Galathies

Romaynes

CAP 1. 1 Poul, the seruaunt of Jhesu Crist, clepid an apostle, departid in to the gospel of God; 2 which he hadde bihote tofore bi his profetis in holi scripturis of his sone, 3 which is maad to hym of the seed of Dauid bi the flesch, 4 and he was bifor ordeyned the sone of God in vertu, bi the spirit of halewyng of the ayenrisyng of deed men, of Jhesu Crist oure Lord, 5 bi whom we han resseyued grace and the office of apostle, to obeie to the feith in alle folkis for his name, 6 among whiche ye ben also clepid of Jhesu Crist, 7 to alle that ben at Rome, derlyngis of God, and clepid hooli, grace to you, and pees of God oure fadir, and of the Lord Jhesu Crist. 8 First Y do thankyngis to my God, bi Jhesu Crist, for alle you, for youre feith is schewid in al the world. 9 For God is a witnesse to me, to whom Y serue in my spirit, in the gospel of his sone, 10 that with outen ceessyng Y make mynde of you euere in my preieris, and biseche, if in ony maner sum tyme Y haue a spedi weie in the wille of God to come to you. 11 For Y desire to se you, to parten sumwhat of spiritual grace, 12 that ye be confermyd, that is, to be coumfortid togidere in you, bi feith that is bothe youre and myn togidere. 13 And, britheren, Y nyle, that ye vnknowun, that ofte Y purposide to come to you, and Y am lett to this tyme, that Y haue sum fruyt in you, as in othere folkis. 14 To Grekis and to barberyns, to wise men and to vnwise men, 15 Y am dettour, so that that is in me is redi to preche the gospel also to you that ben at Rome. 16 For Y schame not the gospel, for it is the vertu of God in to heelthe to ech man that bileueth, to the Jew first, and to the Greke. 17 For the riytwisnesse of God is schewid in it, of feith in to feith, 18 as it is writun, For a iust man lyueth of feith. For the wraththe of God is schewid fro heuene on al vnpite and wickidnesse of tho men, that withholden the treuthe of God in vnriytwisnes. 19 For that thing of God that is knowun, is schewid to hem, for God hath schewid to hem. 20 For the vnuysible thingis of hym, that ben vndurstondun, ben biholdun of the creature of the world, bi tho thingis that ben maad, yhe, and the euerlastynge vertu of hym and the godhed, so that thei mowe not be excusid. 21 For whanne thei hadden knowe God, thei glorifieden hym not as God, nether diden thankyngis; but thei vanyschiden in her thouyts, and the vnwise herte of hem was derkid. 22 For thei `seiynge that hem silf weren wise, thei weren maad foolis. 23 And thei chaungiden the glorie of `God vncorruptible in to the licnesse of an ymage of a deedli man, and of briddis, and of foure footid beestis, and of serpentis. 24 For which thing God bitook hem in to the desiris of her herte, in to vnclennesse, that thei punysche with wrongis her bodies in hem silf. 25 The whiche chaungiden the treuthe of God in to leesyng, and herieden and serueden a creature rathere than to the creatoure, that is blessid in to worldis of worldis. 26 Amen. Therfor God bitook hem in to passiouns of schenschipe. For the wymmen of hem chaungiden the kyndli vss in to that vss that is ayens kynde. 27 Also the men forsoken the kyndli vss of womman, and brenneden in her desiris togidere, and men in to men wrouyten filthehed, and resseyueden in to hem silf the meede that bihofte of her errour. 28 And as thei preueden that thei hadden not God in knowyng, God bitook hem in to a repreuable wit, that thei do tho thingis that ben not couenable; that thei ben fulfillid with al wickidnesse, 29 malice, fornycacioun, coueitise, weiwardnesse, ful of enuye, mansleyngis, strijf, gile, yuel wille, preuy bacbiteris, detractouris, 30 hateful to God, debateris, proude, and hiy ouer mesure, fynderis of yuele thingis, not obeschynge to fadir and modir, 31 vnwise, vnmanerli, withouten loue, withouten boond of pees, with outen merci. 32 The whiche whanne thei hadden knowe the riytwisnesse of God, vndirstoden not, that thei that don siche thingis ben worthi the deth, not oneli thei that don tho thingis, but also thei that consenten to the doeris. CAP 2. 1 Wherfor thou art vnexcusable, ech man that demest, for in what thing thou demest anothir man, thou condempnest thi silf; for thou doist the same thingis whiche thou demest. 2 And we witen, that the doom of God is aftir treuthe ayens hem, that don siche thingis. 3 But gessist thou, man, that demest hem that doen siche thingis, and thou doist tho thingis, that thou schalt ascape the doom of God? 4 Whether `dispisist thou the richessis of his goodnesse, and the pacience, and the long abidyng? Knowist thou not, that the benygnyte of God ledith thee to forthenkyng? 5 But aftir thin hardnesse and vnrepentaunt herte, thou tresorist to thee wraththe in the dai of wraththe and of schewyng of the riytful doom of God, 6 that schal yelde to ech man aftir his werkis; 7 sotheli to hem that ben bi pacience of good werk, glorie, and onour, and vncorrupcioun, to hem that seken euerlastynge lijf; 8 but to hem that ben of strijf, and that assenten not to treuthe, but bileuen to wickidnesse, wraththe and indignacioun, tribulacioun and angwisch, 9 in to ech soule of man that worchith yuel, to the Jew first, and to the Greke; 10 but glorie, and honour, and pees, to ech man that worchith good thing, to the Jew first, and to the Greke. 11 For accepcioun of persones is not anentis God. 12 For who euere han synned without the lawe, schulen perische withouten the lawe; and who euere han synned in the lawe, thei schulen be demyd bi the lawe. 13 For the hereris of lawe ben not iust anentis God, but the doeris of the lawe schulen be maad iust. 14 For whanne hethene men that han not lawe, don kyndli tho thingis that ben of the lawe, thei not hauynge suche manere lawe, ben lawe to hem silf, 15 that schewen the werk of the lawe writun in her hertis. For the conscience of hem yeldith to hem a witnessyng bytwixe hem silf of thouytis that ben accusynge or defendynge, 16 in the dai whanne God schal deme the priuy thingis of men aftir my gospel, bi Jhesu Crist. 17 But if thou art named a Jew, and restist in the lawe, and hast glorie in God, 18 and hast knowe his wille, and thou lerud bi lawe preuest the more profitable thingis, 19 and tristist thi silf to be a ledere of blynde men, the liyt of hem that ben in derknessis, 20 a techere of vnwise men, a maistir of yonge children, that hast the foorme of kunnyng and of treuthe in the lawe; 21 what thanne techist thou another, and techist not thi silf? Thou that prechist that me schal not stele, stelist? 22 Thou that techist that me schal `do no letcherie, doist letcherie? Thou that wlatist maumetis, doist sacrilegie? 23 Thou that hast glorie in the lawe, vnworschipist God bi brekyng of the lawe? 24 For the name of God is blasfemed bi you among hethene men, as is writun. 25 For circumcisioun profitith, if thou kepe the lawe; but if thou be a trespassour ayens the lawe, thi circumsicioun is maad prepucie. 26 Therfor if prepucie kepe the riytwisnessis of the lawe, whethir his prepucie schal not be arettid in to circumcisioun? 27 And the prepucie of kynde that fulfillith the lawe, schal deme thee, that bi lettre and circumcisioun art trespassour ayens the lawe. 28 For he that is in opene is not a Jew, nether it is circumsicioun that is openli in the fleisch; 29 but he that is a Jew in hid, and the circumcisioun of herte, in spirit, not bi the lettre, whos preisyng is not of men, but of God. CAP 3. 1 What thanne is more to a Jew, or what profit of circumcisioun? 2 Myche bi al wise; first, for the spekyngis of God `weren bitakun to hem. 3 And what if summe of hem bileueden not? Whethir the vnbileue of hem hath auoidid the feith of God? 4 God forbede. For God is sothefast, but ech man a liere; as it is writun, That thou be iustified in thi wordis, and ouercome, whanne thou art demed. 5 But if oure wickidnesse comende the riytwisnesse of God, what shulen we seie? Whether God is wickid, that bryngith in wraththe? 6 Aftir man Y seie. God forbede. Ellis hou schal God deme this world? 7 For if the treuthe of God hath aboundid in my lessyng, in to the glorie of hym, what yit am Y demed as a synner? 8 And not as we ben blasfemed, and as summen seien that we seien, Do we yuele thingis, that gode thingis come. Whos dampnacioun is iust. 9 What thanne? Passen we hem? Nay; for we han schewid bi skile, that alle bothe Jewis and Grekis ben vndur synne, 10 as it is writun, For ther is no man iust; 11 ther is no man vndurstondynge, nethir sekynge God. 12 Alle bowiden a wey, togidere thei ben maad vnprofitable; ther is noon that doith good thing, there is noon `til to oon. 13 The throte of hem is an opyn sepulcre; with her tungis thei diden gilefuli; the venym of snakis is vndur her lippis. 14 The mouth of whiche is ful of cursyng and bitternesse; 15 the feet of hem ben swifte to schede blood. 16 Sorewe and cursidnesse ben in the weies of hem, and thei knewen not the weie of pees; 17 18 the drede of God is not bifor her iyen. 19 And we witen, that what euere thingis the lawe spekith, it spekith to hem that ben in the lawe, that ech mouth be stoppid, and ech world be maad suget to God. 20 For of the werkis of the lawe ech fleisch schal not be iustified bifor hym; for bi the lawe ther is knowyng of synne. 21 But now with outen the lawe the riytwisnesse of God is schewid, that is witnessid of the lawe and the profetis. 22 And the riytwisnesse of God is bi the feith of Jhesu Crist in to alle men and on alle men that bileuen in hym; for ther is no departyng. 23 For alle men synneden, and han nede to the glorie of God; 24 and ben iustified freli bi his grace, bi the ayenbiyng that is in `Crist Jhesu. 25 Whom God ordeynede foryyuer, bi feith in his blood, to the schewyng of his riytwisnesse, for remyssioun of biforgoynge synnes, 26 in the beryng up of God, to the schewyng of his riytwisnesse in this tyme, that he be iust, and iustifyynge hym that is of the feith of Jhesu Crist. 27 Where thanne is thi gloriyng? It is excludid. Bi what lawe? Of dedis doyng? Nay, but by the lawe of feith. 28 For we demen a man to be iustified bi the feith, with outen werkis of the lawe. 29 Whethir of Jewis is God oneli? Whether he is not also of hethene men? Yhis, and of hethene men. 30 For `oon God is, that iustefieth circumcisioun bi feith, and prepucie bi feith. 31 Distruye we therfor the lawe bi the feith? God forbede; but we stablischen the lawe. CAP 4. 1 What thanne schulen we seie, that Abraham oure fadir aftir the flesch foond? 2 For if Abraham is iustified of werkis of the lawe, he hath glorie, but not anentis God. 3 For what seith the scripture? Abraham bileued to God, and it was arettid to him to riytwisnesse. 4 And to hym that worchith mede is not arettid bi grace, but bi dette. 5 Sotheli to hym that worchith not, but bileueth in to hym that iustefieth a wickid man, his feith is arettid to riytwisnesse, aftir the purpos of Goddis grace. 6 As Dauid seith the blessidnesse of a man, whom God acceptith, he yyueth to hym riytwisnesse with outen werkis of the lawe, 7 Blessid ben thei, whos wickidnessis ben foryouun, and whos synnes ben hid. 8 Blessid is that man, to whom God arettide not synne. 9 Thanne whether dwellith this blisfulnesse oneli in circumcisioun, or also in prepucie? For we seien, that the feith was arettid to Abraham to riytwisnesse. 10 Hou thanne was it arettid? in circumcisioun, or in prepucie? Not in circumcisioun, but in prepucie. 11 And he took a signe of circumcisioun, a tokenyng of riytwisnesse of the feith which is in prepucie, that he be fadir of alle men bileuynge bi prepucie, that it be arettid also to hem to riytwisnesse; 12 and that he be fadir of circumcisioun, not onely to hem that ben of circumcisioun, but also to hem that suen the steppis of the feith, which feith is in prepucie of oure fader Abraham. 13 For not bi the lawe is biheest to Abraham, or to his seed, that he schulde be eir of the world, but bi the riytwisnesse of feith. 14 For if thei that ben of the lawe, ben eiris, feith is distried, biheest is don awey. 15 For the lawe worchith wraththe; for where is no lawe, there is no trespas, nethir is trespassyng. 16 Therfor riytfulnesse is of the feith, that bi grace biheeste be stable to ech seed, not to that seed oneli that is of the lawe, but to that that is of the feith of Abraham, which is fadir of vs alle. 17 As it is writun, For Y haue set thee fadir of many folkis, bifor God to whom thou hast bileued. Which God quykeneth deed men, and clepith tho thingis that ben not, as tho that ben. 18 Which Abraham ayens hope bileuede in to hope, that he schulde be maad fader of many folkis, as it was seid to hym, Thus schal thi seed be, as the sterris of heuene, and as the grauel that is in the brenke of the see. 19 And he was not maad vnstidfast in the bileue, nether he biheelde his bodi thanne nyy deed, whanne he was almost of an hundrid yeer, ne the wombe of Sare nyy deed. 20 Also in the biheeste of God he doutide not with vntrist; but he was coumfortid in bileue, 21 yyuynge glorie to God, witynge moost fulli that what euere thingis God hath bihiyt, he is myyti also to do. 22 Therfor it was arettid to hym to riytwisnesse. 23 And it is not writun oneli for him, that it was arettid to hym to riytwisnesse, 24 but also for vs, to whiche it schal be arettid, that bileuen in him that reiside oure Lord Jhesu Crist fro deeth. 25 Which was bitakun for oure synnes, and roos ayen for oure iustefiyng. CAP 5. 1 Therfor we, iustified of feith, haue we pees at God bi oure Lord Jhesu Crist. 2 Bi whom we han niy goyng to, bi feith in to this grace, in which we stonden, and han glorie in the hope of the glorie of Goddis children. 3 And not this oneli, but also we glorien in tribulaciouns, witynge that tribulacioun worchith pacience, 4 and pacience preuyng, and preuyng hope. 5 And hope confoundith not, for the charite of God is spred abrood in oure hertis bi the Hooli Goost, that is youun to vs. 6 And while that we weren sijk aftir the tyme, what diede Crist for wickid men? 7 For vnnethis dieth ony man for the iust man; and yit for a good man perauenture summan dar die. 8 But God comendith his charite in vs; for if whanne we weren yit synneris, 9 aftir the tyme Crist was deed for vs, thanne myche more now we iustified in his blood, schulen be saaf fro wraththe bi him. 10 For if whanne we weren enemyes, we ben recounselid to God bi the deth of his sone, myche more we recounselid schulen be saaf in the lijf of hym. 11 And not oneli this, but also we glorien in God, bi oure Lord Jhesu Crist, bi whom we han resseyued now recounseling. 12 Therfor as bi o man synne entride in to this world, and bi synne deth, and so deth passide forth in to alle men, in which man alle men synneden. 13 For `til to the lawe synne was in the world; but synne was not rettid, whanne lawe was not. 14 But deth regnyde from Adam `til to Moises, also in to hem that synneden not in licnesse of the trespassyng of Adam, the which is licnesse of Crist to comynge. 15 But not as gilt, so the yifte; for if thorouy the gilt of oon manye ben deed, myche more the grace of God and the yifte in the grace of o man Jhesu Crist hath aboundid in to many men. 16 And not as bi o synne, so bi the yifte; for the doom of oon in to condempnacioun, but grace of many giltis in to iustificacioun. 17 For if in the gilt of oon deth regnede thorouy oon, myche more men that takyn plente of grace, and of yyuyng, and of riytwisnesse, schulen regne in lijf bi oon Jhesu Crist. 18 Therfor as bi the gilt of oon in to alle men in to condempnacioun, so bi the riytwisnesse of oon in to alle men in to iustifiyng of lijf. 19 For as bi inobedience of o man manye ben maad synneris, so bi the obedience of oon manye schulen be iust. 20 And the lawe entride, that gilt schulde be plenteuouse; but where gilt was plenteuouse, 21 grace was more plenteuouse. That as synne regnede in to deth, so grace regne bi riytwisnesse in to euerlastynge lijf, bi `Crist Jhesu oure Lord. CAP 6. 1 Therfor what schulen we seie? Schulen we dwelle in synne, that grace be plenteuouse? 2 God forbede. For hou schulen we that ben deed to synne, lyue yit ther ynne? 3 Whether, britheren, ye knowen not, that whiche euere we ben baptisid in Crist Jhesu, we ben baptisid in his deth? 4 For we ben togidere biried with hym bi baptym `in to deth; that as Crist aroos fro deth bi the glorie of the fadir, so walke we in a newnesse of lijf. 5 For if we plauntid togidere ben maad to the licnesse of his deth, also we schulen be of the licnesse of his risyng ayen; 6 witynge this thing, that oure olde man is crucified togidere, that the bodi of synne be distruyed, that we serue no more to synne. 7 For he that is deed, is iustefied fro synne. 8 And if we ben deed with Crist, we bileuen that also we schulen lyue togidere with hym; 9 witinge for Crist, rysynge ayen fro deth, now dieth not, deeth schal no more haue lordschip on hym. 10 For that he was deed to synne, he was deed onys; but that he lyueth, he liueth to God. 11 So ye deme you silf to be deed to synne, but lyuynge to God in `Jhesu Crist oure Lord. 12 Therfor regne not synne in youre deedli bodi, that ye obeische to hise coueityngis. 13 Nether yyue ye youre membris armuris of wickidnesse to synne, but yyue ye you silf to God, as thei that lyuen of deed men, and youre membris armuris of riytwisnesse to God. 14 For synne schal not haue lordschipe on you; for ye ben not vndur the lawe, but vndur grace. 15 What therfor? Schulen we do synne, for we ben not vndur the lawe, but vndur grace? 16 God forbede. Witen ye not, that to whom ye yyuen you seruauntis to obeie to, ye ben seruauntis of that thing, to which ye han obeschid, ether of synne to deth, ether of obedience to riytwisnesse? 17 But Y thanke God, that ye weren seruauntis of synne; but ye han obeischid of herte in to that fourme of techyng, in which ye ben bitakun. 18 And ye delyuered fro synne, ben maad seruauntis of riytwisnesse. 19 Y seie that thing that is of man, for the vnstidefastnesse of youre fleisch. But as ye han youun youre membris to serue to vnclennesse, and to wickidnesse `in to wickidnesse, so now yyue ye youre membris to serue to riytwisnesse in to hoolynesse. 20 For whanne ye weren seruauntis of synne, ye weren fre of riytfulnesse. 21 Therfor what fruyt hadden ye thanne in tho thingis, in whiche ye schamen now? For the ende of hem is deth. 22 But now ye delyuered fro synne, and maad seruauntis to God, han your fruyt in to holinesse, and the ende euerlastinge lijf. For the wagis of synne is deth; the grace of God is euerlastynge lijf in Crist Jhesu our Lord. CAP 7. 1 Britheren, whethir ye knowun not; for Y speke to men `that knowen the lawe; for the lawe hath lordschip in a man, as long tyme as it lyueth? 2 For that womman that is vndur an hosebonde, is boundun to the lawe, while the hosebonde lyueth; but if hir hosebonde is deed, sche is delyuered fro the lawe of the hosebonde. 3 Therfor sche schal be clepid auoutresse, if sche be with another man, while the hosebonde lyueth; but if hir hosebonde is deed, sche is delyuered fro the lawe of the hosebonde, that sche be not auoutresse, if sche be with another man. 4 And so, my britheren, ye ben maad deed to the lawe bi the bodi of Crist, that ye ben of another, that roos ayen fro deth, that ye bere fruyt to God. 5 For whanne we weren in fleisch, passiouns of synnes, that weren bi the lawe, wrouyten in oure membris, to bere fruyt to deth. 6 But now we ben vnboundun fro the lawe of deth, in which we weren holdun, so that we seruen in newnesse of spirit, and not in eldnesse of lettre. 7 What therfor schulen we seie? The lawe is synne? God forbede. But Y knew not synne, but bi lawe; for Y wiste not that coueitynge was synne, but for the lawe seide, Thou schalt not coueyte. 8 And thoruy occasioun takun, synne bi the maundement hath wrouyt in me al coueytise; for withouten the lawe, synne was deed. 9 And Y lyuede withouten the lawe sumtyme; but whanne the comaundement was comun, synne lyuede ayen. 10 But Y was deed, and this comaundement that was to lijf, was foundun to me, to be to deth. 11 For synne, thorouy occasioun takun bi the comaundement, disceyuede me, and bi that it slow me. 12 Therfor the lawe is hooli, and the comaundement is hooli, and iust, and good. 13 Is thanne that thing that is good, maad deth to me? God forbede. But synne, that it seme synne, thorouy good thing wrouyte deth to me, that me synne ouer maner thorouy the comaundement. 14 And we witen, that the lawe is spiritual; but Y am fleischli, seld vndur synne. 15 For Y vndurstonde not that that Y worche; for Y do not the good thing that Y wole, but Y do thilke yuel thing that Y hate. 16 And if Y do that thing that Y wole not, Y consente to the lawe, that it is good. 17 But now Y worche not it now, but the synne that dwellith in me. 18 But and Y woot, that in me, that is, in my fleisch, dwellith no good; for wille lieth to me, but Y fynde not to performe good thing. 19 For Y do not thilke good thing that Y wole, but Y do thilke yuel thing that Y wole not. 20 And if Y do that yuel thing that Y wole not, Y worche not it, but the synne that dwellith in me. 21 Therfor Y fynde the lawe to me willynge to do good thing, for yuel thing lieth to me. 22 For Y delite togidere to the lawe of God, aftir the ynnere man. But Y se another lawe in my membris, 23 ayenfiytynge the lawe of my soule, and makynge me caitif in the lawe of synne, that is in my membris. 24 Y am an vnceli man; who schal delyuer me fro the bodi of this synne? 25 The grace of God, bi Jhesu Crist oure Lord. Therfor Y my silf bi the soule serue to the lawe of God; but bi fleisch to the lawe of synne. CAP 8. 1 Therfor now no thing of dampnacioun is to hem that ben in Crist Jhesu, whiche wandren not after the flesch. 2 For the lawe of the spirit of lijf in Crist Jhesu hath delyuerid me fro the lawe of synne, and of deth. 3 For that that was vnpossible to the lawe, in what thing it was sijk bi flesch, God sente his sone in to the licknesse of fleisch of synne, and of synne dampnede synne in fleisch; 4 that the iustefiyng of the lawe were fulfillid in vs, that goen not aftir the fleisch, but aftir the spirit. 5 For thei that ben aftir the fleisch, saueren tho thingis that ben of the fleisch; but thei that ben after the spirit, feelen tho thingis that ben of the spirit. For the prudence of fleisch is deth; 6 but the prudence of spirit is lijf and pees. 7 For the wisdom of the fleisch is enemye to God; for it is not suget to the lawe of God, for nether it may. 8 And thei that ben in fleisch, moun not plese to God. 9 But ye ben not in fleisch, but in spirit; if netheles the spirit of God dwellith in you. But if ony hath not the spirit of Crist, this is not his. 10 For if Crist is in you, the bodi is deed for synne, but the spirit lyueth for iustefiyng. 11 And if the spirit of hym that reiside Jhesu Crist fro deth dwellith in you, he that reiside Jhesu Crist fro deth, shal quykene also youre deedli bodies, for the spirit of hym that dwellith in you. 12 Therfor, britheren, we ben dettouris, not to the flesch, that we lyuen aftir the flesch. 13 For if ye lyuen aftir the fleisch, ye schulen die; but if ye bi the spirit sleen the dedis of the fleisch, ye schulen lyue. 14 For who euere ben led bi the spirit of God, these ben the sones of God. 15 For ye han not take eftsoone the spirit of seruage in drede, but ye han taken the spirit of adopcioun of sones, in which we crien, Abba, fadir. 16 And the ilke spirit yeldith witnessyng to oure spirit, that we ben the sones of God; 17 if sones, and eiris, `and eiris of God, and eiris togidere with Crist; if netheles we suffren togidere, that also we ben glorified togidere. 18 And Y deme, that the passiouns of this tyme ben not worthi to the glorie to comynge, that schal be schewid in vs. 19 For the abidyng of creature abidith the schewyng of the sones of God. 20 But the creature is suget to vanyte, not willynge, but for hym that made it suget in hope; 21 for the ilke creature schal be delyuered fro seruage of corrupcioun in to liberte of the glorie of the sones of God. 22 And we witen, that ech creature sorewith, and trauelith with peyne til yit. 23 And not oneli it, but also we vs silf, that han the first fruytis of the spirit, and we vs silf sorewen with ynne vs for the adopcioun of Goddis sonys, abidynge the ayenbiyng of oure bodi. 24 But bi hope we ben maad saaf. For hope that is seyn, is not hope; for who hopith that thing, that he seeth? 25 And if we hopen that thing that we seen not, we abiden bi pacience. 26 And also the spirit helpith oure infirmyte; for what we schulen preie, as it bihoueth, we witen not, but the ilke spirit axith for vs with sorewyngis, that moun not be teld out. 27 For he that sekith the hertis, woot what the spirit desirith, for bi God he axith for hooli men. 28 And we witen, that to men `that louen God, alle thingis worchen togidere in to good, to hem that aftir purpos ben clepid seyntis. 29 For thilke that he knewe bifor, he bifor ordenede bi grace to be maad lijk to the ymage of his sone, that he be the first bigetun among many britheren. 30 And thilke that he bifore ordeynede to blis, hem he clepide; and whiche he clepide, hem he iustifiede; and whiche he iustifiede, and hem he glorifiede. 31 What thanne schulen we seie to these thingis? If God for vs, who is ayens vs? 32 The which also sparide not his owne sone, but `for vs alle bitook hym, hou also yaf he not to vs alle thingis with hym? 33 Who schal accuse ayens the chosun men of God? It is God that iustifieth, 34 who is it that condempneth? It is Jhesus Crist that was deed, yhe, the which roos ayen, the which is on the riyt half of God, and the which preieth for vs. 35 Who thanne schal departe vs fro the charite of Crist? tribulacioun, or anguysch, or hungur, or nakidnesse, or persecucioun, or perel, or swerd? 36 As it is writun, For we ben slayn al dai for thee; we ben gessid as scheep of slauytir. 37 But in alle these thingis we ouercomen, for hym that louyde vs. 38 But Y am certeyn, that nethir deeth, nether lijf, nether aungels, nethir principatus, nether vertues, nether present thingis, nether thingis to comynge, nether strengthe, 39 nether heiyth, nether depnesse, nether noon othir creature may departe vs fro the charite of God, that is in `Crist Jhesu oure Lord. CAP 9. 1 I seie treuthe in Crist Jhesu, Y lye not, for my conscience berith witnessyng to me in the Hooli Goost, 2 for greet heuynesse is to me, and contynuel sorewe to my herte. 3 For Y my silf desiride to be departid fro Crist for my britheren, that ben my cosyns aftir the fleisch, that ben men of Israel; 4 whos is adopcioun of sones, and glorie, and testament, and yyuyng of the lawe, and seruyce, and biheestis; 5 whos ben the fadris, and of which is Crist after the fleisch, that is God aboue alle thingis, blessid in to worldis. 6 Amen. But not that the word of God hath falle doun. For not alle that ben of Israel, these ben Israelitis. 7 Nethir thei that ben seed of Abraham, `alle ben sonys; but in Ysaac the seed schal be clepid to thee; 8 that is to seie, not thei that ben sones of the fleisch, ben sones of God, but thei that ben sones of biheeste ben demed in the seed. 9 For whi this is the word of biheest, Aftir this tyme Y schal come, and a sone schal be to Sare. 10 And not oneli sche, but also Rebecca hadde twey sones of o liggyng bi of Ysaac, oure fadir. 11 And whanne thei weren not yit borun, nether hadden don ony thing of good ether of yuel, that the purpos of God schulde dwelle bi eleccioun, 12 not of werkis, but of God clepynge, it was seid to hym, 13 that the more schulde serue the lesse, as it is writun, Y louede Jacob, but Y hatide Esau. 14 What therfor schulen we seie? Whether wickidnesse be anentis God? 15 God forbede. For he seith to Moyses, Y schal haue merci on whom Y haue merci; and Y schal yyue merci on whom Y schal haue merci. 16 Therfor it is not nether of man willynge, nethir rennynge, but of God hauynge mercy. 17 And the scripture seith to Farao, For to this thing Y haue stirid thee, that Y schewe in thee my vertu, and that my name be teld in al erthe. 18 Therfor of whom God wole, he hath merci; and whom he wole, he endurith. 19 Thanne seist thou to me, What is souyt yit? for who withstondith his wille? 20 O! man, who art thou, that answerist to God? Whether a maad thing seith to hym that made it, What hast thou maad me so? 21 Whether a potter of cley hath not power to make of the same gobet o vessel in to honour, an othere in to dispit? 22 That if God willynge to schewe his wraththe, and to make his power knowun, hath suffrid in greet pacience vessels of wraththe able in to deth, 23 to schewe the riytchessis of his glorie in to vessels of merci, whiche he made redi in to glorie. 24 Whiche also he clepide not oneli of Jewis, but also of hethene men, as he seith in Osee, 25 Y schal clepe not my puple my puple, and not my loued my louyd, and not getynge mercy getynge merci; 26 and it schal be in the place, where it is seid to hem, Not ye my puple, there thei schulen be clepid the sones of `God lyuynge. 27 But Isaye crieth for Israel, If the noumbre of Israel schal be as grauel of the see, the relifs schulen be maad saaf. 28 Forsothe a word makynge an ende, and abreggynge in equyte, for the Lord schal make a word breggid on al the erthe. 29 And as Ysaye bifor seide, But God of oostis hadde left to vs seed, we hadden be maad as Sodom, and we hadden be lijk as Gommor. 30 Therfor what schulen we seie? That hethene men that sueden not riytwisnesse, han gete riytwisnesse, yhe, the riytwisnesse that is of feith. 31 But Israel suynge the lawe of riytwisnesse, cam not parfitli in to the lawe of riytwisnesse. 32 Whi? For not of feith, but as of werkys. And thei spurneden ayens the stoon of offencioun, 33 as it is writun, Lo! Y putte a stoon of offensioun in Syon, and a stoon of sclaundre; and ech that schal bileue `in it, schal not be confoundid. CAP 10. 1 Britheren, the wille of myn herte and mi biseching is maad to God for hem in to helthe. 2 But Y bere witnessyng to hem, that thei han loue of God, but not aftir kunnyng. 3 For thei vnknowynge Goddis riytwisnesse, and sekynge to make stidefast her owne riytfulnesse, ben not suget to the riytwisnesse of God. 4 For the ende of the lawe is Crist, to riytwisnesse to ech man that bileueth. 5 For Moises wroot, For the man that schal do riytwisnesse that is of the lawe, schal lyue in it. 6 But the riytwisnesse that is of bileue, seith thus, Seie thou not in thin herte, Who schal stie in to heuene? that is to seie, to lede doun Crist; 7 or who schal go doun in to helle? that is, to ayenclepe Crist fro deth. 8 But what seith the scripture? The word is nyy in thi mouth, and in thin herte; this is the word of bileue, which we prechen. 9 That if thou knoulechist in thi mouth the Lord Jhesu Crist, and bileuest in thin herte, that God reiside hym fro deth, thou schalt be saaf. 10 For bi herte me bileueth to riytwisnesse, but bi mouth knowleching is maad to helthe. 11 For whi the scripture seith, Ech that bileueth in hym, schal not be confoundid. 12 And ther is no distinccioun of Jew and of Greke; for the same Lord of alle is riche in alle, that inwardli clepen hym. 13 For ech man `who euere schal inwardli clepe the name of the Lord, schal be saaf. 14 Hou thanne schulen thei inwardli clepe hym, in to whom thei han not bileued? or hou schulen thei bileue to hym, whom thei han not herd? Hou schulen thei here, with outen a prechour? 15 and hou schulen thei preche, but thei be sent? As it is writun, Hou faire ben the feet of hem that prechen pees, of hem that prechen good thingis. 16 But not alle men obeien to the gospel. For Ysaie seith, Lord, who bileuede to oure heryng? 17 Therfor feith is of heryng, but heryng bi the word of Crist. 18 But Y seie, Whether thei herden not? Yhis, sothely the word of hem wente out in to al the erthe, and her wordis in to the endis of the world. 19 But Y seie, Whether Israel knewe not? First Moyses seith, Y schal lede you to enuye, that ye ben no folc; that ye ben an vnwise folc, Y schal sende you in to wraththe. 20 And Ysaie is bold, and seith, Y am foundun of men that seken me not; opynli Y apperide to hem, that axiden not me. 21 But to Israel he seith, Al dai Y streiyte out myn hondis to a puple that bileuede not, but ayen seide me. CAP 11. 1 Therfor Y seie, Whether God hath put awei his puple? God forbede. For Y am an Israelite, of the seed of Abraham, of the lynage of Beniamyn. 2 God hath not put awei his puple, which he bifor knew. Whether ye witen not, what the scripture seith in Elie? Hou he preieth God ayens Israel, 3 Lord, thei han slayn thi prophetis, thei han vndurdoluun thin auteris, and Y am lefte aloone, and thei seken my lijf. 4 But what seith Goddis answere to hym? Y haue left to me seuene thousyndes of men, that han not bowid her knees bifore Baal. 5 So therfor also in this tyme, the relifs ben maad saaf, bi the chesyng of the grace of God. 6 And if it be bi the grace of God, it is not now of werkis; ellis grace is not now grace. 7 What thanne? Israel hath not getun this that he souyte, but eleccioun hath getun; and the othere ben blyndid. 8 As it is writun, God yaf to hem a spirit of compunccioun, iyen that thei se not, and eeris, that thei here not, in to this dai. 9 And Dauith seith, Be the boord of hem maad in to a gryn bifor hem, and in to catchyng, and in to sclaundre, and in to yeldyng to hem. 10 Be the iyen of hem maad derk, that thei se not; and bowe thou doun algatis the bak of hem. 11 Therfor Y seie, Whether thei offendiden so, that thei schulden falle doun? God forbede. But bi the gilt of hem helthe is maad to hethene men, that thei sue hem. 12 That if the gilt of hem ben richessis of the world, and the makyng lesse of hem ben richessis of hethene men, hou myche more the plente of hem? 13 But Y seie to you, hethene men, for as longe as Y am apostle of hethene men, Y schal onoure my mynysterie, 14 if in ony maner Y stire my fleisch for to folowe, and that Y make summe of hem saaf. 15 For if the loss of hem is the recouncelyng of the world, what is the takyng vp, but lijf of deede men? 16 For if a litil part of that that is tastid be hooli, the hool gobet is hooli; and if the roote is hooli, also the braunchis. 17 What if ony of the braunchis ben brokun, whanne thou were a wielde olyue tre, art graffid among hem, and art maad felowe of the roote, and of the fatnesse of the olyue tre, 18 nyle thou haue glorie ayens the braunchis. For if thou gloriest, thou berist not the roote, but the roote thee. 19 Therfor thou seist, The braunchis ben brokun, that Y be graffid in. 20 Wel, for vnbileue the braunchis ben brokun; but thou stondist bi feith. Nyle thou sauere hiye thing, 21 but drede thou, for if God sparide not the kyndli braunchis, lest perauenture he spare not thee. 22 Therfor se the goodnesse, and the fersnesse of God; yhe, the feersnesse in to hem that felden doun, but the goodnesse of God in to thee, if thou dwellist in goodnesse, ellis also thou schalt be kit doun. 23 Yhe, and thei schulen be set yn, if thei dwellen not in vnbileue. For God is myyti, to sette hem in eftsoone. 24 For if thou art kit doun of the kyndeli wielde olyue tre, and ayens kynd art set in to a good olyue tre, hou myche more thei that ben bi kynde, schulen be set in her olyue tree? 25 But, britheren, Y wole not that ye vnknowen this mysterie, that ye be not wise to you silf; for blyndenesse hath feld a parti in Israel, til that the plente of hethene men entride, 26 and so al Israel schulde be maad saaf. As it is writun, He schal come of Syon, that schal delyuere, and turne awei the wickidnesse of Jacob. 27 And this testament to hem of me, whanne Y schal do awei her synnes. 28 Aftir the gospel thei ben enemyes for you, but thei ben moost dereworthe bi the eleccioun for the fadris. 29 And the yiftis and the cleping of God ben with outen forthenkyng. 30 And as sum tyme also ye bileueden not to God, but now ye han gete mercy for the vnbileue of hem; 31 so and these now bileueden not in to youre merci, that also thei geten merci. 32 For God closide alle thingis togidere in vnbileue, that he haue mercy on alle. 33 O! the heiynesse of the ritchessis of the wisdom and of the kunnyng of God; hou incomprehensible ben hise domes, and hise weies ben vnserchable. 34 For whi who knew the wit of the Lord, or who was his counselour? or who formere yaf to hym, 35 and it schal be quyt to hym? 36 For of hym, and bi hym, and in hym ben alle thingis. To hym be glorie in to worldis. Amen. CAP 12. 1 Therfore, britheren, Y biseche you bi the mercy of God, that ye yyue youre bodies a lyuynge sacrifice, hooli, plesynge to God, and youre seruyse resonable. 2 And nyle ye be confourmyd to this world, but be ye reformed in newnesse of youre wit, that ye preue which is the wille of God, good, and wel plesynge, and parfit. 3 For Y seie, bi the grace that is youun to me, to alle that ben among you, that ye sauere no more than it bihoueth to sauere, but for to sauere to sobrenesse; and to ech man, as God hath departid the mesure of feith. 4 For as in o bodi we han many membris, but alle the membris han not the same dede; 5 so we many ben o bodi in Crist, and eche ben membris oon of anothir. 6 Therfor we that han yiftis dyuersynge, aftir the grace that is youun to vs, 7 ethir prophecie, aftir the resoun of feith; ethir seruise, in mynystryng; ether he that techith, in techyng; 8 he that stirith softli, in monestyng; he that yyueth, in symplenesse; he that is souereyn, in bisynesse; he that hath merci, in gladnesse. 9 Loue with outen feynyng, hatynge yuel, drawynge to good; 10 louynge togidere the charite of britherhod. Eche come bifore to worschipen othere; 11 not slow in bisynesse, feruent in spirit, seruynge to the Lord, 12 ioiynge in hope, pacient in tribulacioun, bisy in preier, 13 yyuynge good to the nedis of seyntis, kepynge hospitalite. 14 Blesse ye men that pursuen you; blesse ye, and nyle ye curse; 15 for to ioye with men that ioyen, for to wepe with men that wepen. 16 Fele ye the same thing togidere; not sauerynge heiy thingis, but consentynge to meke thingis. Nile ye be prudent anentis you silf; 17 to no man yeldynge yuel for yuel, but purueye ye good thingis, not oneli bifor God, but also bifor alle men. 18 If it may be don, that that is of you, haue ye pees with alle men. 19 Ye moost dere britheren, not defendynge you silf, but yyue ye place to wraththe; for it is writun, The Lord seith, To me veniaunce, and Y schal yelde. 20 But if thin enemy hungrith, fede thou hym; if he thirstith, yyue thou drynke to hym; for thou doynge this thing schalt gidere togidere colis on his heed. 21 Nyle thou be ouercomun of yuel, but ouercome thou yuel bi good. CAP 13. 1 Euery soule be suget to heiyere powers. For ther is no power but of God, and tho thingis that ben of God, ben ordeyned. 2 Therfor he that ayenstondith power, ayenstondith the ordynaunce of God; and thei that ayenstonden, geten to hem silf dampnacioun. 3 For princes ben not to the drede of good work, but of yuel. But wilt thou, that thou drede not power? Do thou good thing, and thou schalt haue preisyng of it; 4 for he is the mynystre of God to thee in to good. But if thou doist yuel, drede thou; for not with outen cause he berith the swerd, for he is the mynystre of God, vengere in to wraththe to hym that doith yuel. 5 And therfor bi nede be ye suget, not oneli for wraththe, but also for conscience. 6 For therfor ye yyuen tributis, thei ben the mynystris of God, and seruen for this same thing. 7 Therfor yelde ye to alle men dettis, to whom tribut, tribut, to whom tol, tol, to whom drede, drede, to whom onour, onour. 8 To no man owe ye ony thing, but that ye loue togidere. For he that loueth his neiybore, hath fulfillid the lawe. 9 For, Thou schalt do no letcherie, Thou schalt not sle, Thou schalt not stele, Thou schalt not seie fals witnessyng, Thou schalt not coueyte the thing of thi neiybore, and if ther be ony othere maundement, it is instorid in this word, Thou schalt loue thi neiybore as thi silf. 10 The loue of neiybore worchith not yuel; therfor loue is the fulfillyng of the lawe. 11 And we knowen this tyme, that the our is now, that we rise fro sleep; for now oure heelthe is neer, than whanne we bileueden. 12 The nyyt wente bifore, but the dai hath neiyed. Therfor caste we awei the werkis of derknessis, and be we clothid in the armeris of liyt. 13 As in dai wandre we onestli, not in superflu feestis and drunkenessis, not in beddis and vnchastitees, not in strijf and in enuye; 14 but be ye clothid in the Lord Jhesu Crist, and do ye not the bisynesse of fleisch in desiris. CAP 14. 1 But take ye a sijk man in bileue, not in demyngis of thouytis. 2 For another man leueth, that he mai ete alle thingis; but he that is sijk, ete wortis. 3 He that etith, dispise not hym that etith not; and he that etith not, deme not hym that etith. For God hath take him to hym. 4 Who art thou, that demest anothris seruaunt? To his lord he stondith, or fallith fro hym. But he schal stonde; for the Lord is myyti to make hym parfit. 5 For whi oon demeth a day bitwixe a dai, another demeth ech dai. 6 Ech man encrees in his wit. He that vnderstondith the dai, vnderstondith to the Lord. And he that etith, etith to the Lord, for he doith thankyngis to God. And he that etith not, etith not to the Lord, and doith thankyngis to God. 7 For no man of vs lyueth to hymsilf, and no man dieth to hymself. 8 For whether we lyuen, we lyuen to the Lord; and whethir we dien, we dien to the Lord. Therfor whethir we lyuen or dien, we ben of the Lord. 9 For whi for this thing Crist was deed, and roos ayen, that he be Lord bothe of quyke and of deed men. 10 But what demest thou thi brothir? or whi dispisist thou thi brothir? for alle we schulen stonde bifore the trone of Crist. 11 For it is writun, Y lyue, seith the Lord, for to me ech kne schal be bowid, and ech tunge schal knouleche to God. 12 Therfor ech of vs schal yelde resoun to God for hym silf. 13 Therfor `no more deme we ech other; but more deme ye this thing, that ye putte not hirtyng, or sclaundre, to a brothir. 14 I woot and triste in the Lord Jhesu, that no thing is vnclene bi hym, no but to him that demeth ony thing to be vnclene, to him it is vnclene. 15 And if thi brother be maad sori in conscience for mete, now thou walkist not aftir charite. Nyle thou thorouy thi mete lese hym, for whom Crist diede. 16 Therfor be not oure good thing blasfemed. 17 For whi the rewme of God is not mete and drynk, but riytwisnesse and pees and ioye in the Hooli Goost. 18 And he that in this thing serueth Crist, plesith God, and is proued to men. 19 Therfor sue we tho thingis that ben of pees, and kepe we togidere `tho thingis that ben of edificacioun. 20 Nyle thou for mete distrie the werk of God. For alle thingis ben clene, but it is yuel to the man that etith bi offendyng. 21 It is good to not ete fleisch, and to not drynke wyn, nethir in what thing thi brother offendith, or is sclaundrid, or is maad sijk. 22 Thou hast feith anentis thi silf, haue thou bifore God. Blessid is he that demeth not hym silf in that thing that he preueth. 23 For he that demeth, is dampned, if he etith; for it is not of feith. And al thing that is not of feith, is synne. CAP 15. 1 But we saddere men owen to susteyne the feblenesses of sijke men, and not plese to vs silf. 2 Eche of vs plese to his neiybore in good, to edificacioun. 3 For Crist pleside not to hym silf, as it is writun, The repreues of men dispisynge thee, felden on me. 4 For what euere thingis ben writun, tho ben writun to oure techynge, that bi pacience and coumfort of scripturis we haue hope. 5 But God of pacience and of solace yyue to you to vndurstonde the same thing, ech in to othere aftir Jhesu Crist, 6 that ye of o wille with o mouth worschipe God and the fadir of oure Lord Jhesu Crist. 7 For which thing take ye togidere, as also Crist took you in to the onour of God. 8 For Y seie, that Jhesu Crist was a mynystre of circumcisioun for the treuthe of God, to conferme the biheestis of fadris. 9 And hethene men owen to onoure God for merci; as it is writun, Therfor, Lord, Y schal knowleche to thee among hethene men, and Y schal synge to thi name. 10 And eft he seith, Ye hethene men, be ye glad with his puple. 11 And eft, Alle hethene men, herie ye the Lord; and alle puplis, magnefie ye hym. 12 And eft Isaie seith, Ther schal be a roote of Jesse, that schal rise vp to gouerne hethene men, and hethene men schulen hope in hym. 13 And God of hope fulfille you in al ioye and pees in bileuynge, that ye encrees in hope and vertu of the Hooli Goost. 14 And, britheren, Y my silf am certeyn of you, that also ye ben ful of loue, and ye ben fillid with al kunnyng, so that ye moun moneste ech other. 15 And, britheren, more boldli Y wroot to you a parti, as bryngynge you in to mynde, for the grace that is youun to me of God, 16 that Y be the mynystre of Crist Jhesu among hethene men. And Y halewe the gospel of God, that the offryng of hethene men be acceptid, and halewid in the Hooli Goost. 17 Therfor Y haue glorie in Crist Jhesu to God. 18 For Y dar not speke ony thing of tho thingis, whiche Crist doith not bi me, in to obedience of hethene men, in word and dedis, 19 in vertu of tokenes and grete wondris, in vertu of the Hooli Goost, so that fro Jerusalem bi cumpas to the Illirik see Y haue fillid the gospel of Crist. 20 And so Y haue prechid this gospel, not where Crist was named, lest Y bilde vpon anotheres ground, but as it is writun, 21 For to whom it is not teld of him, thei schulen se, and thei that herden not, schulen vndurstonde. 22 For which thing Y was lettid ful myche to come to you, and Y am lettid to this tyme. 23 And now Y haue not ferthere place in these cuntrees, but Y haue desire to come to you, of many yeris that ben passid. 24 Whanne Y bygynne to passe in to Spayne, Y hope that in my goyng Y schal se you, and of you Y schal be led thidur, if Y vse you first in parti. 25 Therfor now Y schal passe forth to Jerusalem, to mynystre to seyntis. 26 For Macedonye and Acaie han assaied to make sum yifte to pore men of seyntis, that ben in Jerusalem. 27 For it pleside to hem, and thei ben dettouris of hem; for hethene men ben maad parteneris of her goostli thingis, thei owen also in fleischli thingis to mynystre to hem. 28 Therfor whanne Y haue endid this thing, and haue asigned to hem this fruyt, Y schal passe bi you in to Spayne. 29 And Y woot, that Y comynge to you, schal come `in to the abundaunce of the blessing of Crist. 30 Therfor, britheren, Y biseche you bi oure Lord Jhesu Crist, and bi charite of the Hooli Goost, that ye helpe me in youre preyeris to the Lord, 31 that Y be delyuerid fro the vnfeithful men, that ben in Judee, and that the offryng of my seruyce be acceptid in Jerusalem to seyntis; 32 that Y come to you in ioye, bi the wille of God, and that Y be refreischid with you. And God of pees be with you alle. Amen. CAP 16. 1 And Y comende to you Feben, oure sister, which is in the seruyce of the chirche that is at Teucris, 2 that ye resseyue hir in the Lord worthili to seyntis, and `that ye helpe hir in what euere cause sche schal nede of you. For sche helpide many men, and my silf. 3 Grete ye Prisca and Aquyla, myn helperis in Crist Jhesu, 4 which vndurputtiden her neckis for my lijf; to whiche not Y aloone do thankyngis, but also alle the chirchis of hethene men. 5 And grete ye wel her meyneal chirche. Grete wel Efenete, louyd to me, that is the firste of Asie in Crist Jhesu. 6 Grete wel Marie, the whiche hath trauelid myche in vs. 7 Grete wel Andronyk and Julian, my cosyns, and myn euen prisouneris, which ben noble among the apostlis, and whiche weren bifor me in Crist. 8 Grete wel Ampliate, most dereworth to me in the Lord. 9 Grete wel Vrban, oure helpere in Crist Jhesus, and Stacchen, my derlyng. 10 Grete wel Appellem, the noble in Crist. 11 Grete wel hem that ben of Aristoblis hous. Grete wel Erodion, my cosyn. Grete wel hem that ben of Narciscies hous, that ben in the Lord. 12 Grete wel Trifenam and Trifosam, whiche wymmen trauelen in the Lord. Grete wel Persida, most dereworthe womman, that hath trauelid myche in the Lord. 13 Grete wel Rufus, chosun in the Lord, and his modir, and myn. 14 Grete wel Ansicrete, Flegoncia, Hermen, Patroban, Herman, and britheren that ben with hem. 15 Grete wel Filologus, and Julian, and Nereum, and his sistir, and Olympiades, and alle the seyntis that ben with hem. 16 Grete ye wel togidere in hooli coss. Alle the chirches of Crist greten you wel. 17 But, britheren, Y preye you, that ye aspie hem that maken discenciouns and hirtyngis, bisidis the doctryne that ye han lerned, and bowe ye awei fro hem. 18 For suche men seruen not to the Lord Crist, but to her wombe, and bi swete wordis and blessyngis disseyuen the hertis of innocent men. 19 But youre obedience is pupplischid in to euery place, therfor Y haue ioye in you. But Y wole that ye be wise in good thing, and symple in yuel. 20 And God of pees tredde Sathanas vndur youre feet swiftli. The grace of oure Lord Jhesu Crist be with you. 21 Tymothe, myn helpere, gretith you wel, and also Lucius, and Jason, and Sosipater, my cosyns. 22 Y Tercius grete you wel, that wroot this epistle, in the Lord. 23 Gayus, myn oost, gretith you wel, and al the chirche. Erastus, tresorere of the city, gretith you wel, and Quartus brother. 24 The grace of oure Lord Jhesu Crist be with you alle. 25 Amen. And onour and glorie be to hym, that is myyti to conferme you bi my gospel, and prechyng of Jhesu Crist, bi the reuelacioun of mysterie holdun stylle in tymes euerlastinge; 26 which mysterie is now maad opyn bi scripturis of prophetis, bi the comaundement of God with outen bigynnyng and endyng, to the obedience of feith in alle hethene men, the mysterie 27 knowun bi Jhesu Crist to God aloone wiss, to whom be onour and glorie in to worldis of worldis. Amen.

1 Corinthis

CAP 1. 1 Poul, clepid apostle of Jhesu Crist, bi the wille of God, and Sostenes, brothir, to the chirche of God that is at Corynthe, 2 to hem that ben halewid in Crist Jhesu, and clepid seyntis, with alle that inwardli clepen the name of oure Lord Jhesu Crist, in ech place of hem and of oure, 3 grace to you and pees of God, oure fadir, and of the Lord Jhesu Crist. 4 Y do thankyngis to my God eueremore for you, in the grace of God that is youun to you in Crist Jhesu. 5 For in alle thingis ye ben maad riche in hym, in ech word, and in ech kunnyng, 6 as the witnessyng of Crist is confermyd in you; 7 so that no thing faile to you in ony grace, that abiden the schewyng of oure Lord Jhesu Crist; 8 which also schal conferme you in to the ende with outen cryme, in the dai of the comyng of oure Lord Jhesu Crist. 9 `A trewe God, bi whom ye ben clepid in to the felouschipe of his sone Jhesu Crist oure Lord. 10 But, britheren, Y biseche you, bi the name of oure Lord Jhesu Crist, that ye alle seie the same thing, and that dissenciouns be not among you; but be ye perfit in the same wit, and in the same kunnyng. 11 For, my britheren, it is teld to me of hem that ben at Cloes, that stryues ben among you. 12 And Y seie that, that ech of you seith, For Y am of Poul, and Y am of Apollo, and Y am of Cefas, but Y am of Crist. 13 Whether Crist is departid? whether Poul was crucified for you, ether ye ben baptisid in the name of Poul? 14 Y do thankyngis to my God, that Y baptiside noon of you, but Crispus and Gayus; 15 lest ony man seie, that ye ben baptisid in my name. 16 And Y baptiside also the hous of Stephan, but Y woot not, that Y baptiside ony other. 17 For Crist sente me not to baptise, but to preche the gospel; not in wisdom of word, that the cros of Crist be not voidid awei. 18 For the word of the cros is foli to hem that perischen; but to hem that ben maad saaf, that is to seie, to vs, it is the vertu of God. 19 For it is writun, Y schal distruye the wisdom of wise men, and Y schal reproue the prudence of prudent men. 20 Where is the wise man? where is the wise lawiere? where is the purchasour of this world? Whether God hath not maad the wisdom of this world fonned? 21 For the world in wisdom of God knewe not God bi wisdom, it pleside to God, bi foli of prechyng, `to maken hem saaf that bileueden. 22 For Jewis seken signes, and Grekis seken wisdom; 23 but we prechen Crist crucified, to Jewis sclaundre, and to hethene men foli; 24 but to tho Jewis and Grekis that ben clepid, we prechen Crist the vertu of God and the wisdom of God. 25 For that that is foli thing of God, is wiser than men; and that that is the feble thing of God, is strengere than men. 26 But, britheren, se ye youre clepyng; for not many wise men aftir the fleisch, not many myyti, not many noble. 27 But God chees tho thingis that ben fonned of the world, to confounde wise men; 28 and God chees the feble thingis of the world, to confounde the stronge thingis; and God chees the vnnoble thingis `and dispisable thingis of the world, and tho thingis that ben not, to distruye tho thingis that ben; 29 that ech man haue not glorie in his siyt. 30 But of hym ye ben in Crist Jhesu, which is maad of God to vs wisdom, and riytwisnesse, and holynesse, and ayenbiyng; that, 31 as it is wrytun, He that glorieth, haue glorie in the Lord. CAP 2. 1 And Y, britheren, whanne Y cam to you, cam not in the heiynesse of word, ethir of wisdom, tellynge to you the witnessyng of Crist. 2 For Y demede not me to kunne ony thing among you, but Crist Jhesu, and hym crucified. 3 And Y in sikenesse, and drede, and myche trembling, was among you; 4 and my word and my preching was not in suteli sturyng wordis of mannus wisdom, but in schewyng of spirit and of vertu; 5 that youre feith be not in the wisdom of men, but in the vertu of God. 6 For we speken wisdom among perfit men, but not wisdom of this world, nether of princes of this world, that ben distried; 7 but we speken the wisdom of God in mysterie, `which wisdom is hid; which wisdom God bifor ordeynede bifor worldis in to oure glorie, 8 which noon of the princes of this world knew; for if thei hadden knowe, thei schulden neuere haue crucified the Lord of glorie. 9 But as it is writun, That iye say not, ne eere herde, nether it stiede in to herte of man, what thingis God arayede to hem that louen hym; 10 but God schewide to vs bi his spirit. For whi the spirit serchith alle thingis, yhe, the depe thingis of God. 11 And who of men woot, what thingis ben of man, but the spirit of man that is in hym? So what thingis ben of God, no man knowith, but the spirit of God. 12 And we han not resseiued the spirit of this world, but the spirit that is of God, that we wite what thingis ben youun to vs of God. 13 Whiche thingis we speken also, not in wise wordis of mannus wisdom, but in the doctryn of the spirit, and maken a liknesse of spiritual thingis to goostli men. 14 For a beestli man perseyueth not tho thingis that ben of the spirit of God; for it is foli to hym, and he may not vndurstonde, for it is examyned goostli. 15 But a spiritual man demeth alle thingis, and he is demed of no man. 16 As it is writun, And who knew the wit of the Lord, or who tauyte hym? And we han the wit of Crist. CAP 3. 1 And Y, britheren, myyte not speke to you as to spiritual men, but as to fleischli men; 2 as to litle children in Crist, Y yaf to you mylk drynke, not mete; for ye myyten not yit, nether ye moun now, for yit ye ben fleischli. 3 For while strijf is among you, whether ye ben not fleischli, and ye gon aftir man? 4 For whanne summe seith, Y am of Poul, another, But Y am of Apollo, whethir ye ben not men? What therfor is Apollo, and what Poul? 5 Thei ben mynystris of hym, to whom ye han bileuyd; and to ech man as God hath youun. 6 Y plauntide, Apollo moystide, but God yaf encreessyng. 7 Therfor nether he that plauntith is ony thing, nethir he that moistith, but God that yiueth encreessyng. 8 And he that plauntith, and he that moistith, ben oon; and ech schal take his owne mede, aftir his trauel. 9 For we ben the helperis of God; ye ben the erthetiliyng of God, ye ben the bildyng of God. 10 Aftir the grace `of God that is youun to me, as a wise maistir carpenter Y settide the foundement; and another bildith aboue. But ech man se, hou he bildith aboue. 11 For no man may sette another foundement, outtakun that that is sett, which is Crist Jhesus. 12 For if ony bildith ouer this foundement, gold, siluer, preciouse stoonys, stickis, hey, or stobil, euery mannus werk schal be open; 13 for the dai of the Lord schal declare, for it schal be schewid in fier; the fier schal preue the werk of ech man, what maner werk it is. 14 If the werk of ony man dwelle stille, which he bildide aboue, he schal resseyue mede. 15 If ony mannus werk brenne, he schal suffre harm; but he schal be saaf, so netheles as bi fier. 16 Witen ye not, that ye ben the temple of God, and the spirit of God dwellith in you? 17 And if ony defoulith the temple of God, God schal leese hym; for the temple of God is hooli, which ye ben. 18 No man disseyue hym silf. If ony man among you is seyn to be wiys in this world, be he maad a fool, that he be wijs. 19 For the wisdom of this world is foli anentis God; for it is writun, Y schal catche wise men in her fel wisdom; 20 and eft, The Lord knowith the thouytis of wise men, for tho ben veyn. 21 Therfor no man haue glorie in men. 22 For alle thingis ben youre, ethir Poul, ether Apollo, ether Cefas, ether the world, ether lijf, ether deth, ether thingis present, ethir thingis to comynge; for alle thingis ben youre, 23 and ye ben of Crist, and Crist is of God. CAP 4. 1 So a man gesse vs, as mynystris of Crist, and dispenderis of the mynysteries of God. 2 Now it is souyt here among the dispenderis, that a man be foundun trewe. 3 And to me it is for the leest thing, that Y be demyd of you, or of mannus dai; but nether Y deme my silf. 4 For Y am no thing ouer trowynge to my silf, but not in this thing Y am iustified; for he that demeth me, is the Lord. 5 Therfor nyle ye deme bifore the tyme, til that the Lord come, which schal liytne the hyd thingis of derknessis, and schal schewe the counseils of hertis; and thanne preisyng schal be to ech man of God. 6 And, britheren, Y haue transfigurid these thingis in to me and in to Apollo, for you; that in vs ye lerne, lest ouer that it is writun, oon ayens another be blowun with pride for another. 7 Who demeth thee? And what hast thou, that thou hast not resseyued? And if thou hast resseyued, what gloriest thou, as thou haddist not resseyued? 8 Nowe ye ben fyllid, now ye ben maad riche; ye regnen with outen vs; and Y wolde that ye regnen, that also we regnen with you. 9 And Y gesse, that God schewide vs the laste apostlis, as thilke that ben sent to the deth; for we ben maad a spectacle to the world, and to aungels, and to men. 10 We foolis for Crist, but ye prudent in Crist; we sike, but ye stronge; ye noble, but we vnnoble. 11 Til in to this our we hungren, and thirsten, and ben nakid, and ben smytun with buffatis, 12 and we ben vnstable, and we trauelen worchynge with oure hondis; we ben cursid, and we blessen; we suffren persecucioun, and we abiden longe; we ben blasfemyd, and we bisechen; 13 as clensyngis of this world we ben maad the `out castyng of alle thingis `til yit. 14 Y write not these thingis, that Y confounde you, but Y warne as my moste dereworthe sones. 15 For whi if ye han ten thousynde of vndur maistris in Crist, but not many fadris; for in Crist Jhesu Y haue gendrid you bi the gospel. 16 Therfor, britheren, Y preye you, be ye foleweris of me, as Y of Crist. 17 Therfor Y sente to you Tymothe, which is my most dereworthe sone, and feithful in the Lord, which schal teche you my weies, that ben in Crist Jhesu; as Y teche euery where in ech chirche. 18 As thouy Y schulde not come to you, so summe ben blowun with pride; 19 but Y schal come to you soone, if God wole; and Y schal knowe not the word of hem that ben blowun with pride, but the vertu. 20 For the rewme of God is not in word, but in vertu. 21 What wole ye? Schal Y come to you in a yerde, or in charite, and in spirit of myldenesse? CAP 5. 1 In al maner fornycacioun is herd among you, and siche fornycacioun, which is not among hethene men, so that summan haue the wijf of his fadir. 2 And ye ben bolnyd with pride, and not more hadden weilyng, that he that dide this werk, be takun awei fro the myddil of you. 3 And Y absent in bodi, but present in spirit, now haue demyd as present hym that hath thus wrouyt, whanne 4 ye ben gaderid togidere in the name of oure Lord Jhesu Crist, and my spirit, with the vertu of the Lord Jhesu, 5 to take siche a man to Sathanas, in to the perischyng of fleisch, that the spirit be saaf in the dai of oure Lord Jhesu Crist. 6 Youre gloriyng is not good. Witen ye not, that a litil sourdow apeyrith al the gobet? 7 Clense ye out the old sourdow, that ye be new sprengyng togidere, as ye ben therf. For Crist offrid is oure pask. 8 Therfor ete we, not in eld sourdowy, nether in sourdowy of malice and weywardnesse, but in therf thingis of clernesse and of treuthe. 9 I wroot to you in a pistle, that ye be not medlid with letchours, 10 not with letchours of this world, ne coueitous men, ne raueynours, ne with men seruynge to mawmetis, ellis ye schulden haue go out of this world. 11 But now Y wroot to you, that ye be not meynd. But if he that is named a brother among you, and is a letchour, or coueitouse, or seruynge to ydols, or cursere, or ful of drunkenesse, or raueynour, to take no mete with siche. 12 For what is it to me to deme of hem that ben with oute forth? Whether ye demen not of thingis that ben with ynne forth? 13 For God schal deme hem that ben withouten forth. Do ye awei yuel fro you silf. CAP 6. 1 Dar any of you that hath a cause ayens another, be demed at wickid men, and not at hooli men? 2 Whether ye witen not, that seyntis schulen deme of this world? And if the world schal be demed bi you, be ye vnworthi to deme of the leste thingis? 3 Witen ye not, that we schulen deme aungels? hou myche more worldli thingis? 4 Therfor if ye han worldli domes, ordeyne ye tho contemptible men, that ben in the chirche, to deme. 5 Y seie to make you aschamed. So ther is not ony wise man, that may deme bitwixe a brothir and his brothir; 6 but a brothir with brothir stryueth in dom, and that among vnfeithful men. 7 And now trespas is algatis in you, for ye han domes among you. Whi rather take ye no wrong? whi rather suffre ye not disseit? 8 But and ye doen wrong, and doen fraude, and that to britheren. 9 Whether ye witen not, that wickid men schulen not welde the kyngdom of God? Nyle ye erre; nethir letchours, nether men that seruen mawmetis, nether auouteris, 10 nether letchouris ayen kynde, nether thei that doon letcheri with men, nether theues, nether auerouse men, nethir `ful of drunkenesse, nether curseris, nether rauenours, schulen welde the kyngdom of God. 11 And ye weren sum tyme these thingis; but ye ben waischun, but ye ben halewid, but ye ben iustefied in the name of oure Lord Jhesu Crist, and in the spirit of oure God. 12 Alle thingis ben leeueful to me, but not alle thingis ben spedeful. Alle thingis ben leeueful to me, but Y schal not be brouyt doun vndur ony mannus power. 13 Mete to the wombe, and the wombe to metis; and God schal distruye bothe this and that. And the bodi not to fornycacioun, but to the Lord, and the Lord to the bodi. 14 For God reiside the Lord, and schal reise vs bi his vertu. 15 Witen ye not, that youre bodies ben membris of Crist? Schal Y thanne take the membris of Crist, and schal Y make the membris of an hoore? God forbede. 16 Whether ye witen not, that he that cleueth to an hoore, is maad o bodi? For he seith, Ther schulen be tweyne in o fleisch. 17 And he that cleueth to the Lord, is o spirit. 18 Fle ye fornycacioun; al synne what euere synne a man doith, is with out the bodi; but he that doith fornycacioun, synneth ayens his bodi. 19 Whether ye witen not, that youre membris ben the temple of the Hooli Goost, that is in you, whom ye han of God, and ye ben not youre owne? 20 For ye ben bouyt with greet prijs. Glorifie ye, and bere ye God in youre bodi. CAP 7. 1 But of thilke thingis that ye han write to me, it is good to a man to touche not a womman. 2 But for fornycacioun eche man haue his owne wijf, and ech womman haue hir owne hosebonde. 3 The hosebonde yelde dette to the wijf, and also the wijf to the hosebonde. 4 The womman hath not power of hir bodi, but the hosebonde; and the hosebonde hath not power of his bodi, but the womman. 5 Nyle ye defraude eche to othere, but perauenture of consent to a tyme, that ye yyue tent to preier; and eft turne ye ayen to the same thing, lest Sathanas tempte you for youre vncontynence. 6 But Y seie this thing as yyuyng leeue, not bi comaundement. 7 For Y wole, that alle men be as my silf. But eche man hath his propre yifte of God; oon thus, and another thus. 8 But Y seie to hem, that ben not weddid, and to widewis, it is good to hem, if thei dwellen so as Y. 9 That if thei conteynen not hem silf, be thei weddid; for it is betere to be weddid, than to be brent. 10 But to hem that ben ioyned in matrymonye, Y comaunde, not Y, but the Lord, that the wijf departe not fro the hosebonde; 11 and that if sche departith, that sche dwelle vnweddid, or be recounselid to hir hosebonde; and the hosebonde forsake not the wijf. 12 But to othere Y seie, not the Lord. If ony brother hath an vnfeithful wijf, and sche consenteth to dwelle with hym, leeue he hir not. 13 And if ony womman hath an vnfeithful hosebonde, and this consentith to dwelle with hir, leeue sche not the hosebonde. 14 For the vnfeithful hosebonde is halewid bi the feithful womman, and the vnfeithful womman is halewid bi the feithful hosebonde. Ellis youre children weren vncleene, but now thei ben hooli. 15 That if the vnfeithful departith, departe he. For whi the brother or sistir is not suget to seruage in siche; for God hath clepid vs in pees. 16 And wherof wost thou, womman, if thou schalt make the man saaf; or wherof wost thou, man, if thou schalt make the womman saaf? 17 But as the Lord hath departid to ech, and as God hath clepid ech man, so go he, as Y teche in alle chirchis. 18 A man circumcidid is clepid, brynge he not to the prepucie. A man is clepid in prepucie, be he not circumcidid. 19 Circumcisioun is nouyt, and prepucie is nouyt, but the kepyng of the maundementis of God. 20 Ech man in what clepyng he is clepid, in that dwelle he. 21 Thou seruaunt art clepid, be it no charge to thee; but if thou maist be fre, `the rather vse thou. 22 He that is a seruaunt, and is clepid in the Lord, is a freman of the Lord. Also he that is a freman, and is clepid, is the seruaunt of Crist. 23 With prijs ye ben bouyt; nyle ye be maad seruauntis of men. 24 Therfor ech man in what thing he is clepid a brothir, dwelle he in this anentis God. 25 But of virgyns Y haue no comaundement of God; but Y yyue counseil, as he that hath mercy of the Lord, that Y be trewe. 26 Therfor Y gesse, that this thing is good for the present nede; for it is good to a man to be so. 27 Thou art boundun to a wijf, nyle thou seke vnbyndyng; thou art vnboundun fro a wijf, nyle thou seke a wijf. 28 But if thou hast takun a wijf, thou hast not synned; and if a maidun is weddid, sche synnede not; nethelesse siche schulen haue tribulacioun of fleisch. 29 But Y spare you. Therfor, britheren, Y seie this thing, The tyme is schort. Another is this, that thei that han wyues, be as thouy thei hadden noon; 30 and thei that wepen, as thei wepten not; and thei that ioien, as thei ioieden not; and thei that bien, as thei hadden not; 31 and thei that vsen this world, as thei that vsen not. For whi the figure of this world passith. 32 But Y wole, that ye be without bisynesse, for he that is without wijf, is bisi what thingis ben of the Lord, hou he schal plese God. 33 But he that is with a wijf, is bysy what thingis ben of the world, hou he schal plese the wijf, and he is departid. 34 And a womman vnweddid and maidun thenkith what thingis ben of the Lord, that sche be hooli in bodi and spirit. But sche that is weddid, thenkith what thingis ben of the world, hou sche schal plese the hosebonde. 35 And Y seie these thingis to youre profit, not that Y caste to you a snare, but to that that is onest, and that yyueth esynesse, with outen lettyng to make preieris to the Lord. 36 And if ony man gessith hym silf to be seyn foule on his virgyn, that sche is ful woxun, and so it bihoueth to be doon, do sche that that sche wole; sche synneth not, if sche be weddid. 37 For he that ordeynede stabli in his herte, not hauynge nede, but hauynge power of his wille, and hath demed in his herte this thing, to kepe his virgyn, doith wel. 38 Therfore he that ioyneth his virgyn in matrymonye, doith wel; and he that ioyneth not, doith betere. 39 The womman is boundun to the lawe, as longe tyme as hir hosebonde lyueth; and if hir hosebonde is deed, sche is delyuered fro the lawe of the hosebonde, be sche weddid to whom sche wole, oneli in the Lord. 40 But sche schal be more blessid, if sche dwellith thus, aftir my counsel; and Y wene, that Y haue the Spirit of God. CAP 8. 1 But of these thingis that ben sacrified to ydols, we witen, for alle we han kunnyng. But kunnyng blowith, charite edefieth. 2 But if ony man gessith, that he kan ony thing, he hath not yit knowe hou it bihoueth hym to kunne. 3 And if ony man loueth God, this is knowun of hym. 4 But of metis that ben offrid to idols, we witen, that an idol is no thing in the world, and that ther is no God but oon. 5 For thouy ther ben summe that ben seid goddis, ethir in heuene, ether in erthe, as ther ben many goddis, and many lordis; 6 netheles to vs is o God, the fadir, of whom ben alle thingis, and we in hym; and o Lord Jhesu Crist, bi whom ben alle thingis, and we bi hym. 7 But not in alle men is kunnyng. For summen with conscience of ydol til now eten as thing offrid to idolis; and her conscience is defoulid, for it is sijk. 8 Mete comendith vs not to God; for nether we schulen faile, if we eten not, nether if we eten, we schulen haue plente. 9 But se ye, lest perauenture this your leeue be maad hurtyng to sijke men. 10 For if ony man schal se hym, that hath kunnyng, etynge in a place where idols ben worschipid, whethir his conscience, sithen it is sijke, schal not be edified to ete thingis offrid to idols? 11 And the sijk brothir, for whom Crist diede, schal perische in thi kunnyng. 12 For thus ye synnyng ayens britheren, and smytynge her sijk conscience synnen ayens Crist. 13 Wherfor if mete sclaundrith my brother, Y schal neuere ete fleisch, lest Y sclaundre my brothir. CAP 9. 1 Whether Y am not fre? Am Y not apostle? Whether Y saiy not `Crist Jhesu, `oure Lord? Whether ye ben not my werk in the Lord? 2 And thouy to othere Y am not apostle, but netheles to you Y am; for ye ben the litle signe of myn apostlehed in the Lord. 3 My defense to hem that axen me, that is. 4 Whether we han not power to ete and drynke? 5 Whether we han not power to lede aboute a womman a sistir, as also othere apostlis, and britheren of the Lord, and Cefas? 6 Or Y aloone and Barnabas han not power to worche these thingis? 7 Who traueilith ony tyme with hise owne wagis? Who plauntith a vynyerd, and etith not of his fruyt? Who kepith a flok, and etith not of the mylk of the flok? 8 Whether aftir man Y sey these thingis? whether also the lawe seith not these thingis? 9 For it is writun in the lawe of Moises, Thou schalt not bynde the mouth of the ox threischynge. Whethir of oxun is charge to God? 10 Whether for vs he seith these thingis? For whi tho ben writun for vs; for he that erith, owith to ere in hope, and he that threischith, in hope to take fruytis. 11 If we sowen spiritual thingis to you, is it grete, if we repen youre fleischli thingis? 12 If othere ben parteneris of youre power, whi not rathere we? But we vsen not this power, but we suffren alle thingis, that we yyuen no lettyng to the euangelie of Crist. 13 Witen ye not, that thei that worchen in the temple, eten tho thingis that ben of the temple, and thei that seruen to the auter, ben partyneris of the auter? 14 So the Lord ordeynede to hem that tellen the gospel, to lyue of the gospel. 15 But Y vside noon of these thingis; sotheli Y wroot not these thingis, that tho be don so in me; for it is good `to me rather to die, than that ony man `auoyde my glorie. 16 For if Y preche the gospel, glorie is not to me, for nedelich Y mot don it; for wo to me, if Y preche not the gospel. 17 But if Y do this thing wilfuli, Y haue mede; but if ayens my wille, dispending is bitakun to me. 18 What thanne is my mede? That Y prechynge the gospel, putte the gospel with outen otheris cost, that Y vse not my power in the gospel. 19 Forwhi whanne Y was fre of alle men, Y made me seruaunt of alle men, to wynne the mo men. 20 And to Jewis Y am maad as a Jew, to wynne the Jewis; to hem that ben vndur the lawe, 21 as Y were vndur the lawe, whanne Y was not vndur the lawe, to wynne hem that weren vndur the lawe; to hem that weren with out lawe, as Y were with out lawe, whanne Y was not with out the lawe of God, but Y was in the lawe of Crist, to wynne hem that weren with out lawe. 22 Y am maad sijk to sike men, to wynne sike men; to alle men Y am maad alle thingis, to make alle men saaf. 23 But Y do alle thingis for the gospel, that Y be maad partener of it. 24 Witen ye not, that thei that rennen in a furlong, alle rennen, but oon takith the prijs? So renne ye, that ye catche. 25 Ech man that stryueth in fiyt, absteyneth hym fro alle thingis; and thei, that thei take a corruptible coroun, but we an vncorrupt. 26 Therfor Y renne so, not as `in to vncerteyn thing; thus Y fiyte, not as betynge the eir; 27 but Y chastise my bodi, and bryng it in to seruage; lest perauenture whanne Y preche to othere, Y my silf be maad repreuable. CAP 10. 1 Britheren, Y nyle, that ye vnknowe, that alle oure fadris weren vndur cloude, and alle passiden the see; 2 and alle weren baptisid in Moises, in the cloude and in the see; 3 and alle eeten the same spiritual mete, 4 and alle drunken the same spiritual drynke; thei drunken of the spiritual stoon folewynge hem; and the stoon was Crist. 5 But not in ful manye of hem it was wel pleasaunt to God; for whi thei weren cast doun in desert. 6 But these thingis ben don in figure of vs, that we be not coueyteris of yuele thingis, as thei coueitiden. 7 Nether be ye maad idolatreris, as summe of hem; as it is writun, The puple sat to ete and drynke, and thei risen vp to pleie. 8 Nether do we fornycacioun, as summe of hem diden fornicacioun, and thre and twenti thousyndis weren deed in o dai. 9 Nethir tempte we Crist, as summe of hem temptiden, and perischiden of serpentis. 10 Nether grutche ye, as summe of hem grutchiden, and thei perischiden of a distrier. 11 And alle these thingis felliden to hem in figure; but thei ben writun to oure amendyng, in to whiche the endis of the worldis ben comun. 12 Therfor he that gessith hym, `that he stondith, se he, that he falle not. 13 Temptacioun take `not you, but mannus temptacioun; for God is trewe, which schal not suffre you to be temptid aboue that that ye moun; but he schal make with temptacioun also purueyaunce, that ye moun suffre. 14 Wherfor, ye most dereworthe to me, fle ye fro worschiping of maumetis. 15 As to prudent men Y speke, deme ye you silf that thing that Y seie. 16 Whether the cuppe of blessyng which we blessen, is not the comynyng of Cristis blood? and whether the breed which we breken, is not the takyng of the bodi of the Lord? 17 For we manye ben o breed and o bodi, alle we that taken part of o breed and of o cuppe. 18 Se ye Israel aftir the fleisch, whethir thei that eeten sacrifices, ben not partyneris of the auter? 19 What therfor seie Y, that a thing that is offrid to idols is ony thing, or that the idol is ony thing? 20 But tho thingis that hethene men offren, thei offren to deuelis, and not to God. But Y nyle, that ye ben maad felowis of feendis; for ye moun not drynke the cuppe of the Lord, and the cuppe of fendis; 21 ye moun not be parteneris of the boord of the Lord, and of the bord of feendis. 22 Whether we han enuye to the Lord? whether we ben strengere then he? Alle thingis ben leeueful to me, but not alle thingis ben spedeful. 23 Alle thingis ben leeueful to me, but not alle thingis edifien. 24 No man seke that thing that is his owne, but that thing that is of an othere. 25 Al thing that is seld in the bocherie, ete ye, axynge no thing for conscience. 26 The erthe and the plente of it is, the Lordis. 27 If ony of hethene men clepith you to soper, and ye wole go, al thing that is set to you, ete ye, axynge no thing for conscience. 28 But if ony man seith, This thing is offrid to idols, nyle ye ete, for hym that schewide, and for conscience; and Y seie not, 29 thi conscience, but of an othere. But wherto is my fredom demed of an othere mannus conscience? 30 Therfor if Y take part with grace, what am Y blasfemed, for that that Y do thankyngis? 31 Therfor whether ye eten, or drynken, or don ony other thing, do ye alle thingis `in to the glorie of God. 32 Be ye with outen sclaundre to Jewis, and to hethene men, and to the chirche of God; 33 as Y bi alle thingis plese to alle men, not sekynge that that is profitable to me, but that that is profitable to manye men, that thei be maad saaf. CAP 11. 1 Be ye my foleweris, as Y am of Crist. 2 And, britheren, Y preise you, that bi alle thingis ye ben myndeful of me; and as Y bitook to you my comaundementis, ye holden. 3 But Y wole that ye wite, that Crist is heed of ech man; but the heed of the womman is the man; and the heed of Crist is God. 4 Ech man preiynge, or profeciynge, whanne his heed is hilid, defoulith his heed. 5 But ech womman preiynge, or profeciynge, whanne hir heed is not hilid, defoulith hir heed; for it is oon, as if sche were pollid. 6 And if a womman be not keuered, be sche pollid; and if it is foul thing to a womman to be pollid, or to be maad ballid, hile sche hir heed. 7 But a man schal not hile his heed, for he is the ymage and the glorie of God; but a womman is the glorie of man. 8 For a man is not of the womman, but the womman of the man. 9 And the man is not maad for the womman, but the womman for the man. 10 Therfor the womman schal haue an hilyng on hir heed, also for aungelis. 11 Netheles nether the man is with outen womman, nether the womman is with oute man, in the Lord. 12 Forwhi as the womman is of man, so the man is bi the womman; but alle thingis ben of God. 13 Deme ye you silf; bisemeth it a womman not hilid on the heed to preye God? 14 Nether the kynde it silf techith vs, for if a man nursche longe heer, it is schenschipe to hym; 15 but if a womman nurische longe heer, it is glorie to hir, for heeris ben youun to hir for keueryng. 16 But if ony man is seyn to be ful of strijf, we han noon siche custom, nethir the chirche of God. 17 But this thing Y comaunde, not preisynge, that ye comen togidere not in to the betere, but in to the worse. 18 First for whanne ye comen togidere in to the chirche, Y here that discenciouns ben, and in parti Y bileue. 19 For it bihoueth eresies to be, that thei that ben prouyd, ben opynli knowun in you. 20 Therfor whanne ye comen togidere in to oon, now it is not to ete the Lordis soper; 21 for whi ech man bifor takith his soper to ete, and oon is hungry, and another is drunkun. 22 Whether ye han not housis to ete and drynke, or ye dispisen the chirche of God, and confounden hem that han noon? What schal Y seie to you? Y preise you, but here yn Y preise you not. 23 For Y haue takun of the Lord that thing, which Y haue bitakun to you. For the Lord Jhesu, in what niyt he was bitraied, 24 took breed, and dide thankyngis, and brak, and seide, Take ye, and ete ye; this is my bodi, which schal be bitraied for you; do ye this thing in to my mynde. 25 Also the cuppe, aftir that he hadde soupid, and seide, This cuppe is the newe testament in my blood; do ye this thing, as ofte as ye schulen drynke, in to my mynde. 26 For as ofte as ye schulen ete this breed, and schulen drynke the cuppe, ye schulen telle the deth of the Lord, til that he come. 27 Therfor who euere etith the breed, or drynkith the cuppe of the Lord vnworthili, he schal be gilti of the bodi and of the blood of the Lord. 28 But preue a man hym silf, and so ete he of `the ilke breed, and drynke of the cuppe. 29 For he that etith and drinkith vnworthili, etith and drinkith doom to hym, not wiseli demyng the bodi of the Lord. 30 Therfor among you many ben sijke and feble, and manye slepen. 31 And if we demyden wiseli vs silf, we schulden not be demyd; 32 but while we ben demyd of the Lord, we ben chastisid, that we be not dampnyd with this world. 33 Therfor, my britheren, whanne ye comen togidere to ete, abide ye togidere. 34 If ony man hungrith, ete he at home, that ye come not togidere in to doom. And Y schal dispose othere thingis, whanne Y come. CAP 12. 1 But of spiritual thingis, britheren, Y nyle that ye vnknowun. 2 For ye witen, that whanne ye weren hethene men, hou ye weren led goynge to doumbe maumetis. 3 Therfor Y make knowun to you, that no man spekynge in the spirit of God, seith departyng fro Jhesu; and no man may seie the Lord Jhesu, but in the Hooli Goost. 4 And dyuerse graces ther ben, but it is al oon Spirit; 5 and dyuerse seruyces ther ben, but it is al oon Lord; and dyuerse worchingis ther ben, 6 but `al is oon God, that worchith alle thingis in alle thingis. 7 And to ech man the schewyng of spirit is youun to profit. The word of wisdom is youun to oon bi spirit; 8 to another the word of kunnyng, bi the same spirit; 9 feith to another, in the same spirit; to anothere, grace of helthis, in o spirit; 10 to another, the worchyng of vertues; to another, profecie; to another, very knowyng of spiritis; to another, kyndis of langagis; to another, expownyng of wordis. 11 And oon and the same spirit worchith alle these thingis, departynge to ech bi hem silf as he wole. 12 For as ther is o body, and hath many membris, and alle the membris of the bodi whanne tho ben manye, ben o bodi, so also Crist. 13 For in o spirit alle we ben baptisid `in to o bodi, ether Jewis, ether hethene, ether seruauntis, ether free; and alle we ben fillid with drink in o spirit. 14 For the bodi is not o membre, but manye. 15 If the foot seith, For Y am not the hoond, Y am not of the bodi; not therfor it is not of the bodi. 16 And if the ere seith, For Y am not the iye, Y am not of the bodi; not therfor it is not of the bodi. 17 If al the bodi is the iye, where is heryng? and if al the bodi is heryng, where is smellyng? 18 But now God hath set membris, and ech of hem in the bodi, as he wolde. 19 That if alle weren o membre, where were the bodi? 20 But now ther ben many membris, but o bodi. 21 And the iye may not seie to the hond, Y haue no nede to thi werkis; or eft the heed to the feet, Ye ben not necessarie to me. 22 But myche more tho that ben seyn to be the lowere membris of the bodi, ben more nedeful; 23 and thilke that we gessen to be the vnworthier membris of the bodi, we yyuen more honour `to hem; and tho membris that ben vnonest, han more oneste. 24 For oure oneste membris han nede of noon; but God tempride the bodi, yyuynge more worschip to it, to whom it failide, 25 that debate be not in the bodi, but that the membris be bisi in to the same thing ech for othere. 26 And if o membre suffrith ony thing, alle membris suffren therwith; ethir if o membre ioieth, alle membris ioien togidere. 27 And ye ben the bodi of Crist, and membris of membre. 28 But God sette sum men in the chirche, fyrst apostlis, the secunde tyme prophetis, the thridde techeris, aftirward vertues, aftirward graces of heelyngis, helpyngis, gouernails, kyndis of langagis, interpretaciouns of wordis. 29 Whether alle apostlis? whethir alle prophetis? whether alle techeris? whether alle vertues? 30 whether alle men han grace of heelyngis? whether alle speken with langagis? whether alle expownen? 31 But sue ye the betere goostli yiftis. And yit Y schewe to you a more exellent weye. CAP 13. 1 If Y speke with tungis of men and of aungels, and Y haue not charite, Y am maad as bras sownynge, or a cymbal tynkynge. 2 And if Y haue prophecie, and knowe alle mysteries, and al kunnynge, and if Y haue al feith, so that Y meue hillis fro her place, and Y haue not charite, Y am nouyt. 3 And if Y departe alle my goodis in to the metis of pore men, and yf Y bitake my bodi, so that Y brenne, and if Y haue not charite, it profitith to me no thing. 4 Charite is pacient, it is benygne; charite enuyeth not, it doith not wickidli, it is not blowun, 5 it is not coueytouse, it sekith not tho thingis that ben hise owne, it is not stirid to wraththe, it thenkith not yuel, 6 it ioyeth not on wickidnesse, but it ioieth togidere to treuthe; 7 it suffrith alle thingis, it bileueth alle thingis, it hopith alle thingis, it susteyneth alle thingis. 8 Charite fallith neuere doun, whether prophecies schulen be voidid, ethir langagis schulen ceesse, ethir science schal be distried. 9 For a parti we knowun, and a parti we prophecien; 10 but whanne that schal come that is parfit, that thing that is of parti schal be auoidid. 11 Whanne Y was a litil child, Y spak as a litil child, Y vndurstood as a litil child, Y thouyte as a litil child; but whanne Y was maad a man, Y auoidide tho thingis that weren of a litil child. 12 And we seen now bi a myrour in derknesse, but thanne face to face; now Y knowe of parti, but thanne Y schal knowe, as Y am knowun. 13 And now dwellen feith, hope, and charite, these thre; but the most of these is charite. CAP 14. 1 Sue ye charite, loue ye spiritual thingis, but more that ye prophecien. 2 And he that spekith in tunge, spekith not to men, but to God; for no man herith. But the spirit spekith mysteries. 3 For he that prophecieth, spekith to men to edificacioun, and monestyng, and coumfortyng. 4 He that spekith in tunge, edifieth hym silf; but he that prophecieth, edifieth the chirche of God. 5 And Y wole, that alle ye speke in tungis, but more that ye prophecie. For he that prophecieth, is more than he that spekith in langagis; but perauenture he expoune, that the chirche take edificacioun. 6 But now, britheren, if Y come to you, and speke in langagis, what schal Y profite to you, but if Y speke to you ethir in reuelacioun, ethir in science, ethir in prophecie, ether in techyng? 7 For tho thingis that ben withouten soule, and yyueth voices, ethir pipe, ether harpe, but tho yyuen distinccioun of sownyngis, hou schal it be knowun that is sungun, ether that that is trumpid? 8 For if a trumpe yyue an vncerteyn soune, who schal make hym silf redi to batel? 9 So but ye yyuen an opyn word bi tunge, hou schal that that is seid be knowun? For ye schulen be spekynge in veyn. 10 There ben many kyndis of langagis in this world, and no thing is with outen vois. 11 But if Y knowe not the vertu of a vois, Y schal be to hym, to whom Y schal speke, a barbarik; and he that spekith to me, schal be a barbarik. 12 So ye, for ye ben loueris of spiritis, seke ye that ye be plenteuouse to edificacioun of the chirche. 13 And therfor he that spekith in langage, preie, that he expowne. 14 For if Y preye in tunge, my spirit preieth; myn vndurstondyng is with outen fruyt. 15 What thanne? Y schal preye in spirit, Y schal preye in mynde; Y schal seie salm, in spirit, Y schal seie salm also in mynde. 16 For if thou blessist in spirit, who fillith the place of an ydiot, hou schal he seie Amen on thi blessyng, for he woot not, what thou seist? 17 For thou doist wel thankyngis, but an othir man is not edefied. 18 Y thanke my God, for Y speke in the langage of alle you; 19 but in the chirche Y wole speke fyue wordis in my wit, that also Y teche othere men, than ten thousynde of wordis in tunge. 20 Britheren, nyle ye be maad children in wittis, but in malice be ye children; but in wittis be ye parfit. 21 For in the lawe it is writun, That in othere tungis and othere lippis Y schal speke to this puple, and nether so thei schulen here me, seith the Lord. 22 Therfor langagis ben in to tokene, not to feithful men, but to men out of the feith; but prophecies ben not to men out of the feith, but to feithful men. 23 Therfor if alle the chirche come togidere in to oon, and alle men speken in tungis, if idiotis, ether men out of the feith, entren, whether thei schulen not seie, What ben ye woode? 24 But if alle men prophecien, if ony vnfeithful man or idiot entre, he is conuyct of alle, he is wiseli demyd of alle. 25 For the hid thingis of his herte ben knowun, and so he schal falle doun on the face, and schal worschipe God, and schewe verili that God is in you. 26 What thanne, britheren? Whanne ye comen togidere, ech of you hath a salm, he hath techyng, he hath apocalips, he hath tunge, he hath expownyng; alle thingis be thei don to edificacioun. 27 Whether a man spekith in tunge, bi twei men, ethir thre at the moste, and bi partis, that oon interprete. 28 But if there be not an interpretour, be he stille in the chirche, and speke he to hym silf and to God. 29 Prophetis tweine or thre seie, and othere wiseli deme. 30 But if ony thing be schewid to a sittere, the formere be stille. 31 For ye moun `prophecie alle, ech bi hym silf, that alle men lerne, and alle moneste. 32 And the spiritis of prophetis ben suget to prophetis; 33 for whi God is not of discencioun, but of pees; as in alle chirchis of hooli men `Y teche. 34 Wymmen in chirchis be stille; for it is not suffrid to hem to speke, but to be suget, as the lawe seith. 35 But if thei wolen ony thing lerne, `at home axe thei her hosebondis; for it is foule thing to a womman to speke in chirche. 36 Whether `of you the word of God cam forth, or to you aloone it cam? 37 If ony man is seyn to be a prophete, or spiritual, knowe he tho thingis that Y write to you, for tho ben the comaundementis of the Lord. 38 And if ony man vnknowith, he schal be vnknowun. 39 `Therfor, britheren, loue ye to prophecie, and nyle ye forbede to speke in tungis. 40 But be alle thingis don onestli, and bi due ordre in you. CAP 15. 1 `Sotheli, britheren, Y make the gospel knowun to you, which Y haue prechid to you, the which also ye han takun, in which ye stonden, 2 also bi which ye schulen be sauyd; `bi which resoun Y haue prechid to you, if ye holden, `if ye han not bileuyd ideli. 3 For Y bitook to you at the bigynnyng that thing which also Y haue resseyued; that Crist was deed for oure synnes, bi the scripturis; 4 and that he was biried, and that he roos ayen in the thridde dai, after scripturis; 5 and that he was seyn to Cephas, and aftir these thingis to enleuene; 6 aftirward he was seyn to mo than fyue hundrid britheren togidere, of whiche manye lyuen yit, but summe ben deed; aftirward he was seyn to James, 7 and aftirward to alle the apostlis. 8 And last of alle he was seyn also to me, as to a deed borun child. 9 For Y am the leste of apostlis, that am not worthi to be clepid apostle, for Y pursuede the chirche of God. 10 But bi the grace of God Y am that thing that Y am; and his grace was not voide in me. For Y trauelide more plenteuously than alle thei; but not Y, but the grace of God with me. 11 But whether Y, or thei, so we han prechid, and so ye han bileuyd. 12 And if Crist is prechid, that he roos ayen fro deeth, hou seien summen among you, that the ayenrisyng of deed men is not? 13 And if the ayenrisyng of deed men is not, nethir Crist roos ayen fro deeth. 14 And if Crist roos not, oure preching is veyn, oure feith is veyn. 15 And we ben foundun false witnessis of God, for we han seid witnessyng ayens God, that he reiside Crist, whom he reiside not, if deed men risen not ayen. 16 Forwhi if deed men risen not ayen, nether Crist roos ayen; 17 and if Crist roos not ayen, oure feith is veyn; and yit ye ben in youre synnes. 18 And thanne thei that han diede in Crist, han perischid. 19 If in this life oneli we ben hoping in Crist, we ben more wretchis than alle men. 20 But now Crist roos ayen fro deth, the firste fruit of deed men; 21 for deeth was bi a man, and bi a man is ayenrisyng fro deth. 22 And as in Adam alle men dien, so in Crist alle men schulen be quykenyd. 23 But ech man in his ordre; the firste fruit, Crist, afterward thei that ben of Crist, that bileueden in the comyng of Crist; 24 aftirward an ende, whanne he schal bitake the kyngdom to God and to the fadir, whanne he schal auoide al princehod, and power, and vertu. 25 But it bihoueth hym to regne, til he putte alle hise enemyes vndur hise feet. 26 And at the laste, deth the enemye schal be distried; for he hath maad suget alle thingis vndur hise feet. 27 And whanne he seith, alle thingis ben suget to hym, with outen doubt outakun hym that sugetide alle thingis to hym. 28 And whanne alle thingis ben suget to hym, thanne the sone hym silf schal be suget to hym, that made `alle thingis suget to hym, that God be alle thingis in alle thingis. 29 Ellis what schulen thei do, that ben baptisid for deed men, if in no wise deed men risen ayen? wherto ben thei baptisid for hem? 30 And wherto ben we in perel euery our? 31 Ech dai Y die for youre glorie, britheren, which glorie Y haue in Crist Jhesu oure Lord. 32 If aftir man Y haue fouyten to beestis at Efesi, what profitith it to me, if deed men risen not ayen? Ete we, and drynke we, for we schulen die to morewe. 33 Nyle ye be disseyued; for yuel spechis distrien good thewis. 34 Awake ye, iuste men, and nyle ye do synne; for summen han ignoraunce of God, but to reuerence Y speke to you. 35 But summan seith, Hou schulen deed men rise ayen, or in what maner bodi schulen thei come? 36 Vnwise man, that thing that thou sowist, is not quykened, but it die first; 37 and that thing that thou sowist, `thou sowist not the bodi that is to come, but a nakid corn, as of whete, or of summe othere seedis; 38 and God yyueth to it a bodi, as he wole, and to ech of seedis a propir bodi. 39 Not ech fleisch is the same fleisch, but oon is of men, another is of beestis, another is of briddis, an othere of fischis. 40 And `heuenli bodies ben, and `ertheli bodies ben; but oon glorie is of heuenely bodies, and anothir is of ertheli. 41 An othere clerenesse is of the sunne, anothere clerenesse is of the moone, and anothere clerenesse is of sterris; and a sterre dyuersith fro a sterre in clerenesse. 42 And so the ayenrisyng of deed men. It is sowun in corrupcioun, it schal rise in vncorrupcioun; 43 it is sowun in vnnoblei, it schal rise in glorie; it is sowun in infirmyte, it schal rise in vertu; 44 it is sowun a beestly bodi, it schal rise a spiritual bodi. If ther is a beestli bodi, ther is also a spiritual bodi; 45 as it is writun, The firste man Adam was maad in to a soule lyuynge, the laste Adam in to a spirit quykenynge. 46 But the firste is not that that is spiritual, but that that is beestlich, aftirward that that is spiritual. 47 The firste man of erthe is ertheli; the secounde man of heuene is heuenelich. 48 Such as the ertheli man is, such ben the ertheli men; and such as the heueneli man is, suche ben also the heueneli men. 49 Therfor as we han bore the ymage of the ertheli man, bere we also the ymage of the heuenli. 50 Britheren, Y seie this thing, that fleisch and bloud moun not welde the kyngdom of God, nethir corrupcioun schal welde vncorrupcioun. 51 Lo! Y seie to you priuyte of hooli thingis. And alle we schulen rise ayen, but not alle we schulen be chaungid; 52 in a moment, in the twynklyng of an iye, in the laste trumpe; for the trumpe schal sowne, and deed men schulen rise ayen, with oute corrupcioun, and we schulen be chaungid. 53 For it byhoueth this corruptible thing to clothe vncorrupcioun, and this deedli thing to putte awei vndeedlinesse. 54 But whanne this deedli thing schal clothe vndeedlynesse, thanne schal the word be doon, that is writun, Deth is sopun vp in victorie. 55 Deth, where is thi victorie? Deth, where is thi pricke? 56 But the pricke of deth is synne; and the vertu of synne is the lawe. 57 But do we thankyngis to God, that yaf to vs victorie bi oure Lord Jhesu Crist. 58 Therfore, my dereworthe britheren, be ye stidefast, and vnmouable, beynge plenteuouse in werk of the Lord, euere more witynge that youre trauel is not idel in the Lord. CAP 16. 1 But of the gaderyngis of money that ben maad in to seyntis, as Y ordeynede in the chirchis of Galathie, so also do ye o dai of the wouke. 2 Ech of you kepe at hym silf, kepynge that that plesith to him, that whanne Y come, the gaderyngis ben not maad. 3 And whanne Y schal be present, whiche men ye preuen, Y schal sende hem bi epistlis to bere youre grace in to Jerusalem. 4 That if it be worthi that also Y go, thei schulen go with me. 5 But Y schal come to you, whanne Y schal passe bi Macedonye; for whi Y schal passe bi Macedonye. 6 But perauenture Y schal dwelle at you, or also dwelle the wynter, that and ye lede me whidir euere Y schal go. 7 And Y wole not now se you in my passyng, for Y hope to dwelle with you awhile, if the Lord schal suffre. 8 But Y schal dwelle at Efesi, `til to Witsuntide. 9 For a grete dore and an opyn is openyd to me, and many aduersaries. 10 And if Thimothe come, se ye that he be with out drede with you, for he worcheth the werk of the Lord, as Y. 11 Therfor no man dispise hym; but lede ye hym forth in pees, that he come to me; for Y abide hym with britheren. 12 But, britheren, Y make knowun to you of Apollo, that Y preiede him myche, that he schulde come to you, with britheren. But it was not his wille to come now; but he schal come, whanne he schal haue leiser. 13 Walke ye, and stonde ye in the feith; do ye manli, and be ye coumfortid in the Lord, 14 and be alle youre thingis don in charite. 15 And, britheren, Y biseche you, ye knowen the hous of Stephan, and of Fortunati, and Acaicy, for thei ben the firste fruytis of Acaie, and in to mynystrie of seyntis thei han ordeyned hem silf; 16 that also ye be sugetis to suche, and to ech worchynge togidere and trauelynge. 17 For Y haue ioie in the presence of Stephan, and of Fortunate, and Acaici; 18 for thei filliden that thing that failide to you; for thei han refreischid bothe my spirit and youre. Therfor knowe ye hem, that ben suche maner men. 19 Alle the chirchis of Asie greten you wel. Aquila and Prisca, with her homeli chirche, greten you myche in the Lord, at the whiche also Y am herborid. 20 Alle bretheren greten you wel. Grete ye wel togidere in hooli cos. 21 My gretyng bi Poulis hoond. 22 If ony man loueth not oure Lord Jhesu Crist, be he cursid, Maranatha. 23 The grace of oure Lord Jhesu Crist be with you. 24 My charite be with you alle in Crist Jhesu oure Lord. Amen.

2 Corinthis

CAP 1. 1 Poul, apostle of Jhesu Crist, bi the wille of God, and Tymothe, brothir, to the chirche of God that is at Corinthi, with alle seyntis that ben in al Acaie, grace to you, 2 and pees of God oure fadir and of the Lord Jhesu Crist. 3 Blessid be God and the fadir of oure Lord Jhesu Crist, fadir of mercies, and God of al coumfort, 4 which coumfortith vs in al oure tribulacioun, that also we moun coumforte hem, that ben in al diseese, bi the monestyng bi which also we ben monestid of God. 5 For as the passiouns of Crist ben plenteuouse in vs, so also bi Crist oure coumfort is plenteuouse. 6 And whether we ben in tribulacioun, for youre tribulacioun and heelthe, ethir we ben coumfortid, for youre coumfort, ethir we ben monestid, for youre monestyng and heelthe. Which worchith in you the suffring of the same passiouns, whiche `we also suffren, 7 that oure hope be sad for you; witynge for as ye ben felowis of passiouns, so ye schulen ben also of coumfort. 8 For, britheren, we wolen that ye wite of oure tribulacioun, that was don in Asie; for ouer maner we weren greued ouer myyt, so that it anoiede vs, yhe, to lyue. 9 But we in vs silf hadden answere of deth, that we truste not in vs, but in God that reisith deed men. 10 Which delyuerede vs, and delyuerith fro so grete perelis, in to whom we hopen, also yit he schal delyuere, 11 while also ye helpen in preier for vs; that of the persones of many faces of that yyuyng that is in vs, thankyngis ben don for vs bi many men to God. 12 For oure glorie is this, the witnessyng of oure conscience, that in symplenesse and clennesse of God, and not in fleischli wisdom, but in the grace of God, we lyueden in this world, but more plenteuousli to you. 13 And we writen not othere thingis to you, than tho that ye han red and knowe, and Y hope that in to the ende ye schulen knowe, 14 as also ye han knowe vs a parti; for we ben youre glorie, as also ye ben oure in the dai of oure Lord Jhesu Crist. 15 And in this tristyng Y wolde first come to you, that ye schulden haue the secounde grace, 16 and passe bi you in to Macedonye, and eft fro Macedonye come to you, and of you be led in to Judee. 17 But whanne Y wolde this thing, whether Y vside vnstidfastnesse, ether tho thingis that Y thenke, Y thenke aftir the fleisch, that at me be, it is and it is not? 18 But God is trewe, for oure word that was at you is and is not, is not ther ynne, but is is in it. 19 For whi Jhesus Crist, the sone of God, which is prechid among you bi vs, bi me, and Syluan, and Tymothe, ther was not in hym is and is not, but is was in hym. 20 For whi hou many euer ben biheestis of God, in thilke is, `that is, ben fillid. And therfor and bi hym we seien amen to God, to oure glorie. 21 Sotheli it is God that confermeth vs with you in Crist, and the which God anoyntide vs, 22 and which markide vs, and yaf ernes of the spirit in oure hertis. 23 For Y clepide God to witnesse ayens my soule, that Y sparynge you cam not ouer to Corynthe; not that we ben lordis of youre feith, but we ben helperis of youre ioye; for thorouy bileue ye stonden. CAP 2. 1 And Y ordeynede this ilke thing at me, that Y schulde not come eftsoone in heuynes to you. 2 For if Y make you sori, who is he that gladith me, but he that is soreuful of me? 3 And this same thing Y wroot to you, that whanne Y come, Y haue not sorewe on sorewe, of the whiche it behofte me to haue ioie. And Y triste in you alle, that my ioye is of alle you. 4 For of myche tribulacioun and angwisch of herte Y wroot to you by many teeris, not that ye be sori, but that ye wite what charite Y haue more plenteuously in you. 5 For if ony man hath maad me soreuful, he hath not maad me sorewful but a parti, that Y charge not you alle. 6 This blamyng that ys maad of manye, suffisith to hym, that is sich oon; 7 so that ayenward ye rathir foryyuen and coumfort, lest perauenture he that is suche a maner man, be sopun vp bi more grete heuynesse. 8 For which thing Y biseche you, that ye conferme charite in to hym. 9 For whi therfor Y wroot this, that Y knowe youre preuyng, whether in alle thingis ye ben obedient. 10 For to whom ye han foryyuen ony thing, also Y haue foryyue. For Y that that Y foryaf, yif Y foryaf ony thing, haue youun for you in the persone of Crist, 11 that we be not disseyued of Sathanas; for we knowen hise thouytis. 12 But whanne Y was comun to Troade for the gospel of Crist, and a dore was opened to me in the Lord, 13 Y hadde not rest to my spirit, for Y foond not my brother Tite, but Y seide to hem farewel, and Y passide in to Macedonye. 14 And Y do thankyngis to God, that euere more makith vs to haue victorie in Crist Jhesu, and schewith bi vs the odour of his knowing in ech place; 15 for we ben the good odour of Crist to God, among these that ben maad saaf, and among these that perischen. 16 To othere sotheli odour of deth in to deth, but to othere we ben odour of lijf in to lijf. And to these thingis who is so able? 17 For we ben not as many, that don auoutrie bi the word of God, but we speken of clennesse, as of God, bifor God in Crist. CAP 3. 1 Bigynnen we therfor eftsoone to preise vs silf? or whether we neden, as summen, pistlis of preisinge to you, or of you? 2 Ye ben oure pistle, writun in oure hertis, which is knowun and red of alle men, 3 and maad opyn, for ye ben the pistle of Crist mynystrid of vs, and writun, not with enke, but bi the spirit of the lyuynge God; not in stony tablis, but in fleischli tablis of herte. 4 For we han such trist bi Crist to God; 5 not that we ben sufficient to thenke ony thing of vs, as of vs, but oure sufficience is of God. 6 Which also made vs able mynystris of the newe testament, not bi lettre, but bi spirit; for the lettre sleeth, but the spirit quykeneth. 7 And if the mynystracioun of deth write bi lettris in stoonys was in glorie, so that the children of Israel myyten not biholde in to the face of Moises, for the glorie of his cheer, which is auoidid, 8 hou schal not the mynystracioun of the spirit be more in glorie? 9 For if the mynystracioun of dampnacioun was in glorie, myche more the mynysterie of riytwisnesse is plenteuouse in glorie. 10 For nether that that was cleer was glorified in this part for the excellent glorie; and if that that is auoidid, 11 was bi glorie, myche more that that dwellith stille is in glorie. 12 Therfor we that han suche hope, vsen myche trist; 13 and not as Moises leide a veil on his face, that the children of Israel schulden not biholde in to his face, which veil is auoidid. 14 But the wittis of hem ben astonyed; for in to this dai the same veil in reding of the olde testament dwellith not schewid, for it is auoidid in Crist, but in to this dai, 15 whanne Moises is red, the veil is put on her hertis. 16 But whanne Israel schal be conuertid to God, the veil schal be don awei. 17 And the spirit is the Lord; and where the spirit of the Lord is, there is fredom. 18 And alle we that with open face seen the glorie of the Lord, ben transformed in to the same ymage, fro clerenesse in to clerenesse, as of the spirit of the Lord. CAP 4. 1 Therfor we that han this admynystracioun, aftir this that we han getun merci, 2 faile we not, but do we awei the preue thingis of schame, not walkinge in sutil gile, nether doynge auoutrye bi the word of God, but in schewynge of the treuthe comendynge vs silf to ech conscience of men bifor God. 3 For if also oure gospel is kyuerid, in these that perischen it is kyuerid; 4 in which God hath blent the soulis of vnfeithful men of this world, that the liytnyng of the gospel of the glorie of Crist, which is the ymage of God, schyne not. 5 But we prechen not vs silf, but oure Lord Jhesu Crist; and vs youre seruauntis bi Jhesu. 6 For God, that seide liyt to schyne of derknessis, he hath youe liyt in oure hertis, to the liytnyng of the science of the clerenesse of God, in the face of Jhesu Crist. 7 And we han this tresour in britil vessels, that the worthinesse be of Goddis vertu, and not of vs. 8 In alle thingis we suffren tribulacioun, but we ben not angwischid, or annoyed; we ben maad pore, but `we lacken nothing; we suffren persecucioun, 9 but we ben not forsakun; we ben maad lowe, but we ben not confoundid; we ben cast doun, but we perischen not. 10 And euere more we beren aboute the sleyng of Jhesu in oure bodi, that also the lijf of Jhesu be schewid in oure bodies. 11 For euere more we that lyuen, ben takun in to deth for Jhesu, that the lijf of Jhesu be schewid in oure deedli fleisch. 12 Therfor deth worchith in vs, but lijf worchith in you. 13 And we han the same spirit of feith, as it is writun, Y haue bileuyd, Y haue spoke; and we bileuen, wherfor also we speken; 14 witynge that he that reiside Jhesu, schal reise also vs with Jhesu, and schal ordeyne with you. 15 And alle thingis for you, that a plenteuouse grace bi many thankyngis be plenteuouse in to the glorie of God. 16 For which thing we failen not, for thouy oure vtter man be corruptid; netheles the ynner man is renewid fro dai to dai. 17 But that liyt thing of oure tribulacioun that lastith now, but as it were by a moment, worchith in vs ouer mesure an euerlastynge birthin in to the heiynesse of glorie; 18 while that we biholden not tho thingis that ben seyn, but tho that ben not seyn. For tho thingis that ben seyn, ben but durynge for a schort tyme; but tho thingis that ben not seyn, ben euerlastynge. CAP 5. 1 And we witen, that if oure ertheli hous of this dwellynge be dissoluyd, that we han a bildyng of God, an hous not maad bi hondis, euerlastynge in heuenes. 2 For whi in this thing we mornen, coueitynge to be clothid aboue with oure dwellyng, which is of heuene; if netheles we ben foundun clothid, 3 and not nakid. 4 For whi and we that ben in this tabernacle, sorewen with ynne, and ben heuyed, for that we wolen not be spuylid, but be clothid aboue; that the ilke thing that is deedli, be sopun vp of lijf. 5 But who is it that makith vs in to this same thing? God, that yaf to vs the ernes of the spirit. 6 Therfor we ben hardi algatis, and witen that the while we ben in this bodi, we goen in pilgrymage fro the Lord; 7 for we walken bi feith, and not bi cleer siyt. 8 But we ben hardi, and han good wille, more to be in pilgrymage fro the bodi, and to be present to God. 9 And therfor we stryuen, whether absent, whether present, to plese hym. 10 For it bihoueth vs alle to be schewid bifor the trone of Crist, that euery man telle the propre thingis of the bodi, as he hath don, ethir good, ether yuel. 11 Therfor we witynge the drede of the Lord, councelen men, for to God we ben opyn; and Y hope, that we ben opyn also in youre consciencis. 12 We comenden not vs silf eftsoone to you, but we yyuen to you occasioun to haue glorie for vs, that ye haue to hem that glorien in the face, and not in the herte. 13 For ethir we bi mynde passen to God, ether we ben sobre to you. 14 For the charite of Crist dryueth vs; gessynge this thing, that if oon died for alle, thanne alle weren deed. 15 And Crist diede for alle, that thei that lyuen, lyue not now to hem silf, but to hym that diede for hem, and roos ayen. 16 Therfor we fro this tyme knowen no man aftir the fleische; thouy we knowun Crist aftir the fleisch, but nowe we knowun not. 17 Therfor if ony newe creature is in Crist, the elde thingis ben passid. 18 And lo! alle thingis ben of God, which recounselide vs to hym bi Crist, and yaf to vs the seruyce of recounselyng. 19 And God was in Crist, recounselynge to hym the world, not rettynge to hem her giltes, and puttide in vs the word of recounselyng. 20 Therfor we vsen message for Crist, as if God monestith bi vs; we bisechen for Crist, be ye recounselid to God. 21 God the fadir made hym synne for vs, which knewe not synne, that we schulden be maad riytwisnesse of God in hym. CAP 6. 1 But we helpynge monesten, that ye resseyuen not the grace of God in veyn. 2 For he seith, In tyme wel plesinge Y haue herd thee, and in the dai of heelthe Y haue helpid thee. Lo! now a tyme acceptable, lo! now a dai of heelthe. 3 Yyue we to no man ony offencioun, that oure seruyce be not repreued; 4 but in alle thingis yyue we vs silf as the mynystris of God, in myche pacience, in tribulaciouns, 5 in nedis, in angwischis, in betyngis, in prisouns, in dissensiouns with ynne, in trauels, in wakyngis, in fastyngis, 6 in chastite, in kunnyng, in long abiding, in swetnesse, in the Hooli Goost, 7 in charite not feined, in the word of treuthe, in the vertu of God; bi armeris of riytwisnesse on the riythalf and on the lefthalf; 8 bi glorie and vnnoblei; bi yuel fame and good fame; as disseyueris, and trewe men; as thei that ben vnknowun, and knowun; 9 as men diynge, and lo! we lyuen; as chastisid, and not maad deed; 10 as sorewful, euere more ioiynge; as hauynge nede, but makynge many men riche; as no thing hauynge, and weldynge alle thingis. 11 A! ye Corynthies, oure mouth is open to you, oure herte is alargid; 12 ye ben not angwischid in vs, but ye ben anguischid in youre inwardnessis. 13 And Y seie as to sones, ye that han the same reward, be ye alargid. 14 Nyle ye bere the yok with vnfeithful men. For what parting of riytwisnes with wickidnesse? or what felouschipe of liyt to derknessis? 15 and what acording of Crist to Belial? or what part of a feithful with the vnfeithful? 16 and what consent to the temple of God with mawmetis? And ye ben the temple of the lyuynge God, as the Lord seith, For Y schal dwelle in hem, and Y schal walke among hem; and Y schal be God of hem, and thei schulen be a puple to me. 17 For which thing go ye out of the myddil of hem, and be ye departid, seith the Lord, and touche ye not vnclene thing; 18 and Y schal resseyue you, and schal be to you in to a fadir, and ye schulen be to me in to sones and douytris, seith the Lord almyyti. CAP 7. 1 Therfor, most dereworthe britheren, we that han these biheestis, clense we vs fro al filthe of the fleische and of the spirit, doynge holynesse in the drede of God. 2 Take ye vs; we han hirt no man, we han apeirid no man, we han bigilid no man. 3 Y seie not to youre condempnyng; for Y seide bifor, that ye ben in youre hertis, to die togidere and to lyue togidere. 4 Myche trist is to me anentis you, myche gloriyng is to me for you. Y am fillid with coumfort, Y am plenteuouse in ioie in al oure tribulacioun. 5 For whanne we weren comun to Macedonye, oure fleisch hadde no reste, but we suffriden al tribulacioun; with outforth fiytingis, and dredis with ynne. 6 But God that coumfortith meke men, coumfortide vs in the comyng of Tite. 7 And not oneli in the comyng of him, but also in the coumfort bi which he was coumfortid in you, tellinge to vs youre desire, youre weping, youre loue for me, so that Y ioiede more. 8 For thouy Y made you sorie in a pistle, it rewith me not; thouy it rewide, seynge that thouy thilke pistle made you sori at an our, now Y haue ioie; 9 not for ye weren maad soreuful, but for ye weren maad soreuful to penaunce. For whi ye ben maad sori aftir God, that in no thing ye suffre peirement of vs. 10 For the sorewe that is aftir God, worchith penaunce in to stidfast heelthe; but sorewe of the world worchith deth. 11 For lo! this same thing, that ye ben soreuful aftir God, hou myche bisynesse it worchith in you; but defendyng, but indignacioun, but drede, but desire, but loue, but veniaunce. In alle thingis ye han youun you silf to be vndefoulid in the cause. 12 Therfor thouy Y wroot to you, Y wroot not for hym that dide the iniurie, nether for hym that suffride, but to schewe oure bisinesse, which we han for you bifor God. 13 Therfor we ben coumfortid, but in youre coumfort more plenteuousli we ioyeden more on the ioie of Tite, for his spirit is fulfillid of alle you. 14 And if Y gloriede ony thing anentis hym of you, Y am not confoundid; but as we han spoke to you alle thingis, so also oure glorie that was at Tite, is maad treuthe. 15 And the inwardnesse of hym be more plenteuousli in you, which hath in mynde the obedience of you alle, hou with drede and trembling ye resseyueden hym. 16 Y haue ioye, that in alle thingis Y triste in you. CAP 8. 1 But, britheren, we maken knowun to you the grace of God, that is youun in the chirchis of Macedonye, 2 that in myche asaiyng of tribulacioun, the plente of the ioye of hem was, and the hiyeste pouert of hem was plenteuouse `in to the richessis of the symplenesse of hem. 3 For Y bere witnessyng to hem, aftir miyt and aboue miyt thei weren wilful, 4 with myche monestyng bisechynge vs the grace and the comynyng of mynystring, that is maad to hooli men. 5 And not as we hopiden, but thei yauen hem silf first to the Lord, aftirward to vs bi the wille of God. 6 So that we preyeden Tite, that as he bigan, so also he performe in you this grace. 7 But as ye abounden in alle thingis, in feith, and word, and kunnyng, and al bisynesse, more ouer and in youre charite in to vs, that and in this grace ye abounden. 8 Y seie not as comaundinge, but bi the bisynesse of othere men appreuynge also the good wit of youre charite. 9 And ye witen the grace of oure Lord Jhesu Crist, for he was maad nedi for you, whanne he was riche, that ye schulden be maad riche bi his nedynesse. 10 And Y yyue counsel in this thing; for this is profitable to you, that not oneli han bigunne to do, but also ye bigunnen to haue wille fro the formere yere. 11 But now parfourme ye in deed, that as the discrecioun of wille is redi, so be it also of parformyng of that that ye han. 12 For if the wille be redi, it is acceptid aftir that that it hath, not aftir that that it hath not. 13 And not that it be remyssioun to othere men, and to you tribulacioun; 14 but of euenesse in the present tyme youre aboundance fulfille the myseese of hem, that also the aboundaunce of hem be a fulfillynge of youre myseise, that euenesse be maad; as it is writun, 15 He that gaderide myche, was not encresid, and he that gaderide litil, hadde not lesse. 16 And Y do thankyngis to God, that yaf the same bisynesse for you in the herte of Tite, 17 for he resseyuede exortacioun; but whanne he was bisier, bi his wille he wente forth to you. 18 And we senten with hym a brother, whose preisyng is in the gospel bi alle chirchis. 19 And not oneli, but also he is ordeyned of chirchis the felowe of oure pilgrimage in to this grace, that is mynystrid of vs to the glorie of the Lord, and to oure ordeyned wille; 20 eschewynge this thing, that no man blame vs in this plente, that is mynystrid of vs to the glorye of the Lord. 21 For we purueyen good thingis, not onely bifor God, but also bifor alle men. 22 For we senten with hem also oure brothir, whom we han preued in many thingis ofte, that he was bisi, but nowe myche bisier, for myche trist in you, 23 ethir for Tite, that is my felowe and helpere in you, ethir for oure britheren, apostlis of the chirches of the glorie of Crist. 24 Therfor schewe ye in to hem in the face of chirchis, that schewynge that is of youre charite and of oure glorie for you. CAP 9. 1 For of the mynystrie that is maad to hooli men, it is to me of plente to write to you. 2 For Y knowe youre wille, for the which Y haue glorie of you anentis Macedonyes, for also Acaie is redi fro a yeer passid, and youre loue hath stirid ful manye. 3 And we han sent britheren, that this thing that we glorien of you, be not auoidid in this parti, that as Y seide, ye be redi. 4 Lest whanne Macedonyes comen with me, and fynden you vnredi, we be schamed, that we seien you not, in this substaunce. 5 Therfor Y gesside necessarie to preie britheren, that thei come bifore to you, and make redi this bihiyt blessyng to be redi, so as blessing, and not as aueryce. 6 For Y seie this thing, he that sowith scarseli, schal also repe scarseli; and he that sowith in blessyngis, schal `repe also of blessyngis. 7 Ech man as he castide in his herte, not of heuynesse, or of nede; for God loueth a glad yyuere. 8 And God is miyti to make al grace abounde in you, that ye in alle thingis euere more han al sufficience, and abounde in to al good werk; 9 as it is writun, He delide abrood, he yaf to pore men, his riytwisnesse dwellith withouten ende. 10 And he that mynystrith seed to the sowere, schal yyue also breed to ete, and he schal multiplie youre seed, and make myche the encreessingis of fruytis of youre riytwisnesse; 11 that in alle thingis ye maad riche waxen plenteuouse in to al symplenesse, which worchith bi vs doing of thankingis to God. 12 For the mynystrie of this office not oneli fillith tho thingis that failen to holi men, but also multiplieth many thankyngis to God, 13 bi the preuyng of this mynystrie, which glorifien God in the obedience of youre knouleching in the gospel of Crist, and in symplenesse of comynycacioun in to hem and in to alle, 14 and in the biseching of hem for you, that desiren you for the excellent grace of God in you. 15 Y do thankyngis to God of the yifte of hym, that may not be teld. CAP 10. 1 And Y my silf Poul biseche you, bi the myldenesse and softnesse of Crist, which in the face am meke among you, and Y absent triste in you. 2 For Y preie you, that lest Y present be not bold bi the trist, in which Y am gessid to be bold in to summe, that demen vs, as if we wandren aftir the fleisch. 3 For we walkynge in fleisch, fiyten not aftir the fleisch. 4 For the armuris of oure knyythod ben not fleischli, but myyti bi God to the distruccioun of strengthis. And we distrien counsels, 5 and alle hiynesse that hiyeth it silf ayens the science of God, and dryuen `in to caitifte al vndirstonding in to the seruyce of Crist. 6 And we han redi to venge al vnobedience, whanne youre obedience schal be fillid. 7 Se ye the thingis that ben after the face. If ony man trustith to him silf, that he is of Crist, thenke he this thing eft anentis hym silf, 8 for as he is Cristis, so also we. For if Y schal glorie ony thing more of oure power, which the Lord yaf to vs in to edifiyng, and not in to youre distruccioun, Y schal not be schamed. 9 But that Y be not gessid as to fere you bi epistlis, 10 for thei seien, That epistlis ben greuouse and stronge, but the presence of the bodi is feble, and the word worthi to be dispisid. 11 He that is suche oon, thenke this, for suche as we absent ben in word bi pistlis, suche we ben present in dede. 12 For we doren not putte vs among, or comparisoune vs to summen, that comenden hem silf; but we mesuren vs in vs silf, and comparisounen vs silf to vs. 13 For we schulen not haue glorie ouer mesure, but bi the mesure of the reule which God mesuride to vs, the mesure that stretchith to you. 14 For we ouerstretchen not forth vs, as not stretchinge to you. For to you we camen in the gospel of Crist, 15 not gloriynge ouer mesure in othere mennus trauelis. For we `han hope of youre feith that wexith in you to be magnefied bi oure reule in abundaunce, 16 also to preche in to tho thingis that ben biyendis you, not to haue glorie in othere mennus reule, in these thingis that ben maad redi. 17 He that glorieth, haue glorie in the Lord. 18 For not he that comendith hym silf is preuyd, but whom God comendith. CAP 11. 1 I wolde that ye wolden suffre a litil thing of myn vnwisdom, but also supporte ye me. 2 For Y loue you bi the loue of God; for Y haue spousid you to oon hosebonde, to yelde a chast virgyn to Crist. 3 But Y drede, lest as the serpent disseyuede Eue with his sutil fraude, so youre wittis ben corrupt, and fallen doun fro the symplenesse that is in Crist. 4 For if he that cometh, prechith anothir Crist, whom we precheden not, or if ye taken another spirit, whom ye token not, or another gospel, which ye resseyueden not, riytli ye schulden suffre. 5 For Y wene that Y haue don no thing lesse than the grete apostlis. 6 For thouy Y be vnlerud in word, but not in kunnyng. For in alle thingis Y am open to you. 7 Or whether Y haue don synne, mekynge my silf, that ye be enhaunsid, for freli Y prechide to you the gospel of God? 8 Y made nakid othere chirchis, and Y took sowde to youre seruyce. 9 And whanne Y was among you, and hadde nede, Y was chargeouse to no man; for britheren that camen fro Macedonye, fulfilliden that that failide to me. And in alle thingis Y haue kept, and schal kepe me with outen charge to you. 10 The treuthe of Crist is in me; for this glorie schal not be brokun in me in the cuntreis of Acaie. 11 Whi? for Y loue not you? 12 God woot. For that that Y do, and that Y schal do, is that Y kitte awei the occasioun of hem that wolen occasioun, that in the thing, in which thei glorien, thei be foundun as we. 13 For siche false apostlis ben trecherouse werk men, and transfiguren hem in to apostlis of Crist. 14 And no wondur, for Sathanas hym silf transfigurith hym in to an aungel of light. 15 Therfor it is not greet, if hise mynystris ben transfigurid as the mynystris of riytwisnesse, whos ende schal be aftir her werkis. 16 Eft Y seie, lest ony man gesse me to be vnwise; ellis take ye me as vnwise, that also Y haue glorie a litil what. 17 That that Y speke, Y speke not aftir God, but as in vnwisdom, in this substaunce of glorie. 18 For many men glorien aftir the fleisch, and Y schal glorie. 19 For ye suffren gladli vnwise men, whanne ye silf ben wise. 20 For ye susteynen, if ony man dryueth you in to seruage, if ony man deuourith, if ony man takith, if ony man is enhaunsid, if ony man smytith you on the face. 21 Bi vnnoblei Y seie, as if we weren sike in this parti. In what thing ony man dar, in vnwisdom Y seie, and Y dar. 22 Thei ben Ebrewis, and Y; thei ben Israelitis, and Y; thei ben the seed of Abraham, and Y; 23 thei ben the mynystris of Crist, and Y. As lesse wise Y seie, Y more; in ful many trauelis, in prisouns more plenteuousli, in woundis aboue maner, in deethis ofte tymes. 24 Y resseyuede of the Jewis fyue sithis fourti strokis oon lesse; 25 thries Y was betun with yerdis, onys Y was stonyd, thries Y was at shipbreche, a nyyt and a dai Y was in the depnesse of the see; 26 in weies ofte, in perelis of floodis, in perelis of theues, in perelis of kyn, in perelis of hethene men, in perelis in citee, in perelis in desert, in perelis in the see, in perelis among false britheren, in trauel and nedynesse, 27 in many wakyngis, in hungur, in thirst, in many fastyngis, in coold and nakidnesse. 28 Withouten tho thingis that ben withoutforth, myn ech daies trauelyng is the bisynesse of alle chirchis. 29 Who is sijk, and Y am not sijk? who is sclaundrid, and Y am not brent? 30 If it bihoueth to glorie, Y schal glorie in tho thingis that ben of myn infirmyte. 31 God and the fadir of oure Lord Jhesu Crist, that is blessid in to worldis, woot that Y lie not. 32 The preuost of Damask, of the kyng of the folk Arethe, kepte the citee of Damascenes to take me; 33 and bi a wyndow in a leep Y was latun doun bi the wal, and so Y ascapide hise hondis. CAP 12. 1 If it bihoueth to haue glorie, it spedith not; but Y schal come to the visiouns and to the reuelaciouns of the Lord. 2 I woot a man in Crist that bifore fouretene yeer; whether in bodi, whether out of the bodi, Y woot not, God woot; that siche a man was rauyschid `til to the thridde heuene. 3 And Y woot sich a man; whether in bodi, or out of bodi, Y noot, God woot; 4 that he was rauyschid in to paradis, and herde preuy wordis, whiche it is not leueful to a man to speke. 5 For such maner thingis Y schal glorie; but for me no thing, no but in myn infirmytees. 6 For if Y schal wilne to glorie, Y schal not be vnwijs, for Y schal seie treuthe; but Y spare, lest ony man gesse me ouer that thing that he seeth in me, or herith ony thing of me. 7 And lest the greetnesse of reuelaciouns enhaunse me in pride, the pricke of my fleisch, an aungel of Sathanas, is youun to me, that he buffate me. 8 For whiche thing thries Y preiede the Lord, that it schulde go awei fro me. 9 And he seide to me, My grace suffisith to thee; for vertu is parfitli maad in infirmyte. Therfor gladli Y schal glorie in myn infirmytees, that the vertu of Crist dwelle in me. 10 For which thing Y am plesid in myn infirmytees, in dispisyngis, in nedis, in persecuciouns, in anguyschis, for Crist; for whanne Y am sijk, thanne Y am miyti. 11 Y am maad vnwitti, ye constreyneden me. For Y ouyte to be comendid of you; for Y dide no thing lesse than thei that ben apostlis `aboue maner. 12 Thouy Y am nouyt, netheles the signes of myn apostilhed ben maad on you, in al pacience, and signes, and grete wondris, and vertues. 13 And what is it, that ye hadden lesse than othere chirchis, but that Y my silf greuyde you not? Foryyue ye to me this wrong. 14 Lo! this thridde tyme Y am redi to come to you, and Y schal not be greuous to you; for Y seke not tho thingis that ben youre, but you. For nether sones owen to tresoure to fadir and modir, but the fadir and modir to the sones. 15 For Y schal yyue moost wilfuli, and Y my silf schal be youun aboue for youre soulis; thouy Y more loue you, and be lesse louyd. 16 But be it; Y greuyde not you, but whanne Y was sutil, Y took you with gile. 17 Whether Y disseyuede you bi ony of hem, which Y sente to you? 18 Y preiede Tite, and Y sente with hym a brother. Whether Tite begilide you? whether we yeden not in the same spirit? whether not in the same steppis? 19 Sum tyme ye wenen, that we schulen excuse vs anentis you. Bifor God in Crist we speken; and, moost dere britheren, alle thingis for youre edifiyng. 20 But Y drede, lest whanne Y come, Y schal fynde you not suche as Y wole, and Y schal be foundun of you suche as ye wolen not; lest perauenture stryuyngis, enuyes, sturdynessis, dissenciouns and detraccions, preuy spechis of discord, bolnyngis bi pride, debatis ben among you; 21 and lest eftsoone whanne Y come, God make me low anentis you, and Y biweile many of hem, that bifor synneden, and diden not penaunce on the vnclennesse, and fornicacioun, and vnchastite, that thei han don. CAP 13. 1 Lo! this thridde tyme Y come to you, and in the mouth of tweyne or of thre witnessis euery word schal stonde. 2 Y seide bifor, and seie bifor, as present twies, and now absent, to hem that bifor han synned, and to alle othere; for if Y come eftsoone, Y schal not spare. 3 Whether ye seken the preef of that Crist, that spekith in me, which is not feble in you? 4 For thouy he was crucified of infirmyte, but he lyueth of the vertu of God. For also we ben sijk in hym, but we schulen lyue with him of the vertu of God in vs. 5 Asaie you silf, if ye ben in the feith; ye you silf preue. Whether ye knowen not you silf, for Crist Jhesu is in you? but in happe ye ben repreuable. 6 But Y hope, that ye knowen, that we ben not repreuable. 7 And we preien the Lord, that ye do no thing of yuel; not that we seme preued, but that ye do that that is good, and that we ben as repreuable. 8 For we moun no thing ayens treuthe, but for the treuthe. 9 For we ioyen, whanne we ben sijk, but ye ben myyti; and we preien this thing, youre perfeccioun. 10 Therfor Y absent write these thingis, that Y present do not hardere, bi the powere, which the Lord yaf to me in to edificacioun, and not in to youre distruccioun. 11 Britheren, `hennus forward ioye ye, be ye perfit, excite ye; vndurstonde ye the same thing; haue ye pees, and God of pees and of loue schal be with you. 12 Grete ye wel togidere in hooli cos. Alle hooli men greten you wel. 13 The grace of oure Lord Jhesu Crist, and the charite of God, and the comynyng of the Hooli Gost, be with `you alle. Amen.

Galathies

CAP 1. 1 Poul the apostle, not of men, ne bi man, but bi Jhesu Crist, and God the fadir, 2 that reiside hym fro deth, and alle the britheren that ben with me, to the chirchis of Galathie, 3 grace to you and pees of God the fadir, and of the Lord Jhesu Crist, 4 that yaf hym silf for oure synnes, to delyuere vs fro the present wickid world, bi the wille of God and of oure fadir, 5 to whom is worschip and glorie in to worldis of worldis. Amen. 6 I wondur, that so soone ye be thus moued fro hym that clepid you in to the grace of Crist, in to another euangelie; which is not anothir, 7 but that ther ben summe that troublen you, and wolen mysturne the euangelie of Crist. 8 But thouy we, or an aungel of heuene, prechide to you, bisidis that that we han prechid to you, be he acursid. 9 As Y haue seid bifore, and now eftsoones Y seie, if ony preche to you bisidis that that ye han vndurfongun, be he cursid. 10 For now whether counsele Y men, or God? or whether Y seche to plese men? If Y pleside yit men, Y were not Cristis seruaunt. 11 For, britheren, Y make knowun to you the euangelie, that was prechid of me, for it is not bi man; 12 ne Y took it of man, ne lernyde, but bi reuelacioun of Jhesu Crist. 13 For ye han herd my conuersacioun sumtyme in the Jurie, and that Y pursuede passyngli the chirche of God, and fauyt ayen it. 14 And Y profitide in the Jurie aboue many of myn eueneldis in my kynrede, and was more aboundauntli a folewere of my fadris tradiciouns. 15 But whanne it pleside hym, that departide me fro my modir wombe, 16 and clepide bi his grace, to schewe his sone in me, that Y schulde preche hym among the hethene, anoon Y drowy me not to fleisch and blood; ne Y cam to Jerusalem to the apostlis, 17 that weren tofor me, but Y wente in to Arabie, and eftsoones Y turnede ayen in to Damask. 18 And sith thre yeer aftir Y cam to Jerusalem, to se Petre, and Y dwellide with hym fiftene daies; 19 but Y sawy noon othere of the apostlis, but James, oure Lordis brother. 20 And these thingis which Y write to you, lo! tofor God Y lie not. 21 Afterward Y cam in to the coostis of Syrie and Cilicie. 22 But Y was vnknowun bi face to the chirchis of Judee, that weren in Crist; and thei hadden oonli an heryng, 23 that he that pursuede vs sum tyme, prechide now the feith, ayens which he fauyte sum tyme; 24 and in me thei glorifieden God. CAP 2. 1 And sith fourtene yeer aftir, eftsones Y wente vp to Jerusalem with Barnabas, and took with me Tite. 2 Y wente vp bi reuelacioun, and spak with hem the euangelie, which Y preche among the hethene; and bi hem silf to these that semeden to be sumwhat, lest Y runne, or hadde runne in veyne. 3 And nother Tite, that hadde be with me, while he was hethene, was compellid to be circumsidid; 4 but for false britheren that weren brouyt ynne, whiche hadden entrid to aspie oure fredom, which we han in Jhesu Crist, to bring vs in to seruage. 5 But we yyue no place to subieccioun, that the treuthe of the gospel schulde dwelle with you. 6 But of these that semeden to be sumwhat; whiche thei weren sum tyme, it perteyneth not to me, for God takith not the persoone of man; for thei that semeden to be sumwhat, yauen me no thing. 7 But ayenward, whanne thei hadden seyn, that the euangelie of prepucie was youun to me, as the euangelie of circumcisioun was youun to Petre; 8 for he that wrouyte to Petre in apostlehed of circumcisioun, wrouyte also to me among the hethene; 9 and whanne thei hadden knowe the grace of God, that was youun to me, James, and Petre, and Joon, whiche weren seyn to be the pileris, thei yauen riythond of felowschip to me and to Barnabas, that we among the hethene, and thei in to circumcisioun; 10 oneli that we hadde mynde of pore men `of Crist, the which thing Y was ful bisi to doon. 11 But whanne Petre was comun to Antioche, Y ayenstood hym in the face, for he was worthi to be vndirnommen. 12 For bifor that ther camen summen fro James, he eete with the hethene men; but whanne thei weren comun, he withdrowy, and departide hym, dredinge hem that weren of circumcisioun. 13 And the othere Jewis assentiden to his feynyng, so that Barnabas was drawun of hem in to that feynyng. 14 But whanne Y sawy, that thei walkiden not riytli to the treuthe of the gospel, Y seide to Petre bifor alle men, If thou, that art a Jew, lyuest hethenlich, and not Jewelich, hou constreynest thou hethene men to bicome Jewis? 15 We Jewis of kynde, and not synful men of the hethene, 16 knowen that a man is not iustified of the werkis of lawe, but bi the feith of Jhesu Crist; and we bileuen in Jhesu Crist, that we ben iustified of the feith of Crist, and not of the werkis of lawe. Wherfor of the werkis of lawe ech fleisch schal not be iustified. 17 And if we sechen to be iustified in Crist, we oure silf ben foundun synful men, whether Crist be mynystre of synne? 18 God forbede. And if Y bylde ayen thingis that Y haue distruyed, Y make my silf a trespassour. 19 For bi the lawe Y am deed to the lawe, and Y am fitchid to the crosse, that Y lyue to God with Crist. 20 And now lyue not Y, but Crist lyueth in me. But that Y lyue now in fleisch, Y lyue in the feith of Goddis sone, that louede me, and yaf hym silf for me. 21 Y caste not awey the grace of God; for if riytwisnesse be thoruy lawe, thanne Crist diede with out cause. CAP 3. 1 Vnwitti Galathies, tofor whos iyen Jhesu Crist is exilid, and is crucified in you, who hath disseyued you, that ye obeyen not to treuthe? 2 This oneli Y wilne to lerne of you, whether ye han vndurfonge the spirit of werkis of the lawe, or of heryng of bileue? 3 So ye ben foolis, that whanne ye han bigunne in spirit, ye ben endid in fleisch. 4 So grete thingis ye han suffrid without cause, if it be withoute cause. 5 He that yyueth to you spirit, and worchith vertues in you, whether of werkis of the lawe, or of hering of bileue? 6 As it is writun, Abraham bileuede to God, and it was rettid to hym to riytfulnesse. 7 And therfor knowe ye, that these that ben of bileue, ben the sones of Abraham. 8 And the scripture seynge afer, that God iustifieth the hethene, of bileue told tofor to Abraham, That in thee alle the hethene schulen be blessid. 9 And therfor these that ben of bileue, schulen be blessid with feithful Abraham. 10 For alle that ben of the werkis of the lawe, ben vndur curse; for it is writun, Ech man is cursid, that abidith not in alle thingis that ben writun in the book of the lawe, to do tho thingis. 11 And that no man is iustified in the lawe bifor God, it is opyn, for a riytful man lyueth of bileue. 12 But the lawe is not of bileue, but he that doith tho thingis of the lawe, schal lyue in hem. 13 But Crist ayenbouyte us fro the curse of the lawe, and was maad acursid for vs; for it is writun, Ech man is cursid that hangith in the tre; 14 that among the hethene the blessyng of Abraham were maad in `Crist Jhesu, that we vndurfonge the biheeste of spirit thoruy bileue. 15 Britheren, Y seie aftir man, no man dispisith the testament of a man that is confermed, or ordeyneth aboue. 16 The biheestis weren seid to Abraham and to his seed; he seith not, In seedis, as in many, but as in oon, And to thi seed, that is, Crist. 17 But Y seie, this testament is confermed of God; the lawe that was maad after foure hundrid and thritti yeer, makith not the testament veyn to auoide awei the biheest. 18 For if eritage were of the lawe, it were not now of biheeste. But God grauntide to Abraham thoruy biheest. 19 What thanne the lawe? It was sett for trespassing, to the seed come, to whom he hadde maad his biheest. Whiche lawe was ordeyned bi aungels, in the hoond of a mediatour. But a mediatour is not of oon. But God is oon. 21 Is thanne the lawe ayens the biheestis of God? God forbede. For if the lawe were youun, that myyte quikene, verili were riytfulnesse of lawe. 22 But scripture hath concludid alle thingis vndir synne, that the biheeste of the feith of Jhesu Crist were yyuen to hem that bileuen. 23 And tofor that bileue cam, thei weren kept vndur the lawe, enclosid in to that bileue that was to be schewid. 24 And so the lawe was oure vndirsmaister in Crist, that we ben iustified of bileue. 25 But aftir that bileue cam, we ben not now vndur the vndurmaistir. 26 For alle ye ben the children of God thoruy the bileue of Jhesu Crist. 27 For alle ye that ben baptisid, ben clothid with Crist. 28 Ther is no Jewe, ne Greke, ne bond man, ne fre man, ne male, ne female; for alle ye ben oon in `Jhesu Crist. 29 And if ye ben oon in `Jhesu Crist, thanne ye ben the seed of Abraham, and eiris bi biheest. CAP 4. 1 But Y seie, as long tyme as the eir is a litil child, he dyuersith no thing fro a seruaunt, whanne he is lord of alle thingis; 2 but he is vndur keperis and tutoris, in to the tyme determyned of the fadir. 3 So we, whanne we weren litle children, we serueden vndur the elementis of the world. 4 But aftir that the fulfilling of tyme cam, God sente his sone, 5 maad of a womman, maad vndur the lawe, that he schulde ayenbie hem that weren vndur the lawe, that we schulden vnderfonge the adopcioun of sones. 6 And for ye ben Goddis sones, God sente his spirit in to youre hertis, criynge, Abba, fadir. 7 And so ther is not now a seruaunt, but a sone; and if he is a sone, he is an eir bi God. 8 But thanne ye vnknowynge God, serueden to hem that in kynde weren not goddis. 9 But now whanne ye han knowe God, and ben knowun of God, hou ben ye turned eftsoone to the febil and nedi elementis, to the whiche ye wolen eft serue? 10 Ye taken kepe to daies, and monethis, and tymes, and yeris. 11 But Y drede you, lest without cause Y haue trauelid among you. 12 Be ye as Y, for Y am as ye. Britheren, Y biseche you, ye han hurt me no thing. 13 But ye knowen, that bi infirmyte of fleisch Y haue prechid to you now bifore; 14 and ye dispiseden not, nether forsoken youre temptacioun in my fleisch, but ye resseyueden me as an aungel of God, as `Crist Jhesu. 15 Where thanne is youre blessyng? For Y bere you witnesse, that if it myyte haue be don. ye wolden haue put out youre iyen, and haue yyuen hem to me. 16 Am Y thanne maad an enemye to you, seiynge to you the sothe? 17 Thei louen not you wel, but thei wolen exclude you, that ye suen hem. 18 But sue ye the good euermore in good, and not oneli whanne Y am present with you. 19 My smale children, whiche Y bere eftsoones, til that Crist be fourmed in you, 20 and Y wolde now be at you, and chaunge my vois, for Y am confoundid among you. 21 Seie to me, ye that wolen be vndir the lawe, `han ye not red the lawe? 22 For it is writun, that Abraham hadde two sones, oon of a seruaunt, and oon of a fre womman. 23 But he that was of the seruaunt, was borun after the flesh; but he that was of the fre womman, by a biheeste. 24 The whiche thingis ben seid bi an othir vndirstonding. For these ben two testamentis; oon in the hille of Synai, gendringe in to seruage, which is Agar. 25 For Syna is an hille that is in Arabie, which hille is ioyned to it that is now Jerusalem, and seruith with hir children. 26 But that Jerusalem that is aboue, is fre, whiche is oure modir. 27 For it is writun, Be glad, thou bareyn, that berist not; breke out and crye, that bringist forth no children; for many sones ben of hir that is left of hir hosebonde, more than of hir that hath an hosebonde. 28 For, britheren, we ben sones of biheeste aftir Isaac; 29 but now as this that was borun after the fleisch pursuede him that was aftir the spirit, so now. 30 But what seith the scripture? Caste out the seruaunt and hir sone, for the sone of the seruaunt schal not be eir with the sone of the fre wijf. 31 And so, britheren, we ben not sones of the seruaunt, but of the fre wijf, bi which fredom Crist hath maad vs fre. CAP 5. 1 Stonde ye therfor, and nyl ye eftsoones be holdun in the yok of seruage. 2 Lo! Y Poul seie to you, that if ye ben circumcidid, Crist schal no thing profite to you. 3 And Y witnesse eftsoones to ech man that circumcidith hym silf, that he is dettour of al the lawe to be don. 4 And ye ben voidid awei fro Crist, and ye that be iustified in the lawe, ye han fallen awei fro grace. 5 For we thoruy the spirit of bileue abiden the hope of riytfulnesse. 6 For in Jhesu Crist nether circumcisioun is ony thing worth, nether prepucie, but the bileue that worchith bi charite. 7 Ye runnen wel; who lettide you that ye obeyede not to treuthe? 8 Consente ye to no man; for this counsel ys not of hym that hath clepid you. 9 A litil souredowy apeirith al the gobet. 10 I trust on you in oure Lord, that ye schulden vndurstonde noon other thing. And who that disturblith you, schal bere dom, who euere he be. 11 And, britheren, if Y preche yit circumcisioun, what suffre Y yit persecucioun? thanne the sclaundre of the crosse is auoidid. 12 Y wolde that thei weren cut awei, that disturblen you. 13 For, britheren, ye ben clepid in to fredom; oneli yyue ye not fredom in to occasioun of fleisch, but bi charite of spirit serue ye togidere. 14 For euery lawe is fulfillid in o word, Thou schalt loue thi neiybore as thi silf. 15 And if ye bite, and ete ech othere, se ye, lest ye be wastid ech fro othere. 16 And Y seie you in Crist, walke ye in spirit, and ye schulen not performe the desiris of the fleisch. 17 For the fleisch coueitith ayens the spirit, and the spirit ayen the fleisch; for these ben aduersaries togidere, that ye don not alle thingis that ye wolen. 18 That if ye be led bi spirit, ye ben not vnder the lawe. 19 And werkis of the fleisch ben opyn, whiche ben fornicacioun, vnclennes, vnchastite, letcherie, seruice of false goddis, 20 witchecraftis, enmytees, striuyngis, indignaciouns, wraththis, chidingis, discenciouns, sectis, enuyes, 21 manslauytris, dronkennessis, vnmesurable etyngis, and thingis lijk to these, whiche Y seie to you, as Y haue told to you `to fore, for thei that doon suche thingis, schulen not haue the kyngdom of God. 22 But the fruyt of the spirit is charite, ioye, pees, pacience, long abidyng, 23 benygnyte, goodnesse, myldenesse, feith, temperaunce, contynence, chastite; ayen suche thingis is no lawe. 24 And they that ben of Crist, han crucified her fleisch with vices and coueytyngis. 25 If we lyuen bi spirit, walke we bi spirit; be we not made coueytouse of veyn glorie, stirynge ech othere to wraththe, or hauynge enuye ech to othere. CAP 6. 1 Britheren, if a man be occupied in ony gilt, ye that ben spiritual, enforme ye such oon in spirit of softnesse, biholdinge thi silf, lest that thou be temptid. 2 Ech bere othere chargis, and so ye schulen fulfille the lawe of Crist. 3 For who that trowith that he be ouyt, whanne he is nouyt, he bigilith him silf. 4 But ech man preue his owne werk, and so he schal haue glorie in him silf, and not in an othere. 5 For ech man schal bere his owne charge. 6 He that is tauyt bi word, comune he with him that techith hym, in `alle goodis. 7 Nyle ye erre, God is not scorned; 8 for tho thingis that a man sowith, tho thingis he schal repe. For he that sowith in his fleisch, of the fleisch he schal repe corrupcioun; but he that sowith in the spirit, of the spirit he schal repe euerelastynge lijf. 9 And doynge good faile we not; for in his tyme we schal repe, not failinge. 10 Therfor while we han tyme, worche we good to alle men; but most to hem that ben homliche of the feith. 11 Se ye, what maner lettris Y haue write to you with myn owne hoond. 12 For who euere wole plese in the fleisch, `this constreyneth you to be circumcidid, oonli that thei suffren not the persecucioun of Cristis crosse. 13 For nether thei that ben circumcidid kepen the lawe; but thei wolen that ye be circumcidid, that thei haue glorie in youre fleisch. 14 But fer be it fro me to haue glorie, no but in the crosse of oure Lord Jhesu Crist, bi whom the world is crucified to me, and Y to the world. 15 For in Jhesu Crist nether circumcisioun is ony thing worth, ne prepucie, but a newe creature. 16 And who euere suwen this reule, pees on hem, and merci, and on Israel of God. 17 And heraftir no man be heuy to me; for Y bere in my bodi the tokenes of oure Lord Jhesu Crist. 18 The grace of oure Lord Jhesu Crist be with youre spirit, britheren. Amen.

↑ Back to top