికి చాలా ఉప్పగా ఉండే ఏదైనా తినడానికి, ఒక గ్లాసు నీళ్ళు ఇస్తారు. ఇలా చేయడంలో వారు సందర్శకునితో, "మేము మిమ్మల్ని స్వీకరించి ఆహ్వానిస్తున్నాము, మా ప్రేమను చూపించడానికి దీనిని ఇస్తున్నాము" అని చెబుతారు. అందుకే ఉప్పు నిజమైన, తీవ్రమైన ప్రేమను సూచిస్తుంది.

నిజమైన ప్రేమను విశ్వాసులు మాత్రమే చూపించగలరు. మీ తల్లి, తండ్రి, సోదరులు, సోదరీమణులు, లేదా స్నేహితులు మీ తోటివిశ్వాసుల మాదిరిగా మిమ్మల్ని ప్రేమించలేరు. మానవప్రేమ మారుతుంది. కాలం, పరిస్థితులు, జీవన స్థితిగతులు మారినకొద్దీ, మానవప్రేమ కూడా మారుతుంది. కానీ ప్రభువైన యేసుక్రీస్తుయొక్క ప్రేమ ఎన్నడూ మారదు. ప్రభువైన యేసుక్రీస్తు, 'మీరు లోకమునకు ఉప్పైయున్నారు' అని చెప్పినప్పుడు, మీరు ఎక్కడికి వెళ్ళినా మీ ద్వారా తన నిత్యజీవం చూపబడాలని, ప్రకటించబడాలని, బోధించబడాలని ఆయన ఉద్దేశిస్తున్నారు. 1,155 కంటే ఎక్కువ భాషలు మాట్లాడే అనేక జాతుల ప్రజలు, తిరిగి జన్మించినవారి ద్వారా అదే ప్రేమను పొందారు. సమాజంచేత పూర్తిగా తిరస్కరించబడిన నరమాంసభక్షకులు, హంతకులు, దొంగలవంటి అన్ని రకాల స్థితులలోని ప్రజలు ఇప్పుడు దేవుని ప్రేమను గురించి ఇతరులకు సాక్ష్యమిస్తున్నారు.

గత యుద్ధసమయంలో, ఒక ఆసుపత్రిలో తీవ్రంగా గాయపడిన ఒక సైనికుడు పడుకుని ఉన్నాడు. రాజు జార్జి ఆసుపత్రిని సందర్శించి రోగులను చూడటానికి వెళ్ళినప్పుడు, అతడు ఈ వ్యక్తియొక్క పడకయొద్దకు వచ్చాడు. అతనియొక్క బాధను, వేదనను చూసి అతనికోసం చాలా జాలిపడ్డాడు. అతడు అతనితో, 'యువకుడా, నేను నీ కోసం ఏమైనా చేయగలనా? నీకేమైనా విన్నపం ఉందా?' అని అడిగాడు. సైనికుడు, 'మహారాజా, నాకు ఒకే ఒక ఉపకారం కావాలి. ఈ నెలలన్నీ నన్ను ఇంత దయతో, ప్రేమతో సేవించిన ఆ నర్సుకు దయచేసి కృతజ్ఞతలు చెప్తారా?' అని చెప్పాడు. అతని కళ్ళలో ఈ మాటలు పలుకుతున్నప్పుడు కన్నీళ్ళు వచ్చాయి. 'నా సొంత తల్లి లేదా సోదరి కూడా ఆ నర్సులా నన్ను శ్రద్ధగా చూసుకుని ఉండేవారు కారు. ఆమె ఈ రోజులు, రాత్రులన్నీ నన్ను ఇంత దయతో, ప్రేమతో, ఓపికతో సేవించింది. దయచేసి, మహారాజా, నా తరపున ఆమెకు కృతజ్ఞతలు చెప్పండి.' కాబట్టి రాజు ఆమెను పిలిచి, 'నర్సు, నా గాయపడిన సైనికుని తరపున, నీ దయగల సేవకు నేను నీకు కృతజ్ఞతలు చెప్పాలనుకుంటున్నాను' అన్నాడు. నర్సు జవాబిస్తూ, 'మహారాజా, నేను అతనిని సేవించలేదు. నాలో నివసిస్తున్న దేవుడే అతనిని సేవించారు. దయచేసి, మహారాజా, ప్రభువైన యేసుక్రీస్తు తన కృపద్వారా నన్ను రక్షించి, అతనిపట్ల నాకు ప్రేమను ఇచ్చారు' అని చెప్పింది. అదే నిజమైన ప్రేమ, దానిని స్నేహితులనుండిగానీ బంధువులనుండిగానీ పొందలేము. ఐహిక ప్రేమ ఐహిక పరిస్థితులపై ఆధారపడుతుంది; కానీ దైవికప్రేమ అలా కాదు. అందుకే ప్రభువు, 'మీ శత్రువులను ప్రేమించండి!' అని చెప్పారు. ఎంత అద్భుతమైన ఉప్పు! మనలను ద్వేషించి శపించేవారిని కూడా మనం ప్రేమించగలం. వారి బాధనుండి తాత్కాలిక ఉపశమనం ఇవ్వడానికి మాత్రమే కాదు, నిత్యత్వానికి అదే ప్రేమలో వారిని భాగస్థులుగా చేయడానికి కూడా మనం వారిని ప్రేమించగలం. ఆహారం కేవలం పప్పు అయినప్పటికీ, అది సరిగ్గా వండకపోయినా, అందులో వేసిన ఉప్పు దానిని ఉప్పులేని మటన్, కోడిమాంసం లేదా చేపలకంటే రుచికరంగా చేస్తుంది. దైవికప్రేమ విషయంలో కూడా ఇదే విధంగా ఉంటుంది. ప్రజలు ఎక్కడున్నా, మనం వారికి నిత్యత్వానికి ఏదైనా అందించగలం. మనం వారితో సంపర్కంలోకి వచ్చినప్పుడు, దైవికఉప్పుయొక్క నిజమైన రుచిని వారికి ఇవ్వగలం.

ఉప్పు అనేక విధాలుగా నిజమైన ఉపశమనాన్ని తీసుకురాగలదు. కొందరు ఎక్కువ నెయ్యి, వెన్న తింటారు, వారి కడుపులు ఉబ్బడం ప్రారంభమవుతాయి. అందుకే వారు ఎక్కడికి వెళ్ళినా సోడా తీసుకోవాలి. అటువంటివారికి కడుపులోని ఉబ్బరాన్ని తీసివేయడానికి ఉప్పు ఉపయోగపడుతుంది. వాస్తవానికి ఉప్పు మీకు అనేక రోగాలనుండి ఉపశమనం ఇవ్వగలదు. మనలో ప్రతి ఒక్కరూ దేవునియొక్క నిజమైన ఉప్పుగా మారవలసియుంది.

మనం నిజమైన ఉప్పుగా ఎలా మారతాము మనం Matthew 5లోని 3వ వచనంలో మనం అటువంటి నిజమైన ఉప్పుగా ఎలా చేయబడగలమో చూస్తాము. మనకు దీనమైన, విరిగి నలిగిన ఆత్మ ఉండాలి. అదే ఉప్పు శుద్ధీకరణలో మొదటి దశ. ప్రపంచవ్యాప్తంగా ప్రజలు దేవుని వెదకడానికి ప్రయత్నిస్తూ వచ్చారు. అన్ని వర్గాలు, మతాలకు చెందిన ప్రజలు దేవుని వెదకాలనే కోరికతో అనేక గొప్ప భవనాలను నిర్మించడానికి ప్రయత్నిస్తూ వచ్చారు, అటువంటి గొప్ప భవనాలద్వారా వారు దేవుని కనుగొనగలరని అనుకుంటూ. వారు ఈ భవనాలపై చాలా సమయాన్ని, శక్తిని, డబ్బును ఖర్చు చేస్తారు.

కొన్ని సంవత్సరాల క్రితం, లెబనాన్‌లో రోమన్లు నిర్మించిన చాలా పురాతనమైన దేవాలయ శిథిలాలను నేను చూశాను. అక్కడ ఇప్పటికీ నిలిచియున్న భారీ స్తంభాలను, చాలా పెద్ద రాళ్ళతో నిర్మించిన 40 లేదా 50 అడుగుల ఎత్తైన మందమైన గోడలను మనం చూడగలం. అంత పెద్ద రాళ్ళను అంత ఎత్తుకు ఎలా లేపగలిగారో ఆశ్చర్యం కలుగుతుంది. దేవుని కనుగొనాలనే ఆకాంక్షతో ప్రజలు అనేక కష్టాలను ఎదుర్కొని ఎత్తైన భవనాలను నిర్మించారు. కానీ మీరు లోపలికి వెళ్ళినప్పుడు అక్కడ సాతానును కనుగొంటారు! పాలస్తీనాలో నేను అనేక రోమన్ కేథలిక్ భవనాలను చూశాను—బేత్లెహేము, నజరేతు, యెరూషలేము, గలిలయలలో భారీ భవనాలు. అవి చాలా గొప్పగా భవనాలు; కానీ లోపల, చీకటి, చెడు, సిగ్గు, పాపం తప్ప మరేమీ లేదు. అటువంటి భవనాలద్వారా వారు దేవునికి దగ్గరవగలరని, ఆయన సన్నిధిని మరింత అనుభవించగలరని వారు అనుకుంటారు (చూ. Isaiah 57 :15 మరియు 66: 2). క్రైస్తవులు, మహమ్మదీయులు, యూదులు లేదా మరెవరైనా నిర్మించిన మనుష్యులచేతులతో కట్టిన భవనాలలో దేవుడు నివసించడు. సొలొమోను నిర్మించిన చాలా గొప్ప దేవాలయం తమకు ఉంది కాబట్టి తాము దేవుని బాగా తెలుసుకున్నామని యూదులు అనుకున్నారు. కానీ అదే దేవాలయం శిథిలంగా మారింది, ఇప్పుడు మీరు యెరూషలేముకు వెళ్తే, అక్కడ మహమ్మదీయ మసీదులు కనిపిస్తాయి. మనుష్యులు నిర్మించిన భవనాలలో దేవుడు నివసించడు. ఆయన విరిగి నలిగిన హృదయంలో నివసిస్తారు. ఎంత గొప్ప గౌరవం, భాగ్యం! దేవుడు స్వయంగా మనలో నివసించడానికి వచ్చినప్పుడు మాత్రమే, మనం లోకమునకు ఉప్పు కాగలం. అప్పుడు మాత్రమే మనం మనుష్యులందరికీ, మన శత్రువులకు కూడా నిజమైన ప్రేమను చూపించగలం. లేకపోతే మన హృదయాలు అసూయ, శత్రుత్వం, భ్రష్టత్వంతో నిండి ఉంటాయి. ఈ రోజుల్లో లోకమంతా ద్వేషం, చేదుతనంతో నిండి ఉంది; జాతికి జాతికి వ్యతిరేకంగా, సోదరునికి సోదరునికి వ్యతిరేకంగా, స్నేహితునికి స్నేహితునికి వ్యతిరేకంగా, పిల్లలకు తల్లిదండ్రులకు వ్యతిరేకంగా. ఎందుకు? ఎందుకంటే వారిలో ఉప్పు లేదు.

కొన్నిసార్లు దేవుడు మనలను నిజంగా దీనులుగా చేయడానికి అనేక బాధాకరమైన మార్గాలను ఉపయోగిస్తాడు. దావీదు Psalm 51: 17లో ఏమి చెప్పారో చదవండి. అతడు చాలా చేదైన అనుభవంద్వారా తన పాఠాన్ని నేర్చుకున్నాడు. 1 Samuel 16: 12, 18లో, దావీదు యువకుడిగా ఉన్నప్పుడు అతని బాహ్య అర్హతలను మనం చూస్తాము. అతనికి ఎన్ని మంచి బాహ్యసుగుణాలు ఉండేవి. అతడు వాయిద్యం వాయించగలిగేవాడు, గొప్ప యుద్ధవీరుడు, చాలా వివేకవంతుడు, జ్ఞానవంతుడు, రాజుగా ఉండదగినవాడు. అయినా అతడు తన సొంత హృదయంయొక్క అంతరంగ మలినత్వాన్ని ఎన్నడూ తెలుసుకోలేదు. అతడు శరీరంచేత తీవ్రంగా శోధించబడే సమయం వచ్చింది. ఈ కథను మీరు 2 సమూయేలు 11లో కనుగొంటారు. సాతాను కపటమైన, సూక్ష్మమైన మార్గంలో అతనిని మోసగించాడు. ఆ గొప్ప, జ్ఞానవంతుడైన, ఘనమైన రాజు వ్యభిచారియైనాడు. ఆ పాపం కారణంగా, అతడు మోసగాడు, వేషధారి, కపటుడు, చివరకు హంతకుడు అయ్యాడు. అతడు జ్ఞానవంతుడైన, ఘనమైన రాజు అయినప్పటికీ సాతానుచేత మోసగించబడ్డాడు.

ప్రతి మనిషి అలా మోసగించబడే అవకాశం ఉంది. ఆ పతనం తర్వాత, దావీదు ఒక పాఠం నేర్చుకున్నాడు. కాబట్టి ఇప్పుడు అతడు తన హృదయంలో గొప్ప దుఃఖంతో, 'పాపములోనే నా తల్లి నన్ను గర్భము ధరించెను' అని చెబుతున్నాడు (Psalm 51:5). మానవహృదయంయొక్క మలినస్థితిని అతడు గ్రహించడం మొదలుపెట్టాడు.

చాలా అందంగా, తీయగా, ఆకర్షణీయంగా కనిపించే కొంతమంది పిల్లలు ఉంటారు. వారు ఎంత ఆకర్షణీయంగా, ప్రేమగా, తీయగా ఉంటారంటే మీరు వారి కాలిగోళ్ళను ముద్దుపెట్టుకోవాలనిపిస్తుంది. కానీ రెండు మూడు గంటల తర్వాత, వారు మొండిగా, కోపంగా మారి, తన్నడం ప్రారంభించినప్పుడు, వారు సాతానులా కనిపిస్తారు! దేవుని వాక్యం చెప్పినట్లు, మనమందరం పాపస్వభావంతో పుట్టాము కాబట్టి ఇది జరుగుతుంది.

ఇప్పుడు దావీదు, 'ఓ దేవా, నా పాపములను క్షమించుము; నీకు విరోధముగానే నేను పాపము చేసి, నీ దృష్టికి ఈ దుష్కార్యము చేసితిని. నన్ను కడుగుము, నేను హిమముకంటె తెల్లనివాడనగుదును' అని మొరపెట్టాడు. చూడండి, అతడు తన అంతరంగ మలినత్వాన్ని గ్రహించాడు. అతడు కడుగబడాలని, 'ఓ ప్రభూ, నన్ను శుద్ధిచేయుము, నన్ను శుద్ధిచేయుము' అని మొరపెడుతున్నాడు. ఇప్పుడు ఆంగ్లంలో 'purge' అనే పదం అగ్నిలో బంగారం శుద్ధిచేయబడటానికి వర్తిస్తుంది. బంగారాన్ని కేవలం నీళ్ళలో కడగడం ద్వారా శుభ్రం చేయలేరు. దానిని అగ్నిలో శుద్ధిచేయాలి, లేదా 'purge' చేయాలి. బంగారం శుద్ధిచేయబడినప్పుడు అది ఏడుసార్లు అగ్నిగుండా వెళ్ళవలసి ఉంటుంది. ఈ శుద్ధీకరణ ప్రక్రియను 'purging' అని పిలుస్తారు. ఈ శుద్ధీకరణద్వారా, లోపల దాగియున్న మురికి కూడా బయటకు వచ్చి పూర్తిగా తొలగించబడుతుంది. మన హృదయాలలో మనకు ఎంత భ్రష్టత్వం, చెడు, మలినత్వం ఉన్నాయో మనకు తెలియదు. లోపలికి వచ్చే దేవుని వెలుగు మాత్రమే దానిని చూడటానికి మనకు వీలు కల్పిస్తుంది. మీరు ఎలాంటివారో మీకు తెలిసినప్పుడు, మీరు దావీదులా, 'ప్రభూ, నన్ను శుద్ధిచేసి, నన్ను క్షుణ్ణంగా కడుగుము. నన్ను లోపలా బయటా శుభ్రపరచుము. అన్ని దుష్టత్వాలనుండి నన్ను శుభ్రపరచుము' అని మొరపెడతారు. అటువంటి మొర వెలువడే హృదయాన్ని విరిగి నలిగిన హృదయం అని పిలుస్తారు. మీ హృదయం అలా లేకపోతే మీరు రుచిపోయిన ఉప్పులాగే ఉంటారు. దేవుడు వచ్చి మీలో నివసించలేరు. దావీదులా మీరు మంచి ఉప్పుగా మారాలంటే, మిమ్మల్ని శుద్ధిచేయమని ప్రభువుకు మొరపెట్టుకోండి.

నిజమైన ఉప్పు దీవెనను తీసుకువస్తుంది దావీదుయొక్క కీర్తనలు లోకమంతటా మానవజాతికి ఎంత ఆదరణను తీసుకువచ్చాయో చూడండి. దుఃఖంలో, కష్టంలో, నిరుత్సాహంలో ఉన్న మనుష్యులు కీర్తనల గ్రంథాన్ని చదివారు. Psalms 23. 91, 103, 104ల ద్వారా ఎంతమంది దీవించబడ్డారో! ఈ అద్భుతమైన కీర్తనలన్నింటిలో దైవికఉప్పు ఉంది, ప్రతి రకమైన గాయాన్ని కలిగిన మనుష్యులను స్వస్థపరుస్తుంది. అవి ఎంతోమంది కన్నీళ్ళను తుడిచివేశాయి, ఎంతోమంది భారాలను ఎత్తివేశాయి, ఎంతోమందికి సమాధానాన్ని తీసుకువచ్చాయి. దావీదు విరిగిన హృదయంగల వ్యక్తిగా మారిన తర్వాతే, అతడు నిజమైన ఉప్పుగల వ్యక్తి అయ్యాడు. దైవికఉప్పుగా మారడంలో ఇది మొదటి దశ; 'ఆత్మలో దీనులైనవారు ధన్యులు; పరలోకరాజ్యము వారిదే' (Matt. 5: 3). ఇప్పుడు అటువంటి ప్రజలకు ఎటువంటి బహుమానం లభిస్తుందో చూడండి. వారు దేవుని నివాసస్థలంగా, దేవుని ఉప్పుగా మారడమే కాదు, దేవుని వాక్యం ఇక్కడ చెబుతుంది, "పరలోకరాజ్యము వారిదే!" వారు దేవునియొక్క పరిశుద్ధరాజ్యానికి భాగస్థులు, వారసులు అవుతారు. ఇది బైబిలుజ్ఞానంద్వారాగానీ, కళాశాల డిగ్రీలద్వారాగానీ, మంచి ప్రసంగాలద్వారాగానీ, పాటలద్వారాగానీ, అద్భుతాలద్వారాగానీ సాధ్యం కాదు, కానీ విరిగిన హృదయంద్వారా సాధ్యమవుతుంది. మీరు దేవుని ఎదుట మరింత మరింత దీనులుగా మారాలి. ఇది జీవితకాలం నేర్చుకోవలసిన పాఠం. అందుకే మన ఆత్మీయ దారిద్ర్యాన్ని, మన అంతరంగ భ్రష్టత్వాన్ని మనం తెలుసుకోవాలని ప్రభువు చెబుతున్నారు. మనలను మార్చడానికి దేవుని కృప, ప్రేమ అందుబాటులో ఉన్నాయి.

X-రే సహాయం లేకుండా నిర్ధారించలేని కొన్ని రోగాలు ఉన్నాయి. దానిలేకుండా, చాలా నేర్పరియైన వైద్యుడు కూడా అటువంటి రోగాలను సరిగ్గా నిర్ధారించలేడు. వారు X-రే ఫోటో తీసిన తర్వాత, మెదడు లేదా పేగులు అనేక సంవత్సరాలుగా ఆ రోగంతో ఉన్నాయని, రోగికి అస్సలు తెలియకుండానే కనుగొనవచ్చు. X-రే శరీరంలో దానిని బయటపెడుతుంది.

గొంతు, దగ్గు సమస్యతో బాధపడుతున్న ఒక యువకుడిని నాకు తెలుసు. అది సాధారణ జలుబు అని అతడు అనుకున్నాడు.

ఒకరోజు ఎవరో అతనికి మంచి డాక్టర్ దగ్గరకు వెళ్ళి నిర్ధారణ చేయించుకోమని సలహా ఇచ్చారు. అతడు వెళ్ళాడు, డాక్టర్ ఎక్స్-రే తీయాలని చెప్పారు. అది తీసి పరీక్షించిన తర్వాత, డాక్టర్ ఆ యువకునితో, 'క్షమించండి, యువకుడా, మీకు క్షయవ్యాధి ఉంది' అని చెప్పారు. అతడు ఆ ఎక్స్-రే ఫోటోను తీసుకుని ఏడుస్తూ ఇంటికి వెళ్ళాడు. అతని తల్లి, 'ఏమైంది? ఎందుకు ఏడుస్తున్నావు?' అని అడిగింది. అతడు, 'నాకు క్షయవ్యాధి ఉంది!' అని చెప్పాడు. అప్పుడు కుటుంబమంతా ఏడవడం ప్రారంభించింది. వారు పేదవారు. అతనిని సానటోరియంకు పంపడానికి వారివద్ద డబ్బు లేదు. కాబట్టి వారు అతనిని సానటోరియంలో సరిగ్గా చికిత్స చేయించడానికి వీలైనదంతా అమ్మేశారు. అప్పుడు అతడు స్వస్థత పొందాడు.

ఇప్పుడు నిజమైన వెలుగు మీరు ప్రభువులో పొందే వెలుగు. దేవుని వెలుగు మనలోనికి రావాలి, తద్వారా మనం మన స్వంత వ్యక్తిగత స్థితిని చూడగలం. ఆయన చాలా స్పష్టంగా, 'నేను లోకమునకు వెలుగుగా ఉన్నాను' అని చెప్పారు. ఆయన కొవ్వొత్తియొక్క వెలుగుగానీ, సూర్యునియొక్క వెలుగుగానీ, విద్యుద్దీపంయొక్క వెలుగుగానీ కాదు; ఆయన నిత్యమైన వెలుగు. క్రొత్తసృష్టిలో ఎటువంటి దీపం అవసరం లేదని దేవుని వాక్యంలో మనకు చెప్పబడింది. దేవుని గొఱ్ఱెపిల్లయైన ప్రభువైన యేసుక్రీస్తే ఆ వెలుగుగా ఉంటారు. ఇప్పుడు ఈ నిత్యమైన, దైవికమైన, పరిశుద్ధమైన వెలుగు ఇప్పుడు మనకు అందించబడుతోందన్నది రహస్యం. మొదటగా, ఆ వెలుగుయొక్క సహాయంతో, మనం మన సొంత పాపభరితమైన మలినత్వాన్ని, నిజమైన స్థితిని చూస్తాము. అదే మన ఎక్స్-రే కానుంది. ఆ యువకుడు ఫోటో చూసిన తర్వాత ఆందోళనచెంది ఏడ్వడం మొదలుపెట్టినట్లే, అదేవిధంగా, దేవుని వెలుగు మీలోనికి వచ్చినప్పుడే, మీరు మీ నిజమైన స్థితిని చూసి నిజంగా విచారిస్తారు.

ఒక వ్యక్తి ఫోటో తీయించుకోవడానికి ఫోటోగ్రాఫర్ దగ్గరకు వెళ్ళినప్పుడు అతడు సాధారణంగా కోటును, గడియారాన్ని, ఇతర వస్తువులను అరువు తెచ్చుకుని, తనను తాను ఉత్తమంగా చూపించుకోవడానికి ప్రయత్నిస్తాడు. అతని జుట్టు అందంగా దువ్వబడి, చక్కగా ఉంటుంది. అతడు తప్పకుండా షేవ్ చేసుకుని, తన ముఖానికి పౌడర్ కూడా వేసుకుంటాడు. అతని ముఖం వాస్తవానికి వికారంగా, నల్లగా ఉన్నప్పటికీ, అది చాలా బాగా ఫోటో వస్తే, అతడు సంతోషిస్తాడు, 'నా ఫోటో చూడండి!' అని చెబుతుంటాడు. ఇప్పుడు, బైబిలు మీకు అటువంటి తప్పుడు, మోసపూరిత ఫోటోను ఇవ్వదు! మీరు నిజంగా ఎలా ఉన్నారో స్పష్టంగా, సూక్ష్మంగా చూసేలా చేయబడతారు. మన నిజమైన స్థితిని మనం చూసేలా చేయబడినప్పుడు మనం కృతజ్ఞులమై ఉండాలి. అప్పుడు మనం విరిగిన హృదయంతో, 'అవును, ప్రభూ, నాకు ఎన్నడూ తెలియదు; నా హృదయం చాలా దుష్టమైనది, పాపభరితమైనది, మలినమైనది. నామీద కరుణచూపుము!' అని ఆయనను వేడుకోగలము. అప్పుడు ఆయన, 'నేను నిత్యప్రేమతో నిన్ను ప్రేమించాను; కరుణాబంధములతో నిన్ను నాయొద్దకు లాగుకొంటిని' అని జవాబిస్తారు. ఆయన నన్ను ప్రేమిస్తారు కాబట్టి, నన్ను కడగడానికి, నాలోనికి రావడానికి, ఆయన నా నిజమైన స్థితిని నాకు చూపిస్తారు.

ఇప్పుడు, భారతదేశంలోని ఏదో ఒక గొప్ప వ్యక్తి కొన్ని గంటలపాటు మీ ఇంట్లో ఉండటానికి రావాలనుకుంటున్నారని ఈరోజు మీకు చెప్పబడిందని అనుకోండి. మీరు చాలా సన్నాహాలు చేస్తారు. 'ఫలానావారు నా ఇంటికి వస్తున్నారు!' అని చెబుతారు. మీరు ఇంట్లోని ప్రతి మూలను శుభ్రం చేస్తారు. మీరు గత ఇరవైఐదు సంవత్సరాలుగా మీ బాత్రూంను కడగకపోయినప్పటికీ, ఆరోజు మీరు పెద్ద డబ్బా ఫినైల్ కొని, సందర్శకుడికి మంచి వాసన వచ్చేలా ఇల్లంతా శుభ్రం చేస్తారు. ఇక్కడ మనం చూసేదేమిటంటే, ప్రభువైన యేసుక్రీస్తు నిత్యత్వం కోసం మనలో వచ్చి నివసించాలనుకుంటున్నారు. అందుకే మనం శుద్ధిచేయబడాలి. మనకు విరిగి నలిగిన హృదయం ఉండాలి. ఉప్పుగా మారే ప్రక్రియకు అదే ఆరంభం. పరిశుద్ధుడైన, ప్రేమగల దేవుడు, మహాదేవుడు, జీవముగల దేవుడు మనలో వచ్చి నివసించాలనుకుంటున్నారు.

మీరు ఆ ఉప్పుగా మారారా? మీ స్నేహితులు, పొరుగువారు, ఇతరులు మీ ద్వారా ఆ దైవికఉప్పును రుచిచూడగలుగుతున్నారా? కాకపోతే, దయచేసి ఇప్పుడే నిజమైన ఉప్పుగా మారండి. అప్పుడు మీరు ఎక్కడికి వెళ్ళినా, మీ మాటలద్వారా కన్నీళ్ళు తుడువబడతాయని, అనేక భారాలు తొలగించబడతాయని మీరు కనుగొంటారు. అనేక ఇళ్ళకు కొత్త ఆనందం వస్తుంది. మీ మొత్తం పట్టణం, దేశం మీద్వారా దీవించబడతాయి. రోజురోజుకూ, మరింత మంది ప్రజలు మీద్వారా అటువంటి దైవికఉప్పుగా మారడానికి సిద్ధపరచబడతారు.

దేవుడు దీనమైన హృదయంలో, విరిగిన ఆత్మలో నివసిస్తారు. ఆయన మనకు తన సర్వాన్ని ఇవ్వడానికి వస్తారు, మనలో శాశ్వతంగా నివసిస్తారు. ప్రజలు బంధువులను సందర్శించడానికి వెళ్ళినప్పుడు, సాధారణంగా, వారు ఖాళీచేతులతో వెళ్ళరు; వారు తీపిపదార్థాలు లేదా పండ్లు తీసుకువెళతారు. నేను చిన్నపిల్లవాడిగా ఉన్నప్పుడు, నా మామయ్య మమ్మల్ని సందర్శించడానికి వస్తున్నారని నా తల్లి ఒకసారి నాకు చెప్పింది. 'ఆయన చాలా దయగలవాడు, చాలా ధనవంతుడు కూడా; ఆయన చివరిసారి వచ్చినప్పుడు మాకు చాలా వస్తువులు తెచ్చారు' అని ఆమె చెప్పింది. కాబట్టి నా మామయ్య వచ్చినప్పుడు, అతడు మా ఇంటి తలుపులోనికి రాకముందే, నేను అతని జేబుల్లో నా చేతులు పెట్టాను; నిజంగానే, అందులో ఒక చిన్న పొట్లం ఉంది! దేవుడు మన హృదయాలలో వచ్చి నివసించినప్పుడు మనకు అన్నీ ఇస్తారు. ఆయన తన సంపూర్ణతను తీసుకువస్తారు. ఆయనతోపాటు రాజ్యమంతా ఉంది. ఆయనయొక్క సంపూర్ణ మహిమ మనకోసమే ఉంది. మీరు ఇప్పుడు విరిగి, ఆయన రక్తంతో కడుగబడరా?

దేవుడు మనలను విరిగిన హృదయం, నలిగిన ఆత్మగలవారిగా చేయుగాక.